?From wanem man mo woman we tufala i promes blong lavem tufala olwe, tufala i no moa toktok long tufala blong plante aoa, no plante dei? Maet tufala i ting se sipos tufala i mekem olsem, bambae tufala i stop blong faet. Be defren olgeta, trabol blong tufala bambae i no finis mo bambae tufala i harem nogud long mared blong tufala.

Hem i wantem givimbak. Samfala oli wantem givimbak long man no woman blong olgeta, ale oli no moa toktok wetem hem. Yu traem tingbaot wan man we i stap mekem ol plan blong wiken, be i no talemaot long woman blong hem. Taem woman blong hem i faenemaot samting ya, hem i kam kros, nao hem i talem long man blong hem se: ‘Yu stap tingbaot yu wan nomo.’ Ale man blong hem i girap, i talem long hem se: ‘Yu stap harem nogud long ol smosmol samting nomo.’ Woman ya i kros, i aot mo i no moa wantem toktok long man blong hem. I olsem we hem i stap talem long man blong hem se: “Mi mas givimbak long yu from yu spolem mi.”

Hem i wantem bos long narafala. Samfala oli wantem kasem samting we olgeta nomo oli wantem, ale oli no moa toktok long man no woman blong olgeta. Yu traem tingbaot wan man mo woman blong hem, we tufala i stap mekem plan blong go long wan narafala ples. Woman i talem se hem i wantem we papa mo mama blong hem tu oli kam wetem tufala. Ale, man blong hem i talem se: “Mi mi mared wetem yu, i no wetem papa mama blong yu.” Nao hem i no moa toktok wetem woman blong hem. Hem i mekem olsem kasem taem we woman blong hem i folem tingting blong hem, mo i agri se bambae tufala i no moa tekem papa mo mama blong hem wetem tufala.

Sipos man mo woman tufala i rao, nao wan long tufala i aot i go samples blong mekem kros blong hem i godaon, samting ya i no rong. Fasin olsem i save givhan long tufala. Baebol i talem se i gat “taem blong man i stap kwaet.” (Prija 3:7) Be sipos tufala i no moa toktok long tufala from we wan long tufala i wantem givimbak long narawan, no i wantem bos long narawan, samting ya bambae i mekem se trabol i no finis. Mo tu, samting ya i save mekem se tufala i no moa gat respek long tufala. ?Yu save mekem wanem blong samting ya i no hapen long yu?

Yu mas luksave se fasin ya blong no moa toktok wetem man no woman blong yu, hem i no rod blong stretem ol problem blong yutufala. Defren olgeta, hem i save pulum yu blong yu kam kros, nao yu wantem givimbak long hem, no yu fosem hem blong i folem tingting blong yu. ?Be olsem wanem? ?Hemia nao samting we yu wantem mekem long man no woman we yu promes blong lavem hem? I gat sam gudfala rod we yu save folem blong stretem ol trabol long mared.

Yu mas luksave samting. Baebol i talem se man we i stap lavem man, hem i “no save kros kwik.” (1 Korin 13:4, 5) Yes, yu mas stap kwaet sipos man no woman blong yu i kros, nao i talem ol tok olsem se: “Yu yu neva lesin” no “Yu yu let oltaem.” Yu mas traem luksave from wanem hem i toktok olsem. Maet taem hem i talem se, “yu neva lesin,” hem i wantem minim se: “Mi harem olsem se yu no kasem save long samting we mi stap talem long yu.”—Rul blong Baebol: Ol Proveb 14:29.

Yu mas toktok kwaet. Sipos yutufala i no stop blong toktok strong taem yutufala i rao, bambae rao i gohed nomo. Be i gat wan samting we yu save mekem blong blokem rao. ?Wanem samting ya? Buk ya, Fighting for Your Marriage i talem se: “Wan gudfala rod we yu save folem blong mekem se yutufala i no moa rao, hemia se yu mekem voes blong yu i godaon, mo yu soemaot se yu agri wetem tingting blong man no woman blong yu. Plante taem, samting ya nomo i save mekem se yutufala i joen gud bakegen.”—Rul blong Baebol: Ol Proveb 26:20.

Yu mas tingbaot se i no yu wan nomo, be yutufala tu. Baebol i talem se: “I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu we oli stap raonabaot long yumi.” (1 Korin 10:24) Yes, yu mas tingbaot man no woman blong yu olsem wan fren blong yu. Yutufala i mas wok gud tugeta blong stretem ol problem long mared, be i no blong yutufala i spolem yutufala. Taem yutufala i mekem olsem, bambae yutufala i no kam kros, yutufala i no rao, mo bambae yutufala i toktok gud long yutufala.—Rul blong Baebol: Prija 7:9.

Baebol i agensem fasin ya we man mo woman tufala i no moa toktok long tufala. Hem i talem se: “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.” (Efesas 5:33) From samting ya, i gud we yutufala i promes se bambae yutufala i no mekem fasin ya blong no moa toktok long yutufala.