LONG yia 2006, Harriet i ded. Hem i gat 175 yia blong hem. Be Harriet i no wan woman. Hem i wan totel we i laef long Ostrelia, long wan ples we oli kipim ol anamol long hem. Laef blong hem i longfala, i no olsem yumi ol man. Mo i gat plante narafala samting bakegen we oli save laef longtaem olsem Harriet. Yu traem tingbaot sam long olgeta.

• Sam man Finlan oli stadi long ol kokeas we perel i stap gru insaed long olgeta, mo we oli laef long reva. Kokeas ya i save laef 200 yia.

• I gat wan kaen natalae we i save laef bitim 100 yia. Sam long olgeta oli bin stap laef 400 yia.

• Sam kaen paentri mo had wud (sequoia, cypress, spruce) oli laef plante taosen yia.

Be yumi ol man, we yumi hae moa long ol samting ya, ating bambae yumi no kasem 80 no 90 yia, nating se yumi traehad blong mekem laef blong yumi i kam longfala.

?Olsem wanem? ?Yumi save laef bitim 80 yia? ?I gat rod blong mekem laef blong yumi i longfala moa? Plante man oli ting se ol saentis mo ol dokta bambae oli faenem wan rod blong mekem laef blong yumi i longfala moa.

Ol saentis oli givhan bigwan long ol man taem oli faenemaot ol niufala meresin mo tritmen blong winim sik. Wan buk (Scientific American) i talem se: “Naoia [long Amerika] i no moa gat plante we oli ded from  ol sik we narafala i save pasem long yumi, mo i no moa gat plante woman oli ded taem oli bonem pikinini. Mo tu, namba blong ol smosmol pikinini we oli ded i godaon bigwan. Hem i 75 pesen daon long namba blong 1960.” Yes, ol saentis oli givhan bigwan blong winim ol sik. Be ol save we oli kasem i no naf blong blokem ded. Sem buk ya i talem se: “[Ol saentis] oli no save gud yet from wanem yumi kam olfala, nating se oli stadi plante yia long bisnes ya.” Be “oli ting se maet yumi kam olfala from we ol gene * long bodi blong yumi oli no moa wok folem plan blong olgeta.” Buk ya i talem tu se: “Sipos yumi stap kam olfala from risen ya, maet wan dei yumi save winim.”

Sam saentis we oli stadi long bisnes ya mo long ol sik we ol olfala oli kasem, oli faenem sam niufala save we oli kolem long Inglis se epigenetics. ?Wanem mining blong tok ya?

I gat ol smosmol samting we oli kolem ol sel, we oli mekemap bodi blong yumi. Insaed long wan sel, i gat ol smosmol samting bakegen we oli kolem ol gene. Narafala nem blong olgeta gene long wan sel, hemia DNA (deoxyribonucleic acid). Insaed long DNA i gat ol save we i blong givhan long sel blong i mekem wan niufala sel. Be naoia ol saentis oli faenem sam narafala samting we oli stap wok insaed long ol sel, mo oli putum nem blong olgeta se epigenome. Tok ya i min se ‘antap long ol gene.’ Ale, epigenetics, hemia stadi we ol saentis oli mekem long epigenome mo wok blong olgeta.

Taem ol saentis oli luk epigenome long strong glas, hem i no luk sem mak olsem DNA. DNA i olsem wan lada we i tantanem. Epigenome, hemia ol kemikol we oli makem DNA long sam ples, olsem ol smosmol iaring we oli hang long DNA. ?Wanem wok blong epigenome? Hem i olsem bos blong wan kampani, we i talem long ol wokman wanem we oli mas mekem. Epigenome i talem long ol gene olsem wanem blong yusum ol save we i stap insaed long DNA. Hem i talem long sam gene se oli mas wok, mo i blokem sam narafala gene oli no moa wok. Hemia i dipen long samting we sel i nidim, mo ol samting we oli gat paoa long bodi, olsem weta, kakae, wari, mo ol doti long bodi. Ol niufala save ya we ol saentis oli jes faenemaot, i jenisim tingting blong olgeta. Naoia oli ting se yumi kasem ol defdefren kaen sik mo yumi kam olfala, taem epigenome i no moa mekem gud wok blong hem.

Nessa Carey we hem i stadi long epigenome, i talem se: “Mifala i faenemaot se taem man i kasem ol sik olsem kansa, mo soa long ol joen long bodi, mo sik long tingting, maet hemia from we epigenome i no moa wok gud. Mo man i kam olfala from sem risen ya.” Taswe taem ol saentis oli stadi moa, maet oli faenemaot ol meresin mo tritmen we oli save mekem bodi i stap strong, mo i faetem ol sik olsem kansa. Nao laef blong man bambae i kam longfala moa. Be oli no save rod yet blong winim trabol ya. Nessa i talem se: “Mifala i stap givim sem advaes yet [blong laef longtaem], se “yu mas kakae ol kakae blong garen,” mo “yu mas wokbaot plante.”

Yes, ol man oli traehad blong mekem laef blong olgeta i longfala moa. ?From wanem? ?Wanem i mekem se yumi wantem laef olwe? Wan niuspepa blong Inglan (The Times) i talem se: “Olgeta man long wol oli wantem trikim ded. Taswe oli bilif long sol we i no save ded, mo laef bakegen, mo laef i gohed long narafala ples, mo bodi i jenis i kam narafala samting. ?From wanem i olsem?” Sipos yumi faenem ansa blong kwestin ya, bambae yumi save from wanem yumi kam olfala.

