Wokem Wan Gudfala Fasin Fren Wetem Jeova

DISAEPOL Jemes i raetem se: “Yufala i mas stap klosap long God, nao hem bambae i kam stap klosap long yufala.” (Jemes 4:8) Mo tu, Deved, man blong raetem Ol Sam, i singsing: “Yu yu fren blong olgeta we oli stap obei long yu.” (Ol Sam 25:14) I klia nomo se, Jeova God i wantem yumi blong gat wan gudfala fasin fren wetem hem. Be, i no olgeta evriwan we oli wosipim God mo obei long ol loa blong hem, we oli harem se oli stap klosap long hem.

?Olsem wanem long yu? ?Yu yu gat wan gudfala fasin fren wetem God? Ating, yu yu wantem kam klosap moa long hem. ?Olsem wanem yumi save wokem wan gudfala fasin fren wetem God? ?Bambae samting ya i minim wanem long yumi? Insaed long Baebol, long namba tri japta blong Ol Proveb, yumi save faenem ansa long ol kwestin ya.

Soemaot Lav, Kaen fasin mo Fasin Stap Tru

King Solomon, blong Isrel bifo, i statem namba tri japta blong Ol Proveb wetem tok ya: “Pikinini blong mi. Yu no mas fogetem ol samting ya we mi mi stap tijim yu long hem. Oltaem yu mas tingbaot ol tok blong mi. Sipos yu mekem olsem, bambae yu no save sot long wan samting long laef blong yu, mo bambae yu gat longfala laef.” (Ol Proveb 3:1, 2) Jeova God i bin givim tok ya we Solomon i raetem. Taswe yumi save talem se gudfala advaes ya we i olsem advaes we wan papa i givim, i rili kamaot long Jeova God, mo i go long yumi evriwan. Yumi kasem advaes blong folemgud ol tok blong God—hemia loa no tijing blong hem mo ol rul blong hem—we oli stap insaed long Baebol. Sipos yumi mekem olsem, ‘bambae yumi gat longfala laef.’ Yes, naoia yumi save gat wan laef we i gat pis. Mo yumi save blokem ol samting we i denja mo i spolem laef blong yumi, we plante man we oli mekem ol fasin nogud oli stap kasem. Antap moa, yumi save gat hop blong kasem laef we i no save finis long wan niufala wol we i gat pis long hem.—Ol Proveb 1:24-31; 2:21, 22.

Solomon i gohed i se: “Kaengud fasin mo fasin ya blong stap tru oltaem bambae oli no mas lego yu. Fasem olgeta long trot blong yu. Raetem long hat blong yu.mo olsem bambae yu save faenem kaen fasin mo gudfala dip save long ae blong God mo man.”—Ol Proveb 3:3, 4, NW.

Long prapa lanwis blong bifo, tok ya “lav mo kaen fasin” i save minim “lav we i stap tru oltaem”. Tok ya i gat wan dip mining blong hem se, fasgud, holemtaet mo stap tru oltaem. ?Yumi gat wan strong tingting blong stap tru long Jeova, nomata wanem i hapen long yumi? ?Yumi stap soemaot lav mo kaen fasin long olgeta we oli gat sem bilif olsem yumi? ?Yumi wokhad blong stap klosap long olgeta? Long laef blong yumi evri dei, ?yumi stap ‘toktok gud long ol man’, long taem we yumi fesem sam traem tu?—Ol Proveb 31:26.

From we Jeova i gat bigfala lav mo kaen fasin, hem i “rere blong fogif.” (Ol Sam 86:5) Sipos yumi tanem tingting blong yumi from ol sin we yumi bin mekem bifo, mo yumi traehad blong folem stret rod, yumi sua se Jeova bambae i givim ‘niufala paoa long laef blong yumi.’ (Ol Wok 3:19, 20) I stret we yumi folem eksampel blong God, mo fogivim ol narafala from rong blong olgeta—Matiu 6:14, 15.

Jeova hem i “God blong trutok”. Sipos yumi wantem stap klosap long hem, hem i wantem se yumi gat fasin blong “stap tru oltaem”. (Ol Sam 31:5, NW) ?Yumi rili ting se Jeova i wantem fren wetem yumi, sipos yumi gat wan dabol laef? Hemia i minim se yumi soemaot wan fasin taem yumi stap wetem ol Kristin fren, be soemaot wan defren fasin taem yumi stap wetem ol narafala. Fasin ya i olsem “ol man blong giaman” we oli haedem trufala fasin blong olgeta. (Ol Sam 26:4)  !I krangke sipos yumi mekem olsem, from we “olgeta samting oli stap long klia ples nomo, stret long fes blong [“Jeova,” NW]”!—Hibru 4:13.

