PLANTE man oli talem se hem i naes tumas. Samfala oli talem se hem i narakaen. Ol longfala leg blong hem oli bunbun, hea blong hem i sofsof, mo ol bigfala ae blong hem oli saen. Bodi blong hem i longfala olsem 12 sentimeta, mo hem i hevi olsem 114 gram nomo. ?Yumi stap tokbaot wanem? !Wan smol anamol we nem blong hem tarsier!

Tarsier we yumi stap tokbaot i laef long kantri ya Filipin. I luk olsem se ol ae, mo sora, mo han, mo leg, mo tel blong anamol ya oli no stret long bodi blong hem, from we oli bigwan be bodi blong hem i smol nomo. Be taem yumi lukluk gud, yumi luksave se God i wokem ol haf ya blong bodi blong hem folem wan plan we i nambawan.

SORA: Sora blong hem i tintin olsem pepa. Hem i save rolem tufala sora ya i kam smol, no i save openem tufala i kam bigwan, blong i harem ol noes we oli smol tumas. Taswe i had blong ol anamol olsem wael puskat oli kasem hem. Mo tu, i isi blong hem i harem ol anamol we hem i wantem kasem olgeta blong kakae. Taem ples i tudak, hem i lesin blong harem noes blong ol kriket, waet anis, bebet, pijin, mo frog. Nao hem i tanem hed blong hem, mo i lukluk stret long samting we hem i wantem kasem blong kakae.

HAN: Han blong tarsier i stret gud blong holemtaet ol smosmol han blong tri. Skin long en blong ol fingga blong hem i no smut, be i gat ol laen long hem olsem wil blong trak. Taswe hem i save holemtaet han blong tri olsem wil blong trak i holem kolta, i no save glis. Skin we i stap aninit long longfala tel blong hem i sem mak. Hemia i mekem se taem hem i slip, hem i no foldaon, be hem i holemtaet tri mo i sidaon stret nomo.

 AE: Taem yumi skelem ae blong tarsier wetem bodi blong hem, yumi luk se ol ae ya oli bigbigwan tumas. I no gat wan narafala anamol olsem. !Ae blong hem i bigwan bitim bren blong hem! Hem i lukluk i go stret long fored, hem i no save tanem ae blong hem. ?Olsem wanem? ?Hemia i mekem i had blong tarsier i lukluk ol samting? Nogat. Nek blong hem i olsem lastik, taswe hed blong hem i save swingraon blong i lukluk evri samting raon long hem mo biaen tu.

LEG: Longfala leg blong tarsier i mekem se hem i save jam 6 meta wantaem. !Hemia i olsem 40 taem longfala blong bodi blong hem! Taem hem i wantem kasem wan bebet, hem i stretem ol fingga blong hem, nao i jam from bebet ya blong holem hem. Nating se ples i tudak, be bambae hem i jam i go stret long bebet ya we hem i wantem.

Plante tarsier we ol man oli holem mo kipim, oli no laef longtaem. Hemia from we oli no laekem we man i tajem mo holem olgeta. Mo tu, oli hanggri from ol bebet we oli laef long bus. Nating se i olsem, ol man Filipin oli laekem tumas blong lukluk smol anamol ya blong bus we ol ae blong hem oli bigbigwan. Oli sapraes long evri haf blong bodi blong hem.