Baebol​—Ol Profet Tok Blong Hem Oli Kamtru, Haf 3

“Mifala i Faenem Mesaea Finis”

I gat eit haf we bambae oli kamaot long ol “Wekap!” blong tokbaot ol profet tok blong Baebol. Ol haf ya bambae oli ansa long ol kwestin ya: ?Ol profet tok ya oli kamaot long waes blong man nomo? ?Wanem samting i pruvum se oli kamaot long God? Mifala i askem long yu blong yu lukluk ol pruf ya.

 PLANTE handred yia bifo we Jisas i bon, ol profet long Isrel oli talem plante samting we bambae oli kamtru long laef blong Mesaea. Long lanwis Hibru, tok ya Mesaea i minim “Man we God i Jusumaot.” Ol profet ya oli talemaot plante smosmol save long saed blong Mesaea ya se bambae hem i kamaot long laen blong hu, bambae hem i bon wea, bambae hem i kamtru wetaem, mo wanem bambae i hapen long laef blong hem.

Ol fas Kristin oli bilif se ol tok ya we ol profet oli bin talemaot, oli kamtru evriwan long Jisas. Ol Kristin ya oli gat sem tingting we Andru i gat. Andru, we i wan disaepol blong Jisas, i talem long brata blong hem, Saemon, se: “Ei, mifala i faenem Mesaea finis.” (Jon 1:40, 41) ?Olsem wanem? ?Tingting blong olgeta i stret? I gat plante profet tok long saed blong Mesaea, be bambae yumi tokbaot fo nomo. Bambae yumi luk ol pruf we oli soemaot se fofala profet tok ya oli kamtru long Jisas.

Fas profet tok: “Bambae hem i wan man we i kamaot biaen long King Deved, mo bambae hem i rul long ples blong king ya.”—Aesea 9:7.

?Tok ya i kamtru olsem wanem? Fas toktok long buk blong Matiu, i talem se: “Nem blong ol olfala bubu blong Jisas Kraes, i stat bifo i kam, i olsem. Jisas i laen blong Deved, we Deved i laen blong Ebraham.” Matiu i raetem nem blong olgeta olfala bubu blong Jisas, i stat long Ebraham i kam kasem Deved mo i kam kasem Jisas. Disaepol ya Luk, hem tu i raetem nem blong olgeta ya.—Matiu 1:1-16; Luk 3:23-38.

Ol samting blong bifo we oli faenemaot:

● Wan man Jiu we nem blong hem Josephus, hem i raetem stori blong ol samting we oli hapen bifo. Man ya i talem se ol man Isrel oli gat ol buk i stap, we long ol buk ya oli raetem nem blong ol man long laen blong olgeta. Oli stap putum gud ol buk ya long wan ples we eni man i save kam ridim. Sore tumas we long yia 70 K.T. a olgeta buk ya evriwan oli lus taem ol man Rom oli spolem Jerusalem. Be bifo we Jerusalem i lus, plante man oli harem nius ya finis se Jisas i wan pikinini long laen blong Deved. (Matiu 9:27; 20:30; 21:9) Sipos nius ya i giaman nomo, plante man long taem ya oli save tok agensem samting ya no maet oli save givim pruf tu blong soemaot se nius ya i giaman. Be i no gat man we i bin traem blong agensem tok ya se Jisas i laen blong Deved.

Namba tu profet tok: “Yufala long vilej ya Betlehem, long distrik ya Efrata long Juda, vilej ya blong yufala i wan smol vilej long ol narafala vilej we oli stap raonabaot long yufala, be mi bambae mi mekem we wan pikinini bambae i kamaot long yufala, we hem bambae i rul long ol laen blong Isrel.”—Maeka 5:2.

?Tok ya i kamtru olsem wanem? Jisas i bon long Betlehem. Long taem ya, Sisa Ogastas i mekem wan loa se ol man blong hem oli mas mekem wan sensas blong kaontem olgeta man we oli stap aninit long paoa blong hem. Ale, Josef, we i papa blong Jisas, i mas aot long Nasaret blong “go long wan taon long Judia, nem blong hem Betlehem. Hemia i ples we  King Deved i bon long hem bifo, mo Josef i gobak long ples ya, from we hem i wan laen blong King Deved ya. Hem wetem Meri, tufala i go blong olgeta i raetemdaon nem blong tufala.” Taem tufala i stap long ples ya, Meri i “bonem fasbon pikinini blong hem,” hemia Jisas.—Luk 2:1-7.

Ol samting blong bifo we oli faenemaot:

● Ol man blong digim graon blong faenem ol samting blong bifo, oli faenemaot se ol man Rom oli stap mekem plante sensas long Medel Is. Ol sensas ya i givhan long wok blong olgeta blong tekem mane blong takis. Mo tu, i givhan long olgeta blong faenem man we i gat yia we inaf blong joen long ami. Ol man blong digim graon oli faenem hanraet blong wan haeman blong Rom we i stap long Ijip long yia 104 K.T. Tede, hanraet ya i stap long wan bigfala laebri long Inglan, nem blong hem British Library. Hanraet ya i talem se: “I no longtaem ol man bambae oli kam long ol haos wanwan blong mekem sensas. Taswe, ol man we oli no stap long ples [distrik] blong olgeta oli mas gobak long hom blong olgeta naoia, nomata wanem risen we i mekem se oli go stap long narafala ples. Ol man ya oli mas gobak from sensas ya, mo tu oli mas gobak blong wok long graon blong olgeta.”

