“Man we i luk wan woman, nao i wantem hem tumas, i olsem we hem i slip wetem woman ya finis.”—Matiu 5:28.

?FROM WANEM I IMPOTEN LONG YU?

Tede i isi nomo blong ol man oli lukluk ol rabis pija blong man wetem woman, mo plante man oli stap lukluk ol pija olsem. Sipos yu wantem se God i glad long yu mo yu glad long laef blong yu, yu mas save tingting blong God long saed blong ol rabis pija.

?BAEBOL I TALEM WANEM?

Baebol i no tokbaot ol rabis pija stret. Be plante toktok long Baebol oli agensem fasin ya blong lukluk ol rabis pija.

Yu traem tingbaot. Baebol i talem stret se taem wan man we i mared i gohed blong “luk wan woman” we i no woman blong hem, mo i wantem tumas blong slip wetem woman ya, samting ya i save pulum hem blong i slip wetem woman ya. Advaes we i stap long tok ya blong Baebol, i stret long evri man “we i luk” ol rabis pija mo i wantem tumas blong mekem nogud fasin, nomata se oli mared no oli no mared. I klia se God i no glad nating long ol fasin olsem.

“Yufala i mas kilimaot ol fasin ya blong yufala . . . Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting.”—Kolosi 3:5.

?OL MAN OLI TALEM WANEM?

Sam man blong mekem stadi oli ting se taem man i lukluk ol rabis pija, samting ya i no pulum hem blong i mekem nogud fasin blong man wetem woman. ?I tru se fasin ya blong lukluk ol rabis pija i no stret?

?BAEBOL I TALEM WANEM?

Baebol i talem se ol man oli no mas talem “ol tok plei we i nogud,” from we i no stret nating mo God i agensem fasin ya. (Efesas 5:3, 4) Sipos i no stret blong talem ol tok we i nogud, hemia i min se i no stret tu blong lukluk ol fasin we oli nogud. Plante taem, ol man long ol rabis pija ya oli no aktem be oli rili mekem rabis fasin blong man wetem woman, no man wetem man bakegen, no sam narafala rabis fasin olsem. Taem man i wantem tumas blong lukluk ol rabis pija olsem, hemia i nogud we i nogud long tingting blong God, i bitim fasin ya we man i talem ol tok plei we i nogud.

Ol man blong stadi oli stap mekem plante toktok blong faenemaot sipos i tru se ol man oli stap mekem nogud fasin from we oli stap lukluk ol rabis pija. Be Baebol i soemaot se God i no laekem nating fasin blong lukluk ol rabis pija. Samting ya i spolem fasin fren we man i gat wetem God. Baebol i tok strong long yumi se: ‘Yufala i mas kilimaot ol fasin blong yufala, we oli blong wol ya nomo. Hemia ol fasin olsem, man i stap mekem nogud wetem woman mo man i stap wantem woman tumas.’ (Kolosi 3:5) Ol man we oli stap lukluk ol rabis pija oli no stap blokem bodi blong olgeta, be oli stap mekem bodi blong olgeta i wantem tumas ol rabis fasin. Hemia i olsem man we i stap putum moa wud blong mekem faea i laet bigwan.

“Yufala i mas lego ol rabis fasin, mo yufala i mas traehad blong folem stret fasin. . . . Fasin we i no stret, yufala i mas tanem baksaed long hem, be fasin we i stret, yufala i mas glad long hem, mo oltaem yufala i mas folem.”—Amos 5:14, 15.

?BAEBOL I TALEM WANEM?

Baebol i tokbaot ol man we fastaem oli mekem ol nogud fasin blong man wetem woman, oli man blong drong, mo oli man blong stil, be afta oli lego ol rabis fasin ya. (1 Korin 6:9-11) ?Wanem i givhan long olgeta blong oli lego ol fasin ya? Taem oli folem waes blong God we i stap long Baebol, oli tanem baksaed long fasin we i no stret.

Yumi save tanem baksaed long ol rabis pija, sipos yumi tingting gud long ol nogud frut we oli save kamaot from rabis fasin ya. Wan ripot we i kamaot i no longtaem long Yunivesiti blong Utah, i soemaot se sam long ol man we oli stap lukluk ol rabis pija, “oli no hapi long laef blong olgeta, oli no laekem joen wetem ol narafala, oli no save joen gud wetem man no woman blong olgeta,” mo oli kasem sam narafala nogud samting bakegen. Mo tu, olsem yumi talem finis, God i no laekem nating fasin ya blong lukluk ol rabis pija. Taswe ol man we oli mekem fasin ya oli kasem wan narafala trabol. Oli no save fren wetem God.

Baebol i save givhan long yumi blong yumi glad long ol fasin we i stret. Moa we yumi ridim Baebol, moa we bambae yumi laekem ol advaes blong hem long saed blong stret fasin. Taem yumi laekem stret fasin, bambae yumi agensem ol rabis pija mo yumi gat sem tingting olsem man blong raetem Sam, we i talem se: “Bambae mi no save lukluk wan samting we i nogud.”—Ol Sam 101:3, King James Version.