Long 1 Korin 6:1-8, aposol Pol i tokbaot sam Kristin we oli stap raorao, oli pas long kot blong stretem bisnes blong olgeta. Hem i harem nogud long sam Kristin long Korin we oli raorao nao oli “putum bisnes ya long han blong ol man we oli no Kristin, blong oli stretem.” (Vas 1) Pol i talem ol strong risen from wanem wan Kristin i no mas mekem narafala Kristin i pas long kot blong stretem rao blong tufala, be tufala i mas stretem folem ol advaes we hem i raetem long kongregesen. Fastaem yumi save tokbaot from wanem God i pulum Pol blong givim advaes ya. Biaen, yumi tokbaot sam problem we maet i stret blong pas long kot from.

Sipos yumi raorao wetem wan narafala Kristin from wan problem long saed blong bisnes, yumi save traem stretem trabol ya long rod we Jeova i talem, we yumi no folem tingting blong yumi nomo. (Ol Proveb 14:12) Olsem Jisas i soemaot, i moagud we yumi stretem wan rao kwiktaem, bifo we samting ya i kam wan bigfala trabol. (Matiu 5:23-26) Be sore tumas, sam Kristin oli kam kros tumas, oli raorao bitim mak, nao oli putum brata blong olgeta long kot. Pol i talem se: “Fasin ya we yufala i stap pas long kot blong stretem ol rao blong yufala, hem i soemaot i klia we yufala i foldaon finis.” ?From wanem? Wan bigfala risen, hemia se fasin ya i save sakem doti long gudnem blong kongregesen mo long gudnem blong God ya we yumi wosipim. Taswe, yumi mas tinghevi long kwestin we Pol i askem, se: “?Blong wanem yufala i no save letem sam long yufala i mekem i no stret long yufala?”—Vas 7.

Pol i talem tu se God i putumap wan gudfala plan insaed long kongregesen blong stretem plante defren kaen trabol. Ol Kristin elda oli waes from ol save long trutok blong Baebol we oli kasem finis. Pol i talem se taem sam Kristin i raorao from ol “bisnes blong laef ya long wol,” be ol elda oli “save stretem ol bisnes olsem.” (Vas 3-5) Jisas i talem se i gat rod blong stretem rao we i kamaot taem wan Kristin i ting se narafala i mekem bigfala sin agens long hem, olsem hem i spolem nem blong hem no i mekem kruked fasin. Kristin ya i save mekem trifala samting: faswan,  hem i save go toktok wetem narafala ya, tufala nomo, blong stretem bisnes ya. Namba tu, sipos oli no save stretem olsem, hem i save tekem wan no tu man i kam olsem witnes. Namba tri, sipos oli no save stretem yet, hem i save talemaot trabol ya long ol elda long kongregesen.—Matiu 18:15-17.

Ating ol Kristin elda oli no ol loea no bisnesman, mo wok blong olgeta i no blong givim advaes long saed blong loa mo bisnes. Olgeta oli no putumap ol rul we ol Kristin oli mas folem blong stretem ol rao long saed blong bisnes. Be ol elda oli traehad blong givhan long ol Kristin we oli gat wan problem olsem, blong oli folem ol tok blong Baebol mo faenem wan rod blong stretem trabol ya long pis. Sipos wan trabol i fasfas tumas, maet ol elda oli toktok wetem seket elda no branj ofis blong ol Witnes blong Jeova. Be i gat sam trabol we maet i stret blong pas long kot wetem wan brata from. ?Wanem sam long ol trabol ya?

Long sam kaen trabol, wan Kristin i mas pas long kot from we loa i talem. Mo tu, samtaem hemia i wan isi rod nomo we i mekem i moagud long evriwan insaed long rao ya, blong oli holem pis. Olsem nao, maet i gat rod ya nomo we man i mas pas long kot blong mekem divos, kasem raet blong tekem pikinini blong hem i kam stap wetem hem, mo putum mak blong stret mane we man we i seraot long woman blong hem i mas givim long hem evri manis. Maet man i mas pas long kot tu blong kasem mane blong insurens, mo blong kasembak mane we narafala i kaon long hem taem bisnes i brokdaon, mo blong pruvum se hem i gat raet blong kasem samting we i stap long pepa blong las toktok blong wan famle no fren we i ded. Mo tu, samtaem wan kristin i putum wan brata long kot, nao brata ya i luk se hem i mas agensem man ya long kot blong protektem hem wan. *

Sipos ol man we oli pas long kot blong stretem ol trabol olsem oli no mekem samting ya wetem tingting blong raorao nomo, ating fasin blong olgeta i no agensem tingting we i stap insaed long advaes we God i pulum Pol blong raetem. * Nating se i olsem, faswan tingting blong wan Kristin se hem i mas wantem leftemap nem blong Jeova mo putum pis mo fasin joengud long kongregesen. Bigfala fasin we i makemaot ol man blong Kraes hemia lav, mo man we i gat lav “i no save tingbaot hem nomo.”—1 Korin 13:4, 5; Jon 13:34, 35.