LESEN 24
Trutok Long Saed Blong Ol Enjel
Jehova i wantem se yumi save famle blong hem we i stap long heven. Hemia ol enjel we oli singaot olgeta se ol “pikinini blong God.” (Job 38:7) ?Baebol i talem wanem long saed blong ol enjel? ?Oli save mekem wanem long ol man? ?Evri enjel oli joen long famle blong Jehova?
1. ?Ol enjel oli olsem wanem?
Jehova i krietem ol enjel bifo we i mekem wol ya. Olgeta oli spirit mo oli laef long heven. (Hibru 1:14) I gat plante milian enjel mo wanwan long olgeta i gat prapa fasin blong hem. (Revelesen 5:11) Olgeta oli “stap mekem ol samting we [Jehova] i talem, mo [oli] stap obei long voes blong hem.” (Ol Sam 103:20) Long taem bifo, samtaem Jehova i yusum ol enjel blong oli karem mesej blong hem, o halpem mo sevem ol man blong hem. Tede, ol enjel oli lidim ol Kristin blong faenem ol man we oli wantem save God.
2. ?Hu ya Setan mo ol dimon blong hem?
Sam enjel oli no obei long Jehova. Faswan enjel we i rebel “oli singaot hem se Devel mo Setan, hem i stap lidim olgeta man long wol oli go krangke.” (Revelesen 12:9) Setan i wantem rulum ol narafala taswe hem i pulum Adam mo Iv blong oli rebel, biaen hem i pulum sam nara enjel blong oli mekem sem mak. Oli singaot ol enjel ya we oli rebel se ol dimon. Jehova i sakemaot olgeta long heven i kamdaon long wol mo bambae hem i distroem olgeta.—Ridim Revelesen 12:9, 12.
3. ?Olsem wanem Setan mo ol dimon oli traem lidim yumi i go krangke?
Setan mo ol dimon oli yusum wok blong rabis spirit blong trikim plante man. Eksampol, sam man oli go luk ol man blong ridim ol sta, talemaot fiuja, gat spesel paoa long tingting blong man, mo kleva. Sam narafala oli lukaotem tritmen we i joen wetem rabis spirit. Ol dimon oli trikim ol man blong bilif se oli save toktok wetem ol dedman. Be Jehova i givim woning se: “Yufala i no mas go luk ol man we oli stap toktok wetem ol dedman mo yufala i no mas go luk ol man we oli stap talemaot fiuja.” (Levitikas 19:31) Hem i givim woning ya blong protektem yumi long Setan mo ol dimon. Olgeta oli ol enemi blong God mo oli wantem spolem yumi.
DIGIM MOA
Faenemaot ol gudfala samting we ol enjel oli stap mekem, ol denja we i kamaot from wok blong rabis spirit, mo olsem wanem yumi save protektem yumi long Setan mo ol dimon.
4. Ol enjel oli halpem ol man blong save Jehova
Ol enjel oli no toktok stret long ol man. Be, oli lidim ol man blong God i go long ol man we oli wantem save God. Ridim Revelesen 14:6, 7, mo tokbaot ol kwestin ya:
-
?From wanem yumi nidim help blong ol enjel taem yumi prij?
-
Taem yu tingbaot se ol enjel oli save lidim yu yu go long man we i nidim God, ?hemia i enkarejem yu? ?From wanem?
5. Agensem wok blong rabis spirit
Setan mo ol dimon oli enemi blong Jehova. Mo oli enemi blong yumi tu. Ridim Luk 9:38-42, mo tokbaot kwestin ya:
-
?Ol dimon oli stap mekem wanem long ol man?
Yumi no wantem letem ol dimon oli kontrolem laef blong yumi. Ridim Dutronome 18:10-12, mo tokbaot ol kwestin ya:
-
?Olsem wanem ol dimon oli traem blong kontrolem yumi mo toktok wetem yumi? ?Wanem samting long ples blong yu we ol man oli stap mekem?
-
?Yu ting se i gud we Jehova i agensem wok blong rabis spirit? ?From wanem?
Plei VIDEO, mo tokbaot ol kwestin ya.
-
?Yu ting se braslet we gel blong Palesa i werem i save spolem hem? ?From wanem?
-
?Yu ting se Palesa i mas mekem wanem blong protektem hem long ol dimon?
Oltaem ol tru Kristin oli agensem ol dimon. Ridim Ol Wok 19:19 mo 1 Korin 10:21, mo tokbaot kwestin ya:
-
?From wanem i impoten blong distroem olgeta samting we i joen wetem wok blong rabis spirit?
6. Winim faet ya agensem Setan mo ol dimon
Setan i rulum ol dimon. Be akenjel ya Maekel i lidim ol gudfala enjel. Maekel i narafala nem blong Jisas. ?Maekel i strong olsem wanem? Ridim Revelesen 12:7-9, mo tokbaot ol kwestin ya:
-
?Hu i strong moa, Maekel wetem ol enjel o Setan mo ol dimon?
-
?Yu ting se ol man blong Jisas oli nid fraet long Setan mo ol dimon blong hem?
Yu save winim faet ya agensem Setan mo ol dimon blong hem. Ridim Jemes 4:7, mo tokbaot ol kwestin ya:
-
?Olsem wanem yu save protektem yu wan long Setan mo ol dimon?
SAM MAN OLI SE: “I no rong blong plei ol gem mo wajem ol muvi we oli joen wetem ol rabis spirit.”
-
?From wanem i denja blong gat tingting ya?
SAMARI
Ol gudfala enjel oli halpem yumi. Be Setan mo ol dimon oli enemi blong Jehova, mo oli yusum wok blong rabis spirit blong lidim ol man oli go krangke.
Tingtingbak
-
?Olsem wanem ol enjel oli halpem ol man blong oli save Jehova?
-
?Hu ya Setan mo ol dimon blong hem?
-
?From wanem yu mas stap longwe long wok blong ol rabis spirit?
FAENEMAOT
Faenemaot ol pruf we i soemaot se Jisas i akenjel ya Maekel.
Faenemaot ol pruf se Devel i no ol nogud fasin insaed long yumi, be hem i rili stap.
Ridim stori blong wan woman we i lego wok blong ol rabis spirit.
“Woman Ya i Faenem Wan Risen Blong Laef” (Wajtaoa, 1 Julae 1993)
Faenemaot olsem wanem Setan i yusum wok blong rabis spirit blong trikim ol man.
“The Truth About Magic, Sorcery, and Witchcraft” (The Road to Everlasting Life, part 5)
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