Yumi mas tingbaot lav, kaen fasin mo fasin blong stap tru oltaem oli olsem wan sas nekles we yumi ‘hangem long trot’. Ol fasin ya oli halpem yumi blong ‘faenem kaen fasin long ae blong God mo man.’ Yumi nidim blong soemaot ol fasin ya, be tu blong raetem ‘long hat blong yumi.’ I min se yumi mas wokem ol fasin ya oltaem.

Lan Blong Trastem Jeova Fulwan

Waes king ya i gohed i se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.”—Ol Proveb 3:5, 6.

I stret nomo we yumi trastem Jeova fulwan. Hem i Man We I Wokem Evri Samting, mo “paoa blong hem i strong we i strong”. Hem i Stamba blong bigfala “paoa.” (Aesea 40:26, 29) Hem i naf blong mekem olgeta stamba tingting blong hem oli kamtru. Nem blong hem i minim se “Hem i Mekem i Kamaot,” mo nem ya i bildimap bilif blong yumi blong trastem hem blong mekem olgeta promes blong hem oli kamtru. I tru tumas se, “God i no save giaman”, mo hem i stamba blong trutok. (Hibru 6:18) Bigfala fasin blong hem, hemia lav. (1 Jon 4:8) Hem i “stret gud, mo olgeta samting we hem i mekem i stap soemaot samting ya.” (Ol Sam 145:17) Sipos yumi no save trastem God, ?yumi save trastem hu? I tru, blong lan blong trastem hem, yumi nid blong “traem trastem hem . . . faenemaot we hem i tru”. Blong mekem olsem yumi nid blong wok folem ol samting we yumi lanem long Baebol, mo luksave ol gudfala frut we i kamaot from.—Ol Sam 34:8.

?Olsem wanem yumi save trastem Jeova long ‘olgeta samting we yumi stap mekem’ mo ‘tingbaot hem oltaem’? Man blong raetem Ol Sam, i se: “Bambae mi stap tingting gud long olgeta bigbigfala wok ya blong yu.” (Ol Sam 77:12) From we yumi no save luk God, i impoten tumas blong tingting dip long ol bigfala wok blong hem mo ol samting we hem i mekem long ol man blong hem. Yumi nid blong mekem samting ya blong kam klosap long hem.

Prea tu i wan impoten rod blong tingbaot Jeova oltaem. King Deved i singaot long Jeova “i stat long moning go kasem long sapa.” (Ol Sam 86:3) Plante taem, Deved i prea long ful naet, olsem long taem we hem i stap haed long draeples. (Ol Sam 63:6, 7) Aposol Pol i talem se: “Oltaem yufala i mas prea long paoa blong tabu spirit”. (Efesas 6:18) ?Yumi prea hamas taem evri dei? ?Yumi save storeyan wetem Jeova long ol samting we oli kamaot long hat blong yumi? ?Taem yumi kasem ol traem, yumi stap askem strong blong Jeova i halpem yumi? Bifo we yumi mekem ol impoten disisen, ?tru long prea, yumi askem Jeova blong lidim yumi? Ol prea we yumi mekem wetem fulhat blong yumi, oli mekem Jeova i laekem yumi moa. Mo yumi sua se hem i stap lesin long ol prea blong yumi mo ‘soemaot stret rod long yumi, blong yumi folem.’

I krangke nomo blong ‘ting se save ya blong yumi naoia, hem i naf blong givhan long yumi’, no blong trastem waes blong ol haeman long wol. !I moagud yumi putum ful tras blong yumi i go long Jeova! Solomon i talem se: “I nogud yu ting se yu yu wan waes man. Yu mas tinghevi long Hae God, yu mas ona gud long hem, mo yu mas tanem baksaed long ol fasin nogud. Sipos yu mekem olsem, fasin ya bambae i olsem gudfala meresin we i save mekem ol soa blong yu i finis, mo i save mekem ol sobodi blong yu i no moa soa”. (Ol Proveb 3:7, 8) Fasin fraet blong mekem God i harem nogud i mas bos long ol aksin, tingting, mo filing blong yumi. Gudfala fasin fraet olsem i save blokem yumi blong mekem ol samting nogud, mo i save bildimap yumi mo mekem yumi haremgud long saed blong spirit.