● Taem Jisas i bon, i gat tu taon long Isrel we nem blong tufala Betlehem. I gat wan long not blong Isrel, klosap long Nasaret, mo narawan i stap klosap long Jerusalem, long Juda. Betlehem we i stap klosap long Jerusalem, bifo hem i karem nem ya se Efrat (no Efrata). (Jenesis 35:19) Jisas i bon long taon ya, stret olsem we Maeka i raetem samwe long 800 yia bifo.

Namba tri profet tok: “I stat long taem ya we bambae toktok ya i kamtru blong oli bildim Jerusalem bakegen, go kasem taem we Mesaea we God i jusumaot bambae i kam, bambae i gat seven wik mo sikisti tu wik i pas.”—Daniel 9:25.

?Tok ya i kamtru olsem wanem?: Profet tok ya long saed blong ol 69 wik i olsem 69 grup blong ol yia, we insaed long ol grup ya wanwan i gat 7 yia. Ale taem yumi ademap olgeta yia ya, yumi kasem 483 yia evriwan. Wok blong bildim bakegen Jerusalem i stat long yia 455 B.K.T. Stat long yia ya i go kasem taem we Mesaea i kamtru, profet tok blong Daniel i talem se 483 yia (we i olsem 69 wik) bambae i pas. Ol 483 yia ya oli finis stret long yia 29 K.T. Long yia ya nao, Jisas i baptaes long wota mo tabu spirit blong God i makemaot hem, hem i kam Mesaea, hemia Man we God i Jusumaot. b—Luk 3:21, 22.

Ol samting blong bifo we oli faenemaot:

● Smoltaem bifo we Mesaea i kamtru, ol man oli stap wet long “Mesaea ya, we God i promes bifo finis blong hem i kam.” (Luk 3:15) Wan man Jiu we nem blong hem Abba Hillel Silver, i raetem wan buk (A History of Messianic Speculation in Israel) blong tokbaot laef blong ol man Isrel bifo we Jerusalem i lus. Hem i talem se long taem ya, “plante man oli wantem tumas we Mesaea i kam.” Oli ting se “Mesaea i mas kamtru sam yia afta long yia 25 K.T.,” from we hemia tingting blong bighaf blong ol man long taem ya.

Namba fo profet tok: “Oli putum hem long beregraon wetem ol man nogud, oli berem hem wetem ol rijman.”—Aesea 53:9.

?Tok ya i kamtru olsem wanem?: Taem oli nilim Jisas long pos, oli nilim tu narafala man tu long pos olsem hem. Wan long raetsaed mo wan long lefsaed blong hem. Tufala ya i man nogud. Mo tu, oli putum bodi blong Jisas long wan niufala hol blong ston we ol man oli jes katemrere. Hol blong ston ya i blong wan rijman we nem blong hem Josef. Hem i man Aramatia mo hem tu i bilif long Jisas.—Matiu 27:38, 57-60; Jon 19:38.

Ol samting blong bifo we oli faenemaot:

● Plante man we oli no Kristin, oli raetem ol samting we oli hapen long taem blong olgeta bifo. Long ol man ya i gat, Josephus, wan man Jiu, mo Tacitus wan man Rom. Olgeta ya oli tokbaot Jisas, mo oli talem se ol man Rom oli kilim hem i ded olsem wan man blong brekem loa.

● Taem ol man oli digim graon long Palestaen blong faenem ol samting blong bifo, oli faenem ol hol long ston we ol man oli bin katem blong putum dedman long hem. Ol rijman, olsem Josef blong Aramatia, oli naf blong pem ol man blong oli katemrere ol hol long ston blong putum ol dedman long hem.

I gat plante profet tok we oli talemaot Mesaea, be yumi tokbaot fo nomo we oli kamtru long laef blong Jisas. Ol profet tok ya oli talem evri samting i klia nomo, taswe i no gat man i save talem se oli kamtru long narafala man. Olgeta profet tok ya oli kamtru stret long Jisas nomo. Samting ya i mekem bilif blong yumi i strong se ol profet tok ya oli kamaot long God. I gat sam narafala profet tok we oli talemaot ol blesing we Mesaea bambae i mekem long ol man blong God. Yumi bilif strong tu, se bambae oli kamtru.

Long wan narafala stori long Wekap! ya, bambae yumi ansa long kwestin ya se: Sipos Jisas i Mesaea, ?from wanem hem i letem ol man oli mekem i nogud long hem mo oli kilim hem i ded?

[Ol futnot]

[Chart/Tok blong pija long pej 10]

(Lukluk niuspepa)

OL YIA BLONG FOFALA PROFET TOK WE OLI TALEMAOT MESAEA

1 Mesaea bambae i kamaot long laen blong King Deved

1070 B.K.T.

Deved i kam king blong Isrel

607 B.K.T.

Ol man Babilon oli spolem Jerusalem

455 B.K.T.

Toktok i goaot blong oli stanemap Jerusalem bakegen

2 Mesaea bambae i bon long Betlehem long Juda

2 B.K.T.

Jisas i bon long Betlehem long Juda, hem i laen blong Deved

3 Mesaea bambae i kam 483 yia afta we toktok ya i goaot blong oli stanemap Jerusalem bakegen

29 K.T.

Jisas i baptaes mo tabu spirit i makemaot hem, hem i kam Mesaea

4 Mesaea bambae i ded wetem ol man nogud mo bambae oli berem hem wetem ol rijman

33 K.T.

Jisas i ded wetem ol man nogud mo oli berem hem wetem ol rijman