Jehova i nem blong God, we i min se “Hem i Mekem i Kamtru.” Jehova i gat olgeta paoa mo i wokem evri samting. Hem i naf blong mekem eni samting we hem i wantem i kamtru.

Long Hibru lanwis, nem blong God hem i fo leta, we long Inglis hem i YHWH no JHVH. Long ol olfala Hibru hanraet blong Baebol, nem ya i stap klosap 7,000 taem. Plante man long ol defdefren ples long wol oli yusum nem ya Jehova long lanwis blong olgeta.

▸ Japta 1, haf 15

Baebol i kamaot long God, be hem i yusum ol man blong oli raetem. Hemia i sem mak long wan leta we sekretari i raetem, blong talemaot tingting blong bos blong hem. God i yusum tabu spirit long plante defren rod, blong lidim ol man ya blong oli raetemdaon ol tingting blong hem long Baebol. Samtaem oli raetemdaon samting we oli luk long vison no drim.

▸ Japta 2, haf 5

Hemia ol stamba trutok blong Baebol we oli save tijim yumi. Olsem nao, stamba trutok ya, “ol rabis fren oli save spolem ol gudfala fasin,” i tijim yumi se ol fren oli save givhan long yumi no spolem yumi. (1 Korin 15:33) Stamba trutok ya, ‘bambae man i kakae frut blong sid we hem i planem,’ i tijim yumi se yumi no save ronwe long frut blong ol fasin we yumi mekem.—Galesia 6:7.

▸ Japta 2, haf 12

Hemia ol mesej we oli kam long God. Maet oli eksplenem samting we God i wantem, no tijing we i kam long God, no ol tok blong jajem ol man, no oli talemaot samting we bambae i hapen. Plante profet tok blong Baebol oli kamtru finis.

▸ Japta 2, haf 13

Jisas i mekem plante profet tok long saed blong Mesaea oli kamtru. Yu luk bokis ya, “ Sam Profet Tok Long Saed Blong Mesaea.”

▸ Japta 2, haf 17, futnot.

Jehova i mekem wol ya i wan paradaes, blong ol man we oli lavem hem oli save stap long hem. Tingting blong hem i no jenis. I no longtaem, bambae God i spolem ol rabis fasin, mo i givim laef we i no save finis long ol man blong hem.

▸ Japta 3, haf 1

Setan i wan enjel we i agensem God, mo i pulum plante narafala tu blong oli agensem God. Nem ya Setan i min se “Man Blong Agens,” from we hem i stap agensem Jehova. Nem ya Devel i min se “Man Blong Giaman.” Hem i giaman long saed blong God, mo i stap trikim ol man.

▸ Japta 3, haf 4

Bifo we Jehova i wokem wol, hem i wokem ol enjel blong oli laef long heven. I gat moa long wan handred milian enjel. (Daniel 7:10, NW) Oli gat prapa nem blong olgeta, mo oli gat defdefren fasin. Ol gudfala enjel oli no wantem se ol man oli wosipim olgeta. Oli gat ol defdefren posisen mo wok, olsem: oli stap long fored long jea blong Jehova blong mekem wok blong hem, oli karem mesej i go, oli protektem mo lidim ol man blong God long wol, oli mekem jajmen blong God i kamtru, mo oli lidim wok blong prij. (Ol Sam 34:7; Revelesen 14:6; 22:8, 9) Long fiuja, bambae oli givhan long Jisas long faet blong Amagedon.—Revelesen 16:14, 16; 19:14, 15.

▸ Japta 3, haf 5; Japta 10, haf 1

Hemia ol filing, tingting, mo fasin we oli agensem Jehova mo samting we hem i wantem. From we sin i mekem se yumi no moa fren gud wetem God, God i givim ol loa mo rul we yumi save folem blong blokem sin. Fastaem, Jehova i wokem evri samting i stret olgeta, be taem Adam mo Iv i no moa obei long hem, tufala i mekem sin nao tufala i no moa stret gud. Tufala i kam olfala mo tufala i ded. Adam i pasem sin i kam long yumi, taswe yumi tu yumi kam olfala mo yumi ded.

▸ Japta 3, haf 7; Japta 5, haf 3

Hemia bigfala faet blong God we bambae i spolem wol blong Setan mo ol rabis fasin.

