Namba 23:1-30
23 Nao Balam i talem long Balak se: “Bambae yu wokem seven olta long ples ya,+ mo yu rerem seven bul mo seven man sipsip blong mi.”
2 Nao kwiktaem nomo Balak i mekem olsem we Balam i talem. Biaen tufala i bonem ol bul wetem ol man sipsip long ol olta ya. Tufala i bonem wan bul mo wan man sipsip long wan olta.+
3 Nao Balam i talem long Balak se: “Yu stap long ples ya wetem ol ofring ya blong yu we oli bon fulwan, mo bambae mi go fastaem. Maet bambae Jehova i kamtru long mi. Mo wanem samting we bambae hem i talem long mi, bambae mi talemaot long yu.” Nao Balam i wokbaot i go antap long top blong wan hil we i no gat samting i gru long hem.
4 Nao God i kamtru long Balam,+ mo Balam i talem long hem se: “Mi mi wokem seven olta long wan laen mo mi bonem ol bul wetem ol man sipsip long ol olta ya. Mi bonem wan bul mo wan man sipsip long wan olta.”
5 Nao Jehova i putum tok blong hem long maot blong Balam,+ i se: “Yu gobak long Balak, mo hemia samting we yu mas talem long hem.”
6 Ale hem i gobak, mo i luk we olgeta prins blong Moab oli stap stanap wetem Balak klosap long ol ofring ya blong hem we oli bon fulwan.
7 Nao hem i talemaot proveb ya se:+
“Balak we i king blong Moab, i singaot mi mi kam, nao mi aot long Aram,+Long bigfala hil ya long saed i go long is. Hem i se:
‘Yu kam singaot trabol i go long Jekob long bihaf blong mi.
Yes, yu kam jajem Isrel.’+
8 Be God i no singaot trabol i go long olgeta. ?So olsem wanem mi save singaot trabol i go long olgeta?
Mo Jehova i no jajem olgeta. ?So olsem wanem mi save jajem olgeta?+
9 Taem mi stanap antap long ol bigfala ston, mi save luk olgeta,Mo antap long ol hil, mi save luk olgeta.
Olgeta oli wan grup blong man we oli stap olgeta nomo.+Oli no kaontem olgeta wetem ol narafala nesen.+
10 ?Hu i save kaontem ol man blong Jekob we oli plante olsem das blong graon?+?Hu i save kaontem namba 4 haf blong Isrel?
I gud mi* ded olsem ol stret manMo i gud en blong laef blong mi i olsem blong olgeta.”
11 Nao Balak i talem long Balam se: “?Wanem samting ya we yu yu mekem long mi? Mi mi tekem yu yu kam long ples ya blong yu singaot trabol i go long ol enemi blong mi. Be yu girap, yu blesem olgeta.”+
12 Be hem i ansa se: “?Olsem wanem? ?Mi mi no save talemaot ol tok ya we Jehova i putum long maot blong mi?”+
13 Nao Balak i talem se: “Plis yu kam, yumitu go long wan narafala ples blong yu save luk olgeta. Bambae yu luk smol haf nomo blong olgeta, i no olgeta evriwan. Nao long ples ya bambae yu singaot trabol i go long olgeta long bihaf blong mi.”+
14 Nao hem i tekem Balam i go antap long top blong Pisga,+ long open ples blong Jofim, nao i wokem seven olta, mo i bonem ol bul wetem ol man sipsip long ol olta ya. Hem i bonem wan bul mo wan man sipsip long wan olta.+
15 Nao Balam i talem long Balak se: “Yu stap long ples ya wetem ol ofring ya blong yu we oli bon fulwan, bambae mi mi go longwe blong toktok wetem God.”
16 Nao Jehova i kamtru long Balam mo i putum tok blong hem long maot blong Balam,+ i se: “Yu gobak long Balak, mo hemia samting we yu mas talem long hem.”
17 Mo taem hem i kambak, hem i luk we Balak i stap wet klosap long ol ofring blong hem we oli bon fulwan, mo ol prins blong Moab oli stap wetem hem. Nao Balak i askem se: “?Jehova i talem wanem?”
18 Nao hem i talemaot proveb ya se:+
“Yu girap mo yu lesin, Balak.
Yu harem tok blong mi, O boe blong Jiporo.
19 God i no olsem ol man we oli save giaman,+Hem i no olsem wan pikinini blong man we i save jenisim tingting blong hem.*+
Taem hem i talem wan samting, ?yu ting se hem i no save mekem samting ya?
Taem hem i toktok, ?yu ting se hem i no save mekem samting we hem i talem?+
20 !Yu luk! Mi mi stap long ples ya blong blesem olgeta;Hem i blesem olgeta finis,+ mo mi mi no save jenisim samting ya.+
21 Hem i blokem eni paoa blong majik we i kam agensem JekobMo hem i no letem eni trabol i kam agensem Isrel.
God blong hem Jehova, i stap wetem olgeta,+
Mo oli stap singaot strong blong presem hem se hem i king blong olgeta.
22 God i tekemaot olgeta long Ijip.+
Paoa blong hem i givhan long olgeta olsem ol hon blong wan wael bul.+
23 I no gat man i save yusum ol saen blong singaot trabol i kam long Jekob,+Mo i no gat wan kleva we i save agensem Isrel.+
Naoia maet oli stap tokbaot Jekob mo Isrel se:
‘!Yufala i traem luk samting we God i bin mekem!’
24 Hemia wan grup blong ol man we bambae oli girap olsem wan laeon,Mo olsem wan laeon, bambae oli stanap stret.+
Bambae hem i no ledaon kasem we i kakae animol we hem i kilimMo i dring blad blong animol ya we hem i kilim.”
25 Nao Balak i talem long Balam se: “Sipos yu no save singaot trabol i go long hem, yu no sud blesem hem tu.”
26 Nao Balam i ansa se: “Mi mi talem finis long yu se: ‘Bambae mi mi mekem olgeta samting we Jehova i talem.’”+
27 Be Balak i talem long Balam se: “Plis yu kam, yumitu go long wan narafala ples bakegen. Nao long ples ya, maet bambae tru God i luk se i stret blong yu singaot trabol i go long ol man ya long bihaf blong mi.”+
28 Ale Balak i tekem Balam i go antap long ples ya Peoro, we i lukluk i go long Jesimon.*+
29 Nao Balam i talem long Balak se: “Yu wokem seven olta long ples ya, mo yu rerem seven bul mo seven man sipsip blong mi.”+
30 Ale Balak i mekem stret olsem we hem i talem, mo hem i bonem ol bul wetem ol man sipsip long ol olta ya. Hem i bonem wan bul mo wan man sipsip long wan olta.