Givim Bes Blong Yu Long Jeova

?Wanem sam narafala rod we yumi save kam klosap long God? King ya i talem: “Yu mas tekem ol fas kakae blong garen blong yu, wetem ol nambawan samting long ol narafala kakae we yu kasem long hem, yu givim i go long Hae God, blong yu ona long hem”. (Ol Proveb 3:9) Blong givim ona long Jeova i minim se yumi mas soem bigfala respek mo leftemap nem blong hem. Yumi save mekem olsem sipos yumi joen mo sapotem wok blong talemaot nem blong hem long ol narafala man. Ol sas samting we yumi save yusum blong soem ona long Jeova, hemia taem mo paoa blong yumi, ol gudfala samting we yumi save mekem, mo ol samting we yumi gat long saed blong bodi. Yumi mas givim ol ‘fas kakae blong garen’—ol beswan samting blong yumi. Rod we yumi stap yusum ol samting  blong yumi i mas soemaot strong tingting blong yumi blong ‘gohed blong putum kingdom mo stret fasin long fasples’.—Matiu 6:33, NW.

Sipos yumi soem ona long Jeova wetem ol sas samting blong yumi, bambae yumi kasem pei from. Solomon i talem: “Sipos yu mekem olsem, haos blong putumgud kakae blong yu long hem, oltaem bambae i fulap long kakae, mo bambae yu kasem fulap waen, we ol botel blong yu oli no naf blong holem.” (Ol Proveb 3:10) I tru se, sipos yumi kam rij long saed blong spirit, samting ya i no minim se bambae yumi rij long saed blong bodi tu. Be sipos yumi glad blong yusum ol ting blong yumi blong givim ona long Jeova, bambae yumi save kasem ol bigfala blesing. Jisas i luk wok blong Jeova olsem “kakae” blong hem. (Jon 4:34) I sem mak, taem yumi joen long wok blong prij mo mekem disaepol. Wok ya i leftemap Jeova mo i bildimap yumi tu. Sipos yumi gohed long wok ya, bambae yumi fulapgud long saed blong spirit. Glad blong yumi—Solomon i yusum pijatok se waen—bambae i bigwan tumas.

Mo tu, yumi stap lukluk i go long Jeova mo prea long hem blong gat naf kakae evri dei. (Matiu 6:11) Evri samting we yumi gat, i bin kamaot long Papa blong yumi long heven, we i lavem yumi tumas. Sipos oltaem yumi stap yusum ol sas samting blong yumi blong presem hem, bambae hem i givim plante moa blesing bakegen.—1 Korin 4:7.

Stap Glad Blong Kasem Fasin Stretem We Jeova i Givim

King blong Isrel i makem we i impoten blong akseptem fasin stretem sipos yumi wantem stap klosap long Jeova. Hem i talem: “Pikinini blong mi. Sipos Hae God i mekem wan samting blong stretem yu, be yu mas glad blong karem, mo yu mas save we hem i mekem samting ya blong wekemap yu. Ol man we hem i lavem olgeta, oltaem hem i stap stretem olgeta, olsem we papa i stap stretem pikinini blong hem, we i glad tumas long hem.”—Ol Proveb 3:11, 12.

Maet i no isi blong akseptem fasin stretem. Aposol Pol i raetem se: “Yumi save finis, se sipos God i stretem yumi, bambae samting ya i no save mekem yumi harem gud, i mas mekem we yumi harem nogud. Be biaen, bambae yumi save kasem frut blong hem, we yumi gat pis, from we laef blong yumi i stret gud long fes blong God.” (Hibru 12:11) Fasin stretem i wan haf blong trening we yumi nidim we i save halpem yumi i kam klosap long God. Taem Jeova i stretem yumi, hem i soemaot we hem i lavem yumi—nomata sipos fasin stretem i kamaot long papa mama, tru long Kristin kongregesen, no tru long Baebol taem yumi stadi wanwan. Yumi waes sipos yumi glad blong akseptem fasin stretem.

 Holemtaet Waes Mo Fasin Luksave

Solomon i gohed i makem we i impoten blong gat waes mo fasin luksave sipos yumi wantem wan gudfala fasin fren wetem God. Hem i talem se: “Man we i stap kasem save, mo we i stap kam waes, hem bambae i save harem gud, from we fasin ya i gud moa, i winim we hem i kasem silva, no gol. . . Ol man we oli holem waestok oli glad oltaem nomo, mo hem bambae i mekem olgeta oli gat laef.”—Ol Proveb 3:13-18.

King ya i pulum yumi blong tingbaot waes mo fasin luksave blong Jeova we yumi save luk long ol nambawan samting we hem i wokem. Hem i talem se: “Hae God i mekem wol ya long waes blong hem, mo long save blong hem, hem i putum skae long prapa ples blong hem. . . . Pikinini blong mi. I gud yu holemstrong waes ya blong yu, mo fasin ya blong yu we yu save luksave mining blong ol samting we i had. Yu mas lukaot gud blong yu no lusum tufala samting ya. Bambae tufala fasin ya i givim laef long yu, mo laef ya blong yu bambae i gudwan, we bambae yu glad long hem oltaem.”—Ol Proveb 3:19-22.