▸ Japta 3, haf 13; Japta 8, haf 18

Hemia wan gavman we Jehova i stanemap long heven, mo Jisas Kraes i King blong hem. Jehova bambae i yusum Kingdom ya blong spolem ol rabis fasin, nao bambae Kingdom i rulum fulwol.

▸ Japta 3, haf 14

Jehova i wokem Jisas fastaem long ol narafala samting. Hem i sanem Jisas i kam long wol blong i ded from ol man. Hem i mekem Jisas i laef bakegen, mo naoia Jisas i King blong Kingdom blong God long heven.

▸ Japta 4, haf 2

Baebol i talemaot se Mesaea bambae i kamtru long en blong 69 wik, we i stat long yia 455 bifo Kraes, mo i finis long yia 29.

?Olsem wanem yumi save samting ya? Ol 69 wik ya oli stat taem Nehemaea i kam long Jerusalem blong bildim taon ya bakegen, hemia long yia 455 bifo Kraes. (Daniel 9:25; Nehemaea 2:1, 5-8) Wan “wik” i gat 7 dei long hem. Be long profet tok ya, wan wik i no minim 7 dei, be i minim 7 yia. Hemia i folem rul blong kaontem ol yia long ol profet tok blong Baebol, se “wan dei i saen blong wan yia.” (Namba 14:34; Esikel 4:6) From we wan wik i minim seven yia, ale 69 wik (69 x 7) i minim 483 yia. Sipos yumi stat long 455 bifo Kraes, nao yumi kaontem 483 yia (i no gat yia 0), bambae yumi kasem yia 29. !Hemia nao yia we Jisas i baptaes mo i kam Mesaea!—Luk 3:1, 2, 21, 22.

 I gat wan narafala wik tu long profet tok ya, hemia seven yia bakegen. Long medel blong wik ya, long yia 33, oli kilim Mesaea i ded. Mo long yia 36, oli stat blong talemaot gud nius blong Kingdom long ol man blong olgeta laen, i no long ol man Jiu nomo.—Daniel 9:24-27.

▸ Japta 4, haf 7

Baebol i tijim se Jehova God i wokem evri samting, mo i mekem Jisas fastaem long ol narafala samting. (Kolosi 1:15, 16) Jisas i no God ya we i gat olgeta paoa, mo hem i neva talem se hem i sem mak long God. Hem i talem samting we i defren olgeta, i se: “Papa i hae moa long mi.” (Jon 14:28; 1 Korin 15:28) Be sam skul oli tijim Triniti, hemia i min se God i olsem tri man long wan bodi: Papa, Pikinini, mo tabu spirit. Tok ya “Triniti” i no stap long Baebol. Hem i wan giaman tijing.

Tabu spirit i no wan man, be hem i paoa blong God. God i stap yusum paoa ya blong mekem samting we hem i wantem i kamtru. Baebol i talem se “tabu spirit i kam fulap” long ol Kristin. Mo tu, Jehova i talem se: “Bambae mi kafsaedem spirit blong mi long enikaen man.”—Ol Wok 2:1-4, 17.

▸ Japta 4, haf 12; Japta 15, haf 17

?From wanem ol tru Kristin oli no yusum kros blong wosipim God?

1. Longtaem finis i kam, ol giaman skul oli yusum kros. Bifo, oli yusum kros blong wosipim ol samting we God i wokem, mo blong mekem kastom long ol giaman god, we oli givim plante pikinini. Long ol 300 yia afta we Jisas i ded, ol Kristin oli no yusum kros long wosip blong olgeta. Be biaen, Hedgavman Constantine blong Rom i mekem kros i kam saen blong Kristin skul, blong pulum plante moa man oli kam long skul ya. Be kros i no joen nating wetem Jisas Kraes. Wan buk (New Catholic Encyclopedia) i talem se: “Kros i stap long kastom blong ol man bifo long taem blong Kraes mo ol man we oli no Kristin.”

2. Jisas i no ded long wan kros. Grik tok we oli tanem i kam “kros” i minim “wan pos,” “wan timba,” no “wan  tri.” Wan buk (The Companion Bible) i talem se: “I no gat wan samting long [Niutesteman] long Grik, blong soemaot se i gat tu pis timba.” Jisas i ded long wan pos nomo.

3. Jehova i no wantem se yumi yusum ol aedol mo ol saen olsem kros, long wosip blong yumi.—Eksodas 20:4, 5; 1 Korin 10:14.

