Plante gavman raon long wol oli putum rul se i mas gat sosol distensing mo oli blokem ol man blong oli no joen wanples. Ol Witnes blong Jehova oli gat strong tingting blong obei long gavman, be long semtaem oli gohed blong mekem wosip long wan rod we i sef. Blong mekem olsem, ol kongregesen oli yusum ol video konfrens app, olsem Zoom, blong mekem ol miting.

 Blong yumi save gat ol miting blong yumi evri wik, Hed Kampani i agri blong yusum ol presen mane blong yumi blong pem ol Zoom akaon blong ol kongregesen. Hemia i givhan bigwan long sam kongregesen we oli no naf blong pem wan laesens blong video konfrens we praes blong hem i samwe long 1,500-2,000vt o moa. Plante taem ol kongregesen ya oli stap yusum ol fri app we smol man nomo i save konek long hem mo oli no sef. Be naoia, olgeta kongregesen we oli gat Zoom laesens we oganaesesen i pem, oli naf blong mekem ol miting we plante man oli save konek wantaem mo i sef moa. Kam kasem naoia, i gat moa long 65,000 kongregesen long bitim 170 kantri we oli stap yusum ol akaon ya.

 Long Indonesia, Kongregesen blong Kairagi, we i stap long Manado, long Not blong Sulawesi, oli no moa yusum wan fri video konfrens app, be oli stat blong yusum Zoom laesens we oganaesesen i pem. Brata Hadi Santoso i talem se: “Sam brata sista we oli no savegud olsem wanem blong yusum ol elektronik divaes, naoia oli glad blong joen long ol miting from we oli no nid blong login plante taem long taem blong miting.”

 Lester Jijón, Jr., we i wan elda long Kongregesen blong Guayacanes Oeste long Guayaquil, Ekwado, i talem se: “From we plante brata sista oli no gat naf mane, sam kongregesen oli no naf blong pem wan Zoom laesens, blong ful kongregesen i save joen long ol miting. Be naoia, mifala i glad from we oganaesesen i pem wan Zoom laesens, we plante man oli save konek wantaem mo mifala save invaetem plante narafala tu blong oli joen, we mifala i no nid blong wari long namba blong man.”

 Johnson Mwanza, wan elda long Kongregesen blong Not Ngwerere long Lusaka, Sambia, i talem se: “Plante taem ol brata sista oli stap talem se, ‘arenjmen we oganaesesen i mekem blong pem Zoom laesens, i mekem mifala i frengud moa wetem ol brata sista, be tu i mekem mifala i haremsave se Jehova i lavem mifala mo i kea long mifala.’”

 Ol mane we oganaesesen i yusum blong pem ol Zoom laesens i kamaot long badjet blong disasta rilif. Ol mane ya, oli ol presen mane we ol brata sista oli givim blong sapotem wok long fulwol. Plante long ol presen mane ya, oli givim tru long websaet ya donate.isa4310.com. Tangkiu tumas from gladhat blong yufala blong givim ol presen mane ya, we oli givhan tu long ol narafala rilif wok raon long wol.—2 Korin 8:14.