LESEN 01
?Olsem Wanem Baebol i Save Halpem Yu?
Klosap yumi evriwan i gat sam kwestin long saed blong laef, safa, ded, mo fiuja. Yumi stap wari tu long saed blong ol nid blong yumi evri dei, mo blong gat wan hapi famle. Plante man oli faenemaot se Baebol i halpem olgeta blong kasem ansa blong ol impoten kwestin, mo tu, i givim ol gudfala advaes we oli save folem evri dei. ?Yu tingbaot wan man we Baebol i save givhan long hem?
1. ?Baebol i save ansa long wanem kwestin?
Baebol i ansa long ol impoten kwestin ya: ?Laef i stat olsem wanem? ?From wanem yumi laef? ?From wanem ol gudfala man oli stap safa? ?Wanem i hapen long man we i ded? Sipos evri man oli wantem pis, ?from wanem i gat faet? ?Long fiuja, wanem bambae i hapen long wol? Baebol i enkarejem yumi blong lukaotem ansa blong ol kwestin ya, mo plante man oli glad long ol ansa we Baebol i givim.
2. ?Olsem wanem Baebol i save halpem yumi blong glad evri dei?
Baebol i givim gudfala advaes long yumi. Eksampol, hem i tijim ol famle blong oli save kasem trufala glad. Hem i givim advaes blong dil wetem stres, mo blong stap glad long wok we yumi mekem. Bambae yu lanem moa save we Baebol i tijim long ol topik ya mo sam narafala moa, taem yumi stap gotru long buk ya tugeta. Nao bambae yu agri se “Olgeta tok blong Baebol oli . . . stret gud blong tijim man.”—2 Timoti 3:16.
Buk ya i no tekem ples blong Baebol. Be hem i pulum yu blong yu wan yu ridim Baebol. Taswe, mifala i enkarejem yu blong ridim ol vas we oli stap long ol lesen ya, mo yu komperem wetem samting we yu stap lanem.
DIGIM MOA
Faenemaot olsem wanem Baebol i halpem ol man, olsem wanem yu save glad blong ridim, mo from wanem i gud blong narafala i halpem yu blong kasemsave long hem.
3. Baebol i save lidim yumi
Baebol i olsem wan toslaet we i saen strong. Yumi save yusum Baebol blong i soem olsem wanem blong mekem ol gudfala desisen, mo blong luk samting we i stap long fored.
Ridim Ol Sam 119:105, mo tokbaot ol kwestin ya:
-
?Wanem tingting blong man we i raetem vas ya?
-
?Wanem tingting blong yu long Baebol?
4. Baebol i save ansa long ol kwestin blong yumi
Wan woman i faenemaot se Baebol i ansa long ol kwestin we hem i gat blong plante yia. Plei VIDEO, mo tokbaot ol kwestin ya.
-
Long video ya, ?wanem ol kwestin we woman ya i gat?
-
?Olsem wanem Baebol stadi i halpem hem?
Baebol i enkarejem yumi blong askem ol kwestin. Ridim Matiu 7:7, mo tokbaot kwestin ya:
-
?Yu gat sam kwestin we Baebol i save ansarem?
5. Yu save glad long Baebol riding
Plante man oli glad blong ridim Baebol mo oli kasem gudfala samting from. Plei VIDEO, mo tokbaot ol kwestin ya.
-
Long video ya, ?ol yangfala oli gat wanem tingting long fasin blong rid?
-
?From wanem naoia oli laekem blong ridim Baebol?
Baebol i talem se hem i save givim ol instraksen, we oli save kamfotem yumi mo givim hop long yumi. Ridim Rom 15:4, mo tokbaot kwestin ya:
-
?Yu yu wantem save moa long ol gudfala promes o hop long Baebol?
6. Ol narafala oli save halpem yumi blong kasemsave long Baebol
Plante man oli ridim Baebol olgeta wan. Be taem ol narafala oli tokbaot Baebol wetem olgeta, oli faenem se i givhan moa. Ridim Ol Wok 8:26-31, mo tokbaot kwestin ya:
-
?Wanem i save halpem yu blong kasemsave long Baebol? —Yu luk vas 30 mo 31.
Man Itiopia i nidim help blong kasemsave long Baebol. Plante man tede oli kasemsave moa long Baebol, taem narafala i givhan long olgeta
SAM MAN OLI SE: “I westem taem nomo blong stadi long Baebol.”
-
?Wanem tingting blong yu? ?From wanem yu ansa olsem?
SAMARI
Baebol i givim ol advaes we man i save folem evri dei, i ansarem ol impoten kwestin, i kamfotem man, mo i givim hop.
Tingtingbak
-
?Wanem ol advaes we yumi save faenem long Baebol?
-
?Wanem sam kwestin we Baebol i ansarem?
-
?Wanem sam samting long Baebol we yu wantem save?
FAENEMAOT
Luk olsem wanem advaes blong Baebol i wok gud tede.
“Ol Tijing Blong Baebol Oli Waes Oltaem” (Wajtaoa N. 1 2018)
Luk olsem wanem Baebol i halpem wan man we stat taem hem i pikinini, hem i stap traem blong winim ol nogud filing.
Luk gudfala advaes we i go long ol famle.
Luk olsem wanem Baebol i stretem wan rong tingting long saed blong man we i rulum wol.
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