▸ Japta 5, haf 12

Jisas i talem long ol disaepol blong hem se oli mas mekem Memoriol blong ded blong hem. Oli mekem evri yia long namba 14 Nisan, hemia sem dei we ol man Isrel oli mekem Pasova. Long Memoriol, oli pasem bred mo waen we i saen blong bodi mo blad blong Jisas. Olgeta we bambae oli rul wetem Jisas long heven, oli kakae bred mo dring waen. Olgeta we oli gat hop blong laef olwe long wol, oli kam long Memoriol mo oli soemaot respek, be oli no kakae bred mo dring waen.

▸ Japta 5, haf 21

Long Niu Wol Translesen long Inglis, tok ya “sol” i minim (1) wan man, (2) wan anamol, (3) laef blong man mo anamol. Hemia sam eksampol:

• Wan man. ‘Long taem blong Noa, sip ya i karem smol man nomo, hemia eit sol tru long wota ya, nao oli laef.’ (1 Pita 3:20) Long vas ya, “sol” i minim ol man, hemia Noa mo woman blong hem, trifala boe blong tufala mo ol woman blong trifala.

• Wan anamol. “Nao God i tok bakegen, i talem se, ‘I mas gat ol samting we i gat laef [“sol,” futnot NW] i stap long graon ya. I mas gat ol anamol blong vilej wetem anamol blong bus, i stat long olgeta we oli bigbigfala, i  go kasem olgeta we oli smosmol.’ Nao ol samting ya oli kamtru olsem we hem i talem.”—Jenesis 1:24.

• Laef blong man mo anamol. Jehova i talem long Moses se: “Ol man ya we oli wantem kilim yu [“sol blong yu,” futnot NW] oli ded evriwan finis.” (Eksodas 4:19) Jisas i talem se: “Mi mi gudfala man blong lukaot long sipsip. Mo gudfala man blong lukaot long sipsip, hem i glad nomo blong givim laef [“sol,” futnot] blong hem blong sevem ol sipsip blong hem.”—Jon 10:11.

  Taem wan man i mekem samting wetem “olgeta laef” no “sol” blong hem, hemia i min se hem i glad blong mekem, mo i mekem bes blong hem. (Matiu 22:37, futnot; Dutronome 6:5, NW) Wan ded bodi hem i wan ded sol.—Namba 6:6, NW; Ol Proveb 23:2, NW; Aesea 56:11, NW; Hagae 2:13, NW.

▸ Japta 6, haf 5; Japta 15, haf 17

Hibru mo Grik tok we oli tanem i kam “spirit” long Inglis Niu Wol Translesen, i minim defdefren samting. Be oltaem i minim samting we man i no save luk, olsem win we i blu, no win we man mo anamol i pulum. I save minim tu ol spirit man, mo tabu spirit we i paoa blong God. Baebol i no tijim se wan samting i kamaot long man taem hem i ded, mo i gohed blong laef samples.—Eksodas 35:21, NW; Ol Sam 104:29, NW; Matiu 12:43; Luk 11:13.

▸ Japta 6, haf 5; Japta 15, haf 17

Gehena i wan bigfala hol klosap long Jerusalem. Ol man long taem blong Jisas, oli sakem doti long hol ya blong bonem. Be oli no stap bonem ol anamol mo ol man we oli laef yet. Taswe Gehena i no minim wan ples we ol dedman oli go long hem blong safa, mo blong bon long faea blong olwe. Taem Jisas i talem se man i go long Gehena,  hemia i min se man ya bambae i lus blong olwe.—Matiu 5:22; 10:28.

▸ Japta 7, haf 20

Hemia prea we Jisas i talem, taem hem i stap tijim ol man blong hem long prea. Samfala oli singaot prea ya se ‘Notre Pere,’ no prea we i wan eksampol. Jisas i prea olsem:

• “Yu mekem we nem blong yu i tabu”

  Yumi prea blong Jehova i tekemaot ol giaman toktok we i sakem doti long nem blong hem. Nao evriwan long heven mo long wol bambae oli ona long nem blong God mo respektem.

• “Yu mekem Kingdom blong yu i kam”

  Yumi prea blong gavman blong God i spolem rabis wol blong Setan, nao i rulum wol mo mekem i kam wan paradaes.

• “Yu mekem samting we yu wantem i kamtru long wol ya”

  Yumi prea blong samting we God i wantem i kamtru long wol ya, nao ol man we oli obei long hem bambae oli kam stret olgeta mo laef olwe long Paradaes, olsem we Jehova i wantem fastaem.

