Eksodas 25:1-40
25 Nao Jehova i talem long Moses se:
2 “Yu talem long ol man Isrel blong oli givim wan kontribusen long mi. Bambae yu tekem kontribusen ya long evri man we hat blong olgeta i pusum olgeta blong givim.+
3 Kontribusen we bambae yu tekem long olgeta, hemia gol,+ silva,+ kopa,+
4 blu tred, pepol wul,* tred we i laet red, gudfala tred ya linen, hea blong nani,
5 skin blong man sipsip we oli pentem i red, skin blong animol ya sil, wud blong akasia,+
6 oel blong ol laet,+ balsam blong putum long oel blong makemaot man,+ mo blong putum long insens blong mekem i smel naes,+
7 mo ston ya onikis, mo ol narafala ston blong putum long efod+ mo long spesel paos we i blong hangem long jes.*+
8 Mo oli mas mekem wan tabu ples blong mi, mo mi bambae mi stap long medel blong olgeta.+
9 Yufala i mas mekem tabenakel* ya mo olgeta samting blong hem, stret folem plan we bambae mi soem long yu.+
10 “Bambae yufala i wokem wan bokis long wud blong akasia. Bambae longfala blong bokis ya i tu mo haf kiubit,* bigfala blong hem i wan mo haf kiubit, mo hae blong hem i wan mo haf kiubit.+
11 Mo biaen bambae yufala i blokem bokis ya long gol we i klin gud.+ Long evri haf blong hem insaed mo aotsaed, bambae yufala i blokemgud long gol. Mo bambae yufala i wokem wan smol strap long gol we i goraon long saed blong hem antap, blong flasem.+
12 Mo bambae yufala i wokem fo ring blong bokis ya long gol, mo yufala i putum olgeta antap long ol fo leg blong hem, we tu ring long wansaed mo tu ring long narasaed.
13 Mo bambae yufala i wokem tu longfala stik long wud blong akasia, mo yufala i blokem tufala long gol.+
14 Bambae yufala i pusum tufala stik ya i gotru long ol ring we oli stap long saed blong Bokis ya, blong man i save holem taem i karem Bokis ya.
15 Tufala stik ya bambae i mas stap nomo long ol ring blong Bokis ya, yufala i no mas tekemaot.+
16 Mo yufala i mas putum insaed long Bokis ya, ol flat ston we tok blong mi i stap long hem.+
17 “Bambae yufala i wokem lid blong Bokis ya long gol we i klin gud. Bambae longfala blong hem i tu mo haf kiubit, mo bigfala blong hem i wan mo haf kiubit.+
18 Bambae yufala i wokem tu jerubim long gol. Bambae yufala i hamarem gol long tufala en blong lid ya, blong wokem ol jerubim ya.+
19 Bambae yufala i wokem tufala jerubim ya long tufala en blong lid ya, wan long wan en mo narawan long narafala en.
20 Bambae yufala i mekem we fes blong tufala jerubim ya i lukluk i godaon long lid blong Bokis mo tufala i fesem tufala, mo tufala i openem wing blong tufala i go antap, nao wing blong tufala i kavremap lid ya.+
21 Bambae mi givim long yu ol flat ston we tok blong mi i stap long hem, mo bambae yufala i putum insaed long Bokis ya mo yufala i tekem lid+ blong Bokis ya, yufala i satem.
22 Bambae mi mi kam antap long lid blong Bokis+ blong Loa,* long medel blong tufala jerubim ya, blong mi soemaot mi long yu, mo bambae mi givim ol tok ya blong mi long yu, we yu mas go talemaot long ol laen blong Isrel.
23 “Mo tu bambae yufala i wokem wan tebol+ long wud blong akasia. Longfala blong hem bambae i tu kiubit, mo bigfala blong hem bambae i wan kiubit, mo hae blong hem bambae i wan mo haf kiubit.+
24 Bambae yufala i blokem tebol ya long gol we i klin gud, mo yufala i wokem wan strap long gol we i goraon long saed blong tebol ya.
25 Mo bambae yufala i wokem wan smol strap i goraon long hem we bigfala blong hem i saes blong wan han.* Mo yufala i wokem wan rel long gol i goraon long en blong strap ya.
26 Bambae yufala i wokem fo ring blong tebol ya long gol, mo yufala i putum ol ring ya long ol fo kona blong tebol ya, long ples we ol leg blong tebol oli joen long tebol.
27 Ol ring ya bambae oli stap klosap long rel blong tebol ya, blong yufala i save pusum ol stik i gotru long hem blong karem tebol ya.
28 Bambae yufala i wokem ol longfala stik long wud blong akasia blong karem tebol ya, mo bambae yufala i blokem ol stik ya long gol.
29 “Bambae yufala i wokem ol samting blong tebol ya. Hemia ol plet, ol kap, ol jag, mo ol bol blong kafsaedem ol dring ofring long hem. Ol samting ya bambae yufala i wokem olgeta long gol we i klin gud.+
30 Mo long fes blong mi, oltaem bambae yufala i putum sobred* long tebol ya.+
31 “Bambae yufala i wokem wan ples blong putum laet.+ Bambae yufala i tekem wan pis gol nomo we i klin gud mo yufala i hamarem blong wokem ples blong putum laet ya. Ples blong laet ya bambae i gat stamba blong hem, stik blong hem, mo ol han blong hem. Mo long ol han blong hem bambae i gat ol flaoa we i open, ol lif we i stap aninit long ol flaoa ya, mo ol flaoa we i sat.+
32 Ples blong laet ya bambae i gat sikis han blong hem, tri long wansaed mo tri long narasaed.
33 Long evri han long wansaed bambae i mas gat tri lif we oli stap aninit long ol flaoa, mo sep blong olgeta i olsem flaoa blong almon, mo biaen long ol flaoa ya wanwan bambae i gat wan flaoa we i no open yet mo wan flaoa we i open finis. Mo hemia bambae i sem mak long evri han long narasaed. Hemia nao olsem wanem ol sikis han ya bambae oli kamaot long stik ya.
34 Long stik blong ples blong putum laet, bambae i gat fo lif we oli stap aninit long ol flaoa, mo sep blong olgeta i olsem flaoa blong almon. Mo biaen long ol flaoa ya wanwan, bambae i gat wan flaoa we i no open yet mo wan flaoa we i open finis.
35 Long ol sikis han we oli kamaot long stik ya, aninit long tufala faswan han bambae i gat wan flaoa we i no open yet, mo aninit long tufala nekis han bambae i gat wan flaoa we i no open yet, mo aninit long tufala laswan han bambae i gat wan flaoa we i no open yet.
36 Bambae yufala i hamarem wan pis gol we i klin gud, blong wokem ples blong putum laet ya wetem ol flaoa we oli no open yet, mo ol han blong hem.+
37 Bambae yufala i wokem seven laet blong hem, mo taem oli laet, bambae oli saenem eria long fored blong hem.+
38 Bambae yufala i yusum gol we i klin gud blong wokem ol samting blong holem wik blong laet* mo ol faea holda.+
39 Bambae yufala i yusum wan talen* blong gol we i klin gud blong wokem ples blong putum laet wetem evri samting ya.
40 Yu mas meksua se yufala i wokem ol samting ya stret olsem plan ya we mi soemaot long yu antap long bigfala hil.+
Ol futnot
^ NT: “wul we oli pentem i red mo pepol.”
^ Spesel paos we Hae Pris i hangem long jes blong hem.
^ PT: “bokis we i olsem Witnes.”
^ NT: “ol tongs.”
