God i waes moa long yumi. Hem i olsem wan Papa we i lavem ol pikinini blong hem. Hem i no wantem we yumi folem prapa tingting blong yumi. (Jeremaea 10:23) Olsem ol smosmol pikinini we oli nidim ol tok blong papa mama blong lidim olgeta, yumi tu yumi nidim God blong i lidim yumi. (Aesea 48:​17, 18) Ol loa blong Baebol oli olsem presen we God i givim blong lidim yumi.​—Ridim 2 Timoti 3:⁠16.

 Ol loa blong Jehova oli tijim yumi blong folem rod we i beswan, mo oli soemaot wanem we yumi mas mekem blong kasem laef we i no save finis. I stret nomo we Jehova i lidim yumi, from we hem nao i mekem yumi. Yumi mas glad blong ­folem ol tok blong hem.​—Ridim Ol Sam 19:​7, 11; Revelesen 4:⁠11.

 I gat sam loa long Baebol we oli talem stret long yumi wanem we yumi mas mekem. (Dutronome 22:⁠8) Be sam narafala samting i no gat loa blong hem. I gat sam stamba trutok long Baebol, we yumi mas tingting gud long olgeta blong luksave rod we i stret blong folem. (Ol Proveb 2:​10-12) Traem tingbaot: Baebol i talem se laef i wan presen we God i givim. Stamba trutok ya i save givhan long yumi blong yumi lukaot gud long laef blong yumi mo laef blong narafala. Yumi mekem olsem long wok, mo long haos, mo taem yumi wokbaot i go samples.​—Ridim Ol Sam 100:⁠3.

 Jisas i talem se i gat tu loa we tufala i impoten moa i bitim ol narafala loa. Faswan i soemaot se yumi laef blong kasem save long God, mo blong lavem hem, mo blong mekem samting we hem i wantem. Yumi mas tingbaot loa ya taem yumi mekem ol desisen blong yumi. (Ol Proveb 3:⁠6) Olgeta we oli folem loa ya long laef blong olgeta oli kam fren blong God, mo oli glad tumas, mo bambae oli kasem laef we i no save finis.​—Ridim Matiu 22:​36-38.

 Namba tu loa i save lidim yumi blong yumi gat pis wetem ol narafala. (1 Korin 13:​4-7) Blong obei long loa ya, yumi mas folem fasin we God i mekem long ol man.​—Ridim Matiu 7:12; 22:​39, 40.

 Ol loa blong God oli tijim ol famle se oli mas joengud mo oli mas lavlavem olgeta. (Kolosi 3:​12-14) I gat wan stamba trutok long Baebol tu we i givhan long famle blong i stap gud. Baebol i talem se taem man mo woman i mared, tufala i mas stap tugeta olwe.​—Ridim Jenesis 2:⁠24.

 Taem yumi folem ol tijing blong Baebol, oli givhan long yumi long tu narafala rod bakegen: Yumi save kasem ol samting we yumi nidim long laef, mo yumi gat pis long tingting blong yumi. Plante masta oli laekem ol wokman we oli no giaman, oli no stil, mo oli wok had. (Ol Proveb 10:​4, 26; Hibrus 13:18) Baebol i tijim yumi tu se yumi mas glad long smol samting we yumi gat. Yumi no mas tingting tumas long ol samting blong laef, be yumi mas tingbaot moa blong fren gud wetem God.​—Ridim Matiu 6:​24, 25, 33; 1 Timoti 6:​8-10.

 Taem yumi folem ol loa blong God, yumi lukaot gud long bodi blong yumi. (Ol Proveb 14:30; 22:​24, 25) Traem tingbaot loa ya se yumi no mas dring gogo yumi fuldrong. Sipos yumi obei long loa ya, yumi blokem plante bigfala sik mo aksiden. (Ol Proveb 23:20) Jehova i no talem se yumi no mas dring nating, be hem i talem se yumi no mas dring bitim mak. (Ol Sam 104:15; 1 Korin 6:10) Ol loa blong God oli givhan long yumi blong yumi blokem ol nogud fasin. Be i no hemia nomo. Oli givhan long yumi blong yumi blokem ol nogud tingting tu. (Ol Sam 119:​97-100) Bigfala risen from wanem ol Kristin oli obei long ol loa ya, i no blong mekem i gud long olgeta nomo. Oli obei from we oli wantem ona long Jehova.​—Ridim Matiu 5:​14-16.