▸ Japta 8, haf 2

Jehova i givim Pikinini blong hem olsem wan ransom, blong tekemaot ol man long sin mo ded. Ransom i pembak laef we Adam i lusum we i stret gud, mo i mekem rod blong ol man oli save fren gud bakegen wetem Jehova. God i sanem Jisas i kam long wol blong i ded from ol sinman. Ded blong hem i mekem se olgeta man oli gat janis blong kasem laef blong olwe mo kam stret gud.

▸ Japta 8, haf 21; Japta 9, haf 13

Profet tok long Daniel japta 4 i soemaot se God i putumap Kingdom blong hem long 1914.

Profet tok ya: Jehova i mekem se King Nebukadnesa i luk wan drim, blong wan bigfala tri we oli katemdaon. Nao oli fasem stamba blong tri ya long wan bigfala strap, we oli wokem long aean mo bras. Tri ya i no moa gru gogo “seven yia” i pas, we long olfala lanwis i minim “seven taem.” Afta, tri ya i gru bakegen.—Daniel 4:1, 10-16.

?Olsem wanem profet tok ya i joen long laef blong yumi? Tri ya i pija blong rul blong God. Jehova i putumap ol king long Jerusalem, blong oli rul long neson blong Isrel. (1 Kronikel 29:23) Be ol king ya oli no obei long Jehova, nao rul blong olgeta i finis. Long yia 607 bifo Kraes, Jerusalem i lus. Hemia nao stat blong “seven yia” no “seven taem.” (2 King 25:1, 8-10; Esikel 21:25-27) Jisas i talem se, “ol neson bambae oli purumbut long Jerusalem gogo kasem taem blong ol neson i finis.” “Taem blong ol neson” i minim ol “seven taem” ya. (Luk 21:24) Taswe “seven taem” ya i no finis taem Jisas i stap long wol. Jehova i promes blong putumap wan King long en blong ol “seven taem” ya. Rul blong niufala King ya, Jisas, bambae i mekem se ol man long olgeta ples blong wol, oli kasem ol bigfala blesing, gogo i no save finis.—Luk 1:30-33.

?“Seven taem” i minim hamas yia?: “Seven taem” i minim 2,520 yia. Sipos yumi stat long 607 bifo Kraes, nao yumi kaontem 2,520 yia (i no gat yia 0), bambae yumi kasem yia 1914. Hemia nao yia we Jehova i mekem Mesaea Jisas i kam King blong Kingdom blong hem long heven.

 ?Olsem wanem yumi kasem namba ya 2,520? Baebol i talem se tri taem mo haf i minim 1,260 dei. (Revelesen 12:6, 14) Yumi mas dabolem namba ya blong save hamas dei long “seven taem,” hemia 2,520 dei. Be folem rul blong ol profet tok, “wan dei i saen blong wan yia,” taswe 2,520 dei i minim 2,520 yia.—Namba 14:34; Esikel 4:6.

▸ Japta 8, haf 23

Baebol i tokbaot wan jif blong ol enjel nomo, we nem blong hem Maekel.—Daniel 12:1; Jud 9.

Maekel i lidim ol ami long heven, hemia ol gudfala enjel blong God. Revelesen 12:7 i talem se: “Maekel wetem ol enjel blong hem oli stap faet agens long bigfala algita ya . . . wetem ol enjel blong hem.” Revelesen i talem se Jisas i lidim ol ami blong God. Taswe Maekel i narafala nem blong Jisas.—Revelesen 19:14-16.

▸ Japta 8, haf 12

Hemia taem we plante bigfala samting bambae oli hapen long wol, jes bifo we Kingdom blong God i spolem wol blong Setan. Trifala tok ya blong Baebol, “ol las dei, “en blong wol,” mo taem we “Pikinini blong man i stap,” oli stap tokbaot sem samting nomo. (Matiu 24:3, 27, 37) “Ol las dei” oli stat taem Kingdom blong God i rul long 1914, mo bambae oli finis taem wol blong Setan i lus long Amagedon.—2 Timoti 3:1; 2 Pita 3:3.

