Plante man oli wari taem oli luk se ol man oli stap spolem wol mo ol laef samting long hem. Sam man we oli gat bigfala save long envaeronmen, oli talem se i neva gat wan taem olsem naoia we ol man oli stap spolem ol laef samting, mo oli stap mekem se plante kaen laef samting oli lus olgeta.

 ?Olsem wanem? ?Ol man bambae oli spolem wol, o bambae oli lanem blong lukaot gud long ol samting we God i krietem?

 Plante man we oli gat bigfala save, oli bilif se ol man oli naf blong protektem wol mo lukaot gud long ol samting we God i krietem. Sam long olgeta oli talem se, blong man i save mekem olsem, oli mas jenisim plante samting, mo ol jenis ya oli mas kamaot evriwan wantaem. Sam long ol jenis ya, hemia:

•   Lanem blong lukaot gud long graon, bus, ol swam, mo solwota.

•   Jenisim ol fasin blong wokem garen, mo ol samting we yumi yusum blong wokem lektrik.

•   Jenisim fasin blong wokem mo seraotem kakae, we ol man oli kakae naf mo oli no westem, oli kakae plante vejtebol, mo oli no kakae tumas mit mo fis.

•   Luksave se i no nidim plante mane mo plante samting, blong gat wan gudfala laef.

 ?Wanem tingting blong yu? ?Yu ting se ol gavman, ol bisnesman, mo ol man wanwan oli save kam gud moa blong wok tugeta? ?O yu ting se oli no save mekem olsem from we sam man oli griri, oli tingbaot olgeta nomo, mo oli no kea long wanem we bambae i hapen long fiuja?—2 Timoti 3:1-5.

 Baebol i promes se bambae wol ya i gat wan gudfala fiuja. Hem i eksplenem from wanem ol man oli no naf blong sevem wol ya, mo i tokbaot bigfala jenis we i mas hapen. Hem i talem tu olsem wanem jenis ya bambae i kamaot.

 ?From wanem ol man oli no save sevem wol ya? Jehova a God i wokem wol ya, mo hem i givim wok long ol man blong oli lukaot long hem. (Jenesis 1:28; 2:15) Sipos oli letem Krieta blong olgeta i lidim olgeta mo oli obei long hem, bambae oli naf blong mekem wok ya. (Ol Proveb 20:24) Be oli folem prapa tingting blong olgeta nomo mo oli no wantem obei long Jehova. (Prija 7:29) Taswe ol man oli no naf blong lukaot gud long wol ya. Nating se oli traehad, be oli save givhan smol nomo.—Ol Proveb 21:30; Jeremaea 10:23.

 Jenis we i mas hapen. God i gat plan blong spolem ol man we oli stap spolem wol. (Revelesen 11:18) Bambae hem i no stretem ol gavman mo ol man we oli stap spolem wol, be bambae hem i tekemaot olgeta mo putum ol narafala long ples blong olgeta. (Revelesen 21:1) From samting ya, Jehova i talem se: “!Yu luk! Mi mi stap mekem olgeta samting oli kam niuwan.”—Revelesen 21:5.

 ?Olsem wanem jenis ya bambae i hapen? Jehova bambae i tekemaot ol gavman blong wol ya mo i putum wan gavman blong heven long ples blong olgeta, hemia Kingdom blong God. Gavman ya we Jisas Kraes i lida blong hem, bambae i rulum wol.—Daniel 2:44; Matiu 6:10.

 Kingdom blong God bambae i tijim ol man blong oli folem ol stret rul blong God long laef blong olgeta. Taem ol man oli luksave Krieta blong olgeta mo folem ol tok blong hem, bambae oli naf blong lukaot gud long ol samting we hem i krietem. (Aesea 11:9) Baebol i tokbaot olsem wanem gavman blong God bambae i mekem se ol man oli save gat gudfala laef, we oli no spolem wol ya. Hemia bambae i mekem se:

•   I gat naf kakae blong evri man.—Ol Sam 72:16.

•   Ol samting we God i krietem be man i spolem, bambae oli kamgud bakegen.—Aesea 35:1, 2, 6, 7.

•   Ol man bambae oli lukaot gud long ol animol.—Aesea 11:6-8; Hosea 2:18.

•   Bambae i no moa gat ol disasta we oli spolem envaeronmen.—Mak 4:37-41.

 Yumi save ekspektem se Kingdom blong God bambae i mekem ol jenis ya i no longtaem. Blong save moa long saed ya, ridim haf ya “?Wetaem Kingdom Blong God Bambae i Rulum Wol?”