Plante taosen yia finis, ol man oli stap tingbaot kwestin ya. ?Olsem wanem? ?I gat wan gudfala ansa long kwestin ya? ?From wanem God i mekem bodi blong yumi we i naf blong laef olwe, be yumi ded hareap? Plante  milian man oli faenem ansa blong ol kwestin ya. ?Oli faenem olsem wanem? Ol gudfala save we i stap long Baebol i givim ansa.

Fas haf blong Baebol i eksplenem se man i defren long anamol. Jenesis 1:27 i talem se God i mekem man blong i tekem fasin blong hem. ?Tok ya i minim wanem? Hemia i min se God i mekem yumi we yumi naf blong lavem narafala, mo blong mekem stret fasin, mo blong soemaot waes. Mo from we God i laef olwe, hem i putum wan tingting long yumi we yumi tu yumi wantem laef olwe. Prija 3:11 i talem se, God i “putum long tingting mo hat blong man, se hem i wantem laef gogo i no save finis.”—The Amplified Bible.

Taem yumi tingbaot sam haf blong bodi blong yumi, yumi luksave se God i wantem we yumi laef olwe. Yu traem tingbaot bren blong yumi. Bren, hem i naf blong kasem fulap save mo holem i stap. Wan buk (The Encyclopedia of the Brain and Brain Disorders) i talem se man i save fulumap save long bren blong hem gogo “i no save finis.” ?From wanem Jehova i mekem bren i bigwan olsem, be long laef blong yumi, yumi fulumap smol save nomo long hem? Yes, i gat plante samting long bodi blong yumi we i soemaot se God i wantem we yumi laef olwe. Sipos i olsem, ?wanem i mekem se yumi kam olfala, mo yumi harem nogud gogo yumi ded?

Fas man mo woman we God i mekem, bodi blong tufala i stret gud olgeta. Tufala i save jusum rod we tufala i wantem folem. Sore tumas, tufala i jusum rod we i nogud nao tufala i agensem God. * (Jenesis 2:16, 17; 3:6-11) Afta we tufala i mekem sin ya, tufala i sem bigwan. Bodi blong tufala i no moa stret gud. Ale, sloslo, bodi blong tufala i godaon gogo tufala i ded. Fas Korin 15:56 i talem se: “Ded i kasem paoa blong hem blong spolem yumi long sin.”

Adam mo Iv tufala i pasem sin i go long evri pikinini blong tufala. Taswe i isi blong yumi evriwan i mekem samting we i no stret. Rom 5:12 i talem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”

Ale, ?ol samting we yumi tokbaot finis i soemaot wanem? Ol saentis oli no save wokem rod blong yumi laef olwe. God nomo i save tekemaot sin mo ol trabol we sin i mekem long yumi. ?Olsem wanem? ?Bambae hem i mekem olsem? !Baebol i talem se yes!

God i mekem wan bigfala samting finis blong tekemaot sin mo ded. Hem i sanem Jisas Kraes i kam long wol ya, blong i ded from yumi. ?Ded blong Jisas i save givhan long yumi olsem wanem? Taem Jisas i bon, hem i no gat sin long bodi blong hem, taswe “hem i no mekem wan samting nogud.” (1 Pita 2:22) From samting ya, i stret nomo we hem i laef olwe wetem wan bodi we i stret olgeta. ?Be wanem i hapen long bodi mo laef blong hem we i stret olgeta? Hem i lego laef ya blong “pem rod blong plante man oli go fri.” (Matiu 20:28) I no longtaem bambae yumi kasem blesing fulwan from ded blong hem. ?Wanem blesing? Yu traem ridim ol vas ya.

• “God i lavem tumas ol man long wol, nao hem i givim mi, mi stret Pikinini blong hem, . . . blong olgeta man we oli bilif long mi bambae oli no save lus, oli gat laef we i no save finis.”—Jon 3:16.

• “Hae God . . . bambae i mekem we ded bambae i go lus olgeta. Bambae hem i ravemaot wota blong ae blong yufala.”—Aesea 25:8.

• “Laswan blong ol enemi ya we God bambae i winim olgeta, hemia ded.”—1 Korin 15:26.

• “God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded.”—Revelesen 21:3, 4.

Ale, ?yu yu save laef hamas yia? Baebol i talem klia se: Ol man oli gat janis blong laef gogo i no save finis. Samting ya bambae i hapen afta we God i finisim ol rabis fasin long wol ya. (Ol Sam 37:28, 29) Jisas i putum tingting blong hem i stap strong long promes ya. Taswe hem i talem long wan man we i hang long pos klosap long hem se: “Bambae yu stap wetem mi long Paradaes.”—Luk 23:43.

Tingting we yumi gat se yumi wantem laef olwe, i stret nomo. God i mekem yumi olsem. Mo bambae hem i mekem samting ya we yumi wantem i kamtru. (Ol Sam 145:16) Be yumi tu yumi gat wok blong mekem. Wan samting, se yumi mas mekem bilif blong yumi i kam strong moa. Hibrus 11:6 i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” Bilif ya i no giaman. Hem i stanap long stret save blong Baebol we yumi stadi long hem. (Hibrus 11:1) Sipos yu yu wantem kasem bilif olsem, yu save storian wetem ol Witnes blong Jehova long ples blong yu. Sipos no, yu save lukluk long Intenet long www.isa4310.com.