▸ Japta 9, haf 5

Baebol i tokbaot naen man we Elaeja, Elisa, Jisas, Pita, mo Pol, oli mekem olgeta oli laef bakegen. Oli mekem ol merikel ya long paoa blong God nomo. Jehova i promes blong mekem “ol man we oli stret wetem ol man we oli no stret,” oli laef bakegen long wol. (Ol Wok 24:15) Baebol i tokbaot sam man we bambae oli go long heven tu. God i jusumaot ol man ya, i makemaot olgeta wetem tabu spirit, nao oli laef bakegen blong go stap wetem Jisas long heven.—Jon 5:28, 29; 11:25; Filipae 3:11; Revelesen 20:5, 6.

▸ Japta 9, haf 13

Ol man we oli wok wetem ol rabis spirit, oli stap toktok stret long ol rabis enjel, sipos no, oli go luk kleva no man blong mekem majik, nao hem i toktok long ol rabis enjel. Ol man ya oli bilif long giaman tijing ya se taem man i ded, spirit blong hem i kamaot, mo i kam wan spirit we i gat bigfala paoa. Ol rabis enjel oli traem pulum ol man tu blong oli no obei long God. Ol fasin blong talemaot fiuja, majik, wok blong kleva, posen, mo ol samting blong givim gudlak mo blokem badlak, oli wok blong ol rabis spirit. Plante buk, muvi, pija, mo singsing tu, oli tokbaot wok blong ol rabis spirit, olsem se i wan pleplei we yumi save harem gud long hem. Plante kastom blong berem dedman mo blong makem dei we man i ded long hem, oli joen wetem ol rabis spirit. Sem mak long sam spesel kastom we oli mekem long woman we i lusum man blong hem, mo taem oli sidaon fulnaet wetem dedbodi. Plante taem ol man oli tekem drag taem oli mekem wok blong ol rabis spirit.—Galesia 5:20; Revelesen 21:8.

▸ Japta 10, haf 10; Japta 16, haf 4

Jehova i gat olgeta paoa, mo hem i wokem heven mo wol. (Revelesen 15:3) Taswe evri samting i blong hem, mo hem i gat raet blong rul long olgeta. (Ol Sam 24:1; Aesea 40:21-23; Revelesen 4:11) Hem i stanemap ol loa, blong evri samting we hem i wokem oli folem. Jehova i gat raet blong putumap sam narafala tu blong oli rul. Taem yumi lavem Jehova mo yumi obei long hem, yumi sapotem hae rul blong hem.—1 Kronikel 29:11.

▸ Japta 11, haf 10

Hemia i minim eni samting we mama i mekem, blong kilim pikinini we i stap long bel blong hem. I no wan aksiden, mo i no from we bodi blong mama i sakemaot pikinini ya. Pikinini ya i wan defren man, i no sem man olsem mama blong hem. Taswe sipos mama i kilim hem i ded, i olsem we hem i kilim wan narafala man i ded.

▸ Japta 13, haf 5

Hemia taem dokta i putum blad blong narafala man long yu, no i putumbak blad we hem i bin tekemaot long yu finis nao i kipim i stap. No maet hem i wantem putum wan long ol fo stamba samting insaed long blad, i go long bodi blong yu. Fofala samting ya: plasma, ol red sel, ol waet sel, mo ol pletlet.

▸ Japta 13, haf 13

Long Baebol, tok ya “stretem” i no minim panis nomo. Taem narafala i stretem yumi, hem i tijim yumi, mo i mekem yumi kambak long stret rod. Taem Jehova i stretem yumi, hem i mekem i gud long yumi, be i no spolem yumi. (Ol Proveb 4:1, 2) Yumi laekem gudfala fasin blong Jehova blong stretem yumi, taswe yumi wantem se hem i stretem yumi. (Ol Proveb 12:1) Hem i lavem ol man blong hem mo i stap trenem olgeta. Tijing we hem i givim i stretem ol rong tingting we oli gat, nao oli lanem blong tingting mo mekem samting long fasin we hem i laekem. Jehova i soemaot wan nambawan eksampol long ol papa mo mama. Taem oli stretem pikinini, oli mas eksplenem gud from wanem hem i mas obei. Mo tu, oli mas tijim pikinini blong i lavem Jehova mo Baebol, mo blong i kasem save long ol rul long Baebol.

▸ Japta 14, haf 13

Ol rabis enjel oli gat bigfala paoa, be yumi no save luk olgeta. Oli kam enemi blong God taem oli no moa obei long hem. (Jenesis 6:2; Jud 6) Nao oli joen wetem Setan blong agensem Jehova.—Dutronome 32:17; Luk 8:30; Ol Wok 16:16; Jemes 2:19.

▸ Japta 16, haf 4