Yumi Man Blong Bilif

Serem Wan Mesej We i Leftemap Tingting Blong Ol Man Itali

BAEBOL i talem stret nomo, taem hem i singaot Jeova se “God we i stamba blong fasin blong givhan.” Sipos ol man blong God oli lanem blong folem fasin blong hem, bambae oli naf blong ‘givhan long ol narafala man we oli gat trabol, blong mekem olgeta oli harem gud.’ (2 Korin 1:3, 4; Efesas 5:1) Hemia wan mak we ol Witnes blong Jeova oli traehad blong kasem taem oli mekem wok blong prij.

Halpem Wan Woman We i Gat Nid

Long ol yia we oli jes pas, fasin pua, ol faet, mo tingting ya blong wantem kasem wan laef we i moagud, i pusum plante man blong muf i go long ol kantri we oli rij moa. Be i no isi blong lan long laef blong wan niufala ples. Manjola i stap long Borgomanero, wetem sam narafala man Albania. From we hem i no gat pepa we i givim raet long hem blong stap long Itali, Manjola i fraet blong toktok wetem Wanda, we i wan Witnes blong Jeova. Nating se i olsem, Wanda i winim tingting blong Manjola nao tufala i mekem plan blong storeyan tugeta. Manjola i soem kwiktaem se hem i intres blong stadi long Tok blong God, nating se samting ya bambae i hadwok lelebet from we tufala i toktok long tu defren lanwis.

Be afta long samtaem, Wanda i no moa save faenem wan man long haos. ?Wanem i bin hapen? Wanda i harem se olgeta man long haos ya oli bin ronwe from we polis i wantem holem wan long olgeta ya—we i boefren blong Manjola. !Boefren ya i bin kilim wan man i ded!

Fo manis biaen, Wanda i mitim Manjola bakegen. Wanda i tingtingbak long taem ya i se: “Taem mi luk hem, hem i bunbun mo i luk olsem se hem i sik, mi luksave se hem i rili pastru long sam hadtaem.” Manjola i storeyan se boefren blong hem blong fastaem, i stap long kalabus, mo sam fren we hem i go long olgeta blong faenem help, oli bin mekem hem i harem nogud tumas. Tingting blong hem i trabol tumas, nao hem i prea long God blong i halpem hem. Ale, hem i tingbaot Wanda, we i bin tokbaot Baebol long hem. !Manjola i glad tumas blong luk hem bakegen!

Tufala i gohed blong stadi Baebol bakegen, mo i no longtaem biaen, Manjola i stat blong kam long ol Kristin miting. Hem i stretem ol pepa blong hem mo i kasem raet blong stap long Itali. Afta long wan yia, Manjola i tekem baptaes blong kam wan Witnes. Ol promes blong God oli leftemap tingting blong hem, taswe hem i gobak long Albania blong serem mesej blong Baebol, we i leftemap tingting, wetem ol manples blong hem.

Prij Long Kamp Blong Ol Man Blong Narafala Kantri

Plante kongregesen blong Itali oli mekem plan blong prij long ol man blong narafala kantri, olsem Manjola. Eksampel, wan kongregesen long Florence i mekem  plan blong visitim wan kamp blong ol man blong narafala kantri. Ol man blong kamp ya—we plante long olgeta oli kamaot long Is Yurop, Masedonia, mo Kosovo—oli stap fesem plante defren kaen hadtaem. Samfala oli gat problem from fasin blong tekem drag no alkol. Plante long olgeta oli gat fasin blong stilim ol smosmol samting blong kasem mane we oli nidim blong laef.

Ol Witnes oli faenem se i no isi blong mekem wok blong prij long kamp ya. Nating se i olsem, wan fultaem paenia we nem blong hem Paola, i mitim Jaklina, wan woman blong Masedonia. Afta we tufala i storeyan plante taem lelebet, Jaklina i leftemap tingting blong fren blong hem, Susanna, blong ridim Baebol. Biaen, Susanna i storeyan wetem sam narafala famle blong hem. I no longtaem, faef memba blong famle ya oli stap stadi Baebol evri wik, oli stap joen long ol Kristin miting, mo oli stat mekem ol samting we oli lanem i wok long laef blong olgeta. Nomata we oli fesem sam problem, Jeova mo Tok blong hem i mekem olgeta ya oli harem gud.—Ol Wok 10:34, 35.

Wan Sista Blong Katolik Jos i Letem Jeova i Leftemap Tingting Blong Hem

Long taon ya Formia, wan fultaem paenia we nem blong hem Assunta, i toktok wetem wan woman we i stap wokbaot nogud. Woman ya hem i wan sista blong Katolik jos. Hem i joenem wan grup blong skul ya we i go long ol hospital mo ol haos wanwan blong givhan long ol man we oli sik mo handikap.

Assunta i talem long sista ya se: “Mi luk se yu tu yu stap safa tumas. Yumi sore tumas se, yumi evriwan i stap fesem hadtaem.” Wantaem nomo, sista ya i stat krae mo i talem se hem i gat bigfala problem long helt blong hem. Assunta i leftemap tingting blong hem, i talem se God we Baebol i tokbaot, i save mekem hem i harem gud bakegen. Sista ya i glad blong tekem sam magasin long saed blong Baebol, we Assunta i givim long hem.

Long nekis taem we tufala i storeyan, sista ya, we nem blong hem Palmira, i talem stret se hem i stap safa bigwan. Hem i laef longtaem long wan haos we ol sista blong Katolik jos oli stap lukaot long hem. Be, taem hem i mas aot long haos ya blong smoltaem from sam problem blong helt, oli no moa letem hem i kam stap long haos ya bakegen. Nating se i olsem, Palmira i harem se hem i mas fasgud long God from promes we hem i bin mekem taem hem i kam wan sista blong jos ya. Hem i go luk ol kleva man blong oli “mekem hem i kamgud bakegen” be ol samting we oli mekem long hem oli mekem tingting blong hem i trabol tumas. Palmira i agri blong stadi long Baebol, mo hem i kam long ol Kristin miting blong wan yia. Biaen hem i muf i go long wan narafala eria, mo ol Witnes oli no moa faenem hem. Tu yia i pas bifo we Assunta i faenem hem bakegen. Palmira i bin fesem bigfala trabol from famle blong hem mo ol lida blong jos. Nomata long samting ya, hem i stadi Baebol bakegen, hem i gru long saed blong spirit, mo i tekem baptaes blong kam wan Witnes blong Jeova.

Yes, mesej blong God ya we i “save leftemap tingting” blong man, i stap mekem plante man oli harem gud. (Rom 15:4, 5) From samting ya, ol Witnes blong Jeova long Itali oli gat strong tingting blong gohed blong folem fasin blong God taem oli serem nambawan mesej ya we i leftemap tingting, long olgeta man.