I luk olsem se pikinini blong yu we i gat 6 yia i no save bos long tingting blong hem. !Taem hem i luk wan samting we hem i laekem, hem i wantem naoia nomo! Sipos hem i kros long yu, hem i tok nogud long yu mo i traem blong kilim yu. Maet yu stap tingting se: ‘?Hemia fasin blong pikinini nomo? ?Fasin ya bambae i lus, no i stret taem blong mi mi tijim hem blong i bos long tingting blong hem?’ *

Ol man tede oli no moa ting se oli mas bos long tingting blong olgeta. Dokta David Walsh i talem se: “Long wol tede, ol man oli ting se enikaen fasin nomo i oraet. Oltaem ol man, ol woman, mo ol pikinini tu, oli harem ol tok ya se yumi mas mekem samting we yumi nomo i wantem. Sam man oli serem save mo advaes blong olgeta blong givhan long ol narafala. Sam narafala man oli givim enikaen advaes nomo blong kasem mane. Be olgeta evriwan oli stap talem se yumi mas mekem samting we yumi nomo i wantem.” *

Yu mas tijim pikinini taem hem i smol nomo. Sam man oli stadi long wan grup blong ol pikinini blong plante yia. Taem ol pikinini ya oli gat 4 yia, ol man ya oli givim loli long olgeta wanwan, mo oli talem long olgeta se oli save kakae loli ya, no oli save wet smol. Sipos oli wet, bambae oli kasem wan moa loli bakegen. Taem ol pikinini ya oli kasem hae skul, olgeta we oli bos long tingting blong olgeta taem oli smol, oli no stap harem nogud mo oli no kros kwik, oli joen gud wetem ol narafala, mo oli kasem gudfala mak long skul.

I had blong pikinini i bos long tingting blong hem, sipos yu no tijim hem fastaem. Ol man we oli stadi long samting ya oli talem se, ol samting we i hapen long laef blong pikinini i save jenisim ol string long bren blong hem. Dokta Dan Kindlon i eksplenem se: “Samfala oli givim evri samting we pikinini i wantem, mo oli no mekem se hem i wet blong narafala i go fastaem long hem. Oli letem hem i mekem evri samting we hem i harem gud long hem, mo oli no tijim hem blong i blokem samting we hem nomo i wantem. Sipos yu mekem olsem, ol jenis we oli mas hapen long bren blong pikinini blong i save gruap i kam wan gudfala man we i gat strong tingting, maet bambae oli no hapen.” *

Yu soemaot gudfala eksampol. ?Olsem wanem? ?Yu yu bos long tingting blong yu? Taem yu draevem trak, ?pikinini blong yu i luk we yu kam kros from we ol trak oli fasfas? ?Hem i luk we yu pusum ol narafala long stoa, blong yu go fastaem long olgeta blong pem samting? ?Hem i luk we yu katem toktok blong narafala? Dokta Kindlon i talem se: “Sipos yu yu bos long tingting blong yu, hemia rod we i isi mo i beswan blong givhan long pikinini, blong hem tu i bos long tingting blong hem.”—Rul blong Baebol: Rom 12:9.

Yu tijim pikinini long frut we i save kamaot. Long fasin we i stret long yia blong pikinini, yu givhan long hem blong i luksave se gudfala frut i save kamaot taem hem i blokem samting we hem i wantem, mo nogud frut i save kamaot taem hem i mekem evri samting we hem i wantem. Sipos pikinini i kros from we narafala i mekem nogud long hem, yu mekem hem i tingbaot ol kwestin ya: ‘?Sipos mi givimbak, bambae samting ya i winim trabol ya, no bambae i mekem narafala trabol i kamaot? ?I gat wan rod we i moa gud blong stretem trabol ya? ?I gud mi wet fastaem blong letem kros i godaon? ?I moagud mi kamaot nomo?’—Rul blong Baebol: Galesia 6:7.

Yu leftemap tingting blong hem. Yu mas talem gudfala toktok long pikinini blong yu taem hem i bos long tingting blong hem. !Yu mekem hem i save se i no isi blong blokem samting we hem i wantem, be taem hem i mekem olsem, hem i soemaot se hem i gat strong tingting! Baebol i talem se: ‘Sipos yu no save holem kros blong yu, yu olsem taon we i no gat bigfala stonwol i goraon long hem, we i isi nomo blong ol enemi blong hem oli kam mekem faet long hem.’ (Ol Proveb 25:28) Be “man we i save mekem tingting blong hem i longfala, hem i gud moa” i winim wan strong man blong faet.—Ol Proveb 16:32.

Yu tijim hem long samting we hem i mas mekem. Yu mekem wan pleplei wetem pikinini blong soemaot samting we hem i save mekem. Maet yu putum nem blong pleplei ya se, “?Bambae Yu Yu Mekem Wanem?” no “Samting We i Gud, Samting We i Nogud.” Yu tokbaot samting we i save hapen, mo yutufala i aktem samting we i “gud” mo samting we i “nogud” blong mekem, taem hem i fesem trabol olsem. Yu traem faenem ol niufala rod. Sipos yu luk se i stret, yu save yusum ol pija, ol doli, no narafala samting blong mekem pikinini i harem gud long pleplei ya mo i lanem samting tu. Yu wantem we pikinini i luksave se i moa gud blong bos long tingting blong hem, i bitim we hem i hareap blong mekem samting we hem i wantem.—Rul blong Baebol: Ol Proveb 29:11.

Yu mas gat longfala tingting. Baebol i talem se: “Fasin blong pikinini, oltaem i save mekem ol krangke samting we i no save tingbaot.” (Ol Proveb 22:15) Yu no mas ting se pikinini blong yu bambae i lanem blong bos long tingting blong hem kwiktaem nomo. Buk ya (Teach Your Children Well), i talem se: “Samting ya bambae i tektaem. Bambae pikinini i gohed gud, i foldaon bakegen, mo i girap i gohed bakegen.” Be hadwok blong yu bambae i no blong nating nomo. Buk ya i gohed se: “Sipos pikinini i save bos long tingting blong hem, bambae i isi moa blong hem i no tekem drag taem hem i gat 12 yia, mo blong hem i no slip olbaot taem hem i gat 14 yia.”