Waes mo fasin luksave oli ol gudfala fasin we oli soemaot se yumi man blong God. Yumi mas wokem tufala fasin ya long laef blong yumi, mo yumi mas holemtaet tufala fasin ya. Yumi save mekem olsem sipos yumi no lego fasin blong stadi oltaem mo wok folem wanem we yumi lanem insaed long Baebol. Solomon i gohed i se: “Nao bambae yu save wokbaot long rod blong yu, we oltaem bambae yu stap gud nomo, yu no save foldaon. Mo long naet, taem yu go long bed blong yu, bambae yu save slip gud, we yu no save fraet.”—Ol Proveb 3:23, 24.

Yes, yumi save wokbaot long laef mo stap gud, mo slip we yumi no fraet, taem yumi stap wet long dei blong “bigfala trabol” we bambae i spolem rabis wol blong Setan. (1 Tesalonaeka 5:2, 3; 1 Jon 5:19) Mo tu, tru long bigfala trabol we i stap klosap, yumi sua se: “Bambae trabol i save kam kwiktaem nomo long ol man nogud, olsem we strong win i save girap wantaem nomo i kam, be yu bambae yu no save trabol long samting ya. Hae God bambae i holem yu, blong yu save stap gud oltaem, mo bambae hem i no save letem yu yu foldaon long wan trap.”—Ol Proveb 3:25, 26; Matiu 24:21.

Mekem Ol Gudfala Samting

Solomon i givim advaes ya se “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” (Ol Proveb 3:27) Fasin blong mekem i gud long narafala, i minim se yumi glad blong yusum ol ting blong yumi blong givhan long ol narafala. Mo, i gat plante rod blong mekem samting ya. Beswan samting we yumi save mekem, hemia blong givhan long ol narafala blong kam klosap long trufala God, from we yumi stap long “taem blong en”. (Daniel 12:4, NW) Taem blong yumi naoia, i stret taem blong wok strong blong talemaot gud nius blong Kingdom, mo blong mekem ol disaepol.—Matiu 28:19, 20.

Waes king ya i gohed i talem sam samting we yumi no mas mekem: “Sipos wan long olgeta we oli stap raonabaot long yu, i wantem blong yu givhan long hem, mo yu save mekem long taem ya nomo, i nogud yu talem long hem se: ‘Yu wet, tumora bambae mi kam givhan long yu.’ Mo i nogud yu mekem plan blong wokem wan samting we i save spolem wan man olsem, from we olgeta ya oli stap trastem yu. Sipos man i no mekem wan samting nogud long yu, i nogud yu rao long hem. Mo i nogud yu jalus long ol man blong faet we oli stap win, mo i nogud tu blong yu folem fasin blong olgeta.”—Ol Proveb 3:28-31.

Solomon i ademap risen blong ol advaes ya: “From we Hae God i no laekem nating ol man we oli stap mekem ol samting nogud, i agens long olgeta. Hem i trastem ol stret man, mo i stap talemaot tingting blong hem long olgeta. Oltaem, hem i stap singaot trabol i kam long haos blong man nogud, be hem i stap blesem haos blong man we laef blong hem i stret. Hem i no save tinghae long ol man we tingting blong olgeta i go antap, be hem i kaengud long olgeta we tingting blong olgeta i stap daon. Ol waes man bambae oli gat gud nem, mo bambae ol man oli stap ona gud long olgeta, be ol man we oli no gat hed, bambae oli stap mekem ol fasin nomo, we bambae oli sem from.”—Ol Proveb 3:32-35.

Sipos yumi wantem gat wan gudfala fasin fren wetem Jeova, yumi no mas mekem ol rabis plan we i save spolem narafala. (Ol Proveb 6:16-19) Bambae God i glad long yumi mo blesem yumi nomo, sipos yumi mekem ol samting we i stret long ae blong hem. Maet bambae yumi kasem ona tu, taem ol narafala oli luk se yumi gat ol fasin we i laenap wetem waes blong God. Bambae yumi gohed blong sakem ol giaman fasin blong wol we i rabis mo i raf tumas. !I gud yumi gohed blong folem stretfasin, mo wokem wan gudfala fasin fren wetem Jeova!

[Tok blong pija long pej 25]

“Yusum ol beswan samting blong yu blong soem ona long Jeova”