Ol MAN oli ting se i gat 2.5 milian man long wol oli gat sik we i mekem skin i kam strong (Scleroderma). Plante taem sik ya localized scleroderma i kasem ol pikinini. Sik ya i mekem se skin blong olgeta i kam strong.

Taem Elisa i gat 10 yia, hem i kasem sik ya systemic scleroderma. Sik ya i save spolem skin blong man, mo tu ol haf blong bodi olsem kidni, hat, waetleva, mo ol gat insaed long bel. Ol dokta oli talem se ol meresin we Elisa i stap tekem, oli save givhan long hem blong i laef 5 yia nomo. Be Elisa i laef 14 yia nao. Nating se sik blong hem i no finis, hem i gohed blong gat gudfala tingting long ol samting we i hapen long hem. Ol man blong raetem Wekap! oli askem sam kwestin long Elisa long saed blong sik blong hem, mo olsem wanem hem i laef wetem sik ya.

 ?Wetaem nao yu haremsave se yu sik?

Taem mi gat 9 yia, mi kasem wan kil long elbo blong mi, mo mi harem i soa tumas. Kil ya i kam wan bigfala soa we i no moa save drae. Ale mifala i go long dokta nao oli jekem blad blong mi, mo oli faenemaot se mi gat sik ya systemic scleroderma. Helt blong mi i stap kam nogud, mekem se mifala i mas faenem wan dokta we i bin givhan finis long ol man we oli kasem sik ya.

?Afta, yufala i faenem wan dokta?

Mifala i faenem wan dokta blong halpem ol man we oli gat sik long ol masel mo ol joen blong bun. Dokta ya i talem long papa mo mama blong mi se sipos mi tekem tritmen ya chemotherapy, hemia bambae i halpem mi blong laef 5 yia moa, mo tu, maet tritmen ya bambae i daonem sik blong mi. Be tritmen ya i no givhan long bodi blong mi blong i blokem sik. Ale sipos smol flu nomo i kasem mi, be mi sik nogud.

!Be yu laef yet!

!Yes, mi glad tumas we mi laef yet! Taem mi gat samwe long 12 yia, mi stap harem jes blong mi i soa bigwan, blong klosap 30 minit olsem. Samtaem, samting ya i hapen 2 taem long wan dei. Mi harem i soa we i soa, mekem se mi stap singsingaot bigwan.

?Wanem i mekem se i soa tumas olsem?

Ol dokta oli faenemaot se mak blong hemoglobin * long blad blong mi i godaon bigwan, mo hat blong mi i stap pam strong blong sanem blad i go long bren blong mi. Mi kasem sam tritmen, mekem se long sam wik mi kam gud smol. Nating se i olsem, mi stap tingbaot se eni samting i save hapen. Hemia i mekem mi harem se mi no naf blong mekem wan samting blong givhan long mi.

Yu sik 14 yia finis. ?Naoia yu harem olsem wanem?

Mi stap harem bodi blong mi i soa yet, mo mi gat sam narafala sik long bodi we scleroderma i mekem. Ol sik ya hemia ol soa insaed long bel, long waetleva, mo tu jes i stap soa. Nating se mi sik olsem, mi no wantem westem taem blong tingbaot sik blong mi. Mi gat sam narafala samting blong mekem.

?Wanem samting?

Mi laekem blong dro ol pija, somap klos, mo wokem ol nekles mo iaring. Be mi mi wan Witnes blong Jehova, taswe samting we i impoten moa hemia blong tijim ol man long Baebol. Nating se mi no save wokbaot i go long haos blong ol man, be mi glad blong joen wetem ol narafala Witnes blong stadi Baebol wetem ol man we oli stap klosap long haos blong mi. Mi tu mi gat ol Baebol stadi. Wok ya i mekem mi kasem save se mi no laef blong nating.

?From wanem yu mekem wok ya, nating se yu gat bigfala sik?

Mi save se ol samting we mi tijim ol man long hem oli impoten, mo oli save halpem olgeta. Mo tu, mi glad tumas taem mi traehad blong givhan long ol narafala. Taem mi mekem olsem, blong smoltaem mi harem olsem se mi oraet nomo, mi no gat sik nating.

?Olsem wanem Baebol i givhan long yu blong stap glad?

Baebol i givhan long mi blong mi tingbaot se ol trabol ya we mi mo ol narafala i kasem, i blong smoltaem nomo. Long Revelesen 21:4, Baebol i talem se long stret taem blong hem, God bambae i “ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” Ol tok olsem oli mekem bilif blong mi long ol promes blong God i kam strong. God i promes se olgeta man bambae oli no moa sik mo oli no moa harem nogud long bodi blong olgeta.