?YU YU ting se Baebol i save mekem pis i stap long famle? Plis skelem gud ol tok ya blong Baebol wetem tok blong ol man. Yu traem tingbaot wanem advaes i save givhan long yufala blong yufala i no moa rao long famle, yufala i holemtaet pis, mo yufala i traehad blong joen gud moa.

YU MAS GAT GUDFALA TINGTING LONG NARAFALA.

“I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala. Mo yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo.”—Filipae 2:3, 4.

“Mitufala i luk se yu mas tingbaot man no woman blong yu, se i gud moa i bitim yu mo ol narafala.”—Wan woman we i mared 19 yia finis.

YU NO JAJEM NARAFALA BE YU LESIN GUD.

“Yu mas talemgud long ol man blong . . . oli no man blong rao. Oli mas man we oli save fren gud long ol man, mo oltaem oli mas mekem i gud long ol man.”—Taetas 3:1, 2.

“Yu save blokem plante trabol sipos yu no ansa long man no woman blong yu long fasin we i olsem se yu wantem rao. Yu mas lesin gud, yu no jajem hem, mo yu respektem hem mo tingting blong hem, nating se yu no gat sem tingting.”—Wan woman we i mared 20 yia finis.

YU MEKEM TINGTING I LONGFALA MO YU GAT KWAET FASIN.

“Sipos wan man i agens long yu tumas, nating we hem i wan haeman, be sipos yu stap toktok gud wetem hem [“long kwaet fasin,” futnot NW], we yu mekem tingting blong yu i longfala, fasin ya bambae i save winim hem, i save mekem hem i kam fren gud wetem yu bakegen.”—Ol Proveb 25:15.

“I tru, bambae i gat sam rao, be blong stretem, yu mas gat gudfala fasin mo gudfala tingting. Yu mas gat longfala tingting. Sipos yu gat, bambae yu winim trabol ya.”—Wan woman we i mared 27 yia finis.

YU NO TOK NOGUD MO KILIM HEM

“Yufala i mas sakemaot olgeta i gowe long laef blong yufala. Bambae yufala i no moa kros. Bambae yufala i no moa faerap. Bambae yufala i no moa stap badfren long yufala. Bambae yufala i no moa tok agens long narafala man, mo yufala i no moa yusum ol doti tok.” —Kolosi 3:8.

“Mi laekem tumas fasin blong man blong mi we i bos gud long tingting blong hem. Hem i toktok kwaet nomo, neva hem i singaot strong mo tok nogud long mi.”—Wan woman we i mared 20 yia finis.

YU MAS GLAD BLONG FOGIVIM HEM MO YU STRETEM RAO KWIKTAEM.

“Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala.”—Kolosi 3:13.

“Taem i gat trabol long famle, i no isi blong mekem tingting i stap kwaet. I isi blong talem no mekem samting we i spolem man no woman blong yu. Sipos yutufala i fofogivim yutufala long taem olsem, hemia i nambawan. Yumi no save gat wan gudfala mared sipos yumi no fofogivim yumi.”—Wan woman we i mared 34 yia finis.

YU GIVIM MO SEREM SAMTING.

“Yufala i mas givim ol samting i go long narafala man, nao God bambae i givim ol samting i kam long yufala. . . . Fasin we yufala i folem blong givim samting i go long narafala man, hemia nao fasin we God bambae i folem blong givim ol samting i kam long yufala.”—Luk 6:38.

“Man blong mi i save samting we mi mi laekem, mo oltaem hem i mekem mi mi glad. Taswe, plante taem mi tingbaot se, ‘?Olsem wanem mi save mekem hem i glad?’ Fasin ya i mekem se mitufala i laf plante.” —Wan woman we i mared 44 yia finis.

GOHED NOMO BLONG HOLEMTAET PIS LONG FAMLE

Ol famle ya we Wekap! i askem kwestin long olgeta, oli sam nomo long plante milian famle long wol we Baebol i givhan long olgeta blong oli wokem ol fasin we oli mekem pis long famle. * Nating se sam long famle oli no wantem folem advaes blong Baebol, be ol narafala oli luk se i no blong nating nomo taem oli traehad blong mekem pis. ?From wanem? From we Baebol i promes se: “Man we i stap wok blong mekem i gud long ol man bambae i save harem gud.”—Ol Proveb 12:20.