Leta i go long Efesas 5:1-33
5 Taswe yufala i mas folem fasin blong God,+ olsem ol pikinini we hem i lavem olgeta tumas.
2 Gohed blong soemaot* lav+ olsem we Kraes tu i lavem yumi,*+ mo i givim laef blong hem from yumi* olsem wan ofring mo wan sakrefaes, we gudfala smel blong hem i go long God.+
3 Yufala i no mas tokbaot nating enikaen doti fasin blong seks,* mo enikaen doti samting, mo toktok blong yufala i no mas soemaot se yufala i griri,+ from we i no stret blong ol tabu man oli mekem olsem.+
4 Mo yufala i no mas mekem ol fasin blong sem, mo yufala i no mas talem ol krangke tok mo ol tokplei we oli doti,+ from we ol samting ya oli no stret. Be yufala i mas talem tangkiu long God.+
5 Man we i griri,+ i olsem we hem i stap wosipim ol aedol. Be yufala i kasem save mo yufala i save se ol man olsem, wetem ol man we oli stap mekem ol doti fasin blong seks,*+ mo ol man we oli no klin, bambae oli no kasem Kingdom blong Kraes mo God.+
6 Yufala i no mas letem ol man oli kam giaman long yufala wetem ol tok we i blong nating nomo, from we ol samting ya nao oli mekem se bambae kros blong God i kasem ol man we oli no stap obei.
7 Taswe yufala i no mas go joen nating wetem olgeta,
8 from we bifo yufala i stap long tudak, be naoia yufala i stap long laet+ from we yufala i man blong Masta.+ Yufala i mas gohed blong wokbaot olsem ol pikinini blong laet,
9 from we laet i mekem se man i gat evri gudfala fasin, i gat stret fasin, mo i folem trutok.+
10 Yufala i mas gohed blong faenemaot se Masta i glad long wanem samting.+
11 Mo yufala i mas stop blong joen wetem olgeta blong mekem ol wok we oli blong tudak nomo, mo oli no gat frut blong olgeta,+ be yufala i mas mekem ol wok ya oli kam long klia ples,
12 from we ol samting we oli mekem long fasin haed, yumi sem tumas long olgeta, mo yumi no save tokbaot tu.
13 Laet nao i soemaot olgeta samting, nao oli kam long klia ples, from we olgeta samting we oli stap long klia ples, oli laet.
14 Taswe Baebol i talem se: “O yu we yu stap slip, yu wekap, yu girap long ded,+ nao Kraes bambae i saen i kam long yu.”+
15 Yufala i mas lukaot gud olsem wanem yufala i wokbaot, yufala i no mas wokbaot olsem ol man we oli no waes, be olsem ol man we oli waes,
16 yufala i yusum gud taem blong yufala,*+ from we yumi laef long ol dei we oli rabis we oli rabis.
17 Yufala i mas stop blong mekem samting olsem we yufala i no gat hed, be yufala i mas gohed blong kasem save se samting we Jehova* i wantem, hem i wanem.+
18 Bambae yufala i no dring waen gogo yufala i drong,+ from we samting ya bambae i pulum yufala blong mekem samting we i no stret,* be yufala i gohed blong letem tabu spirit i kam fulap long yufala.
19 Taem yufala i stap toktok long yufala, i gud yufala i yusum ol sam, mo ol tok blong presem God, mo ol singsing blong wosipim hem. Yufala i mas singsing+ blong mekem miusik+ long hat blong yufala, blong presem Jehova.*+
20 Long nem blong Masta blong yumi Jisas Kraes, yufala i mas talem tangkiu+ oltaem long God ya we i Papa blong yumi, from evri samting.+
21 Yufala i mas putum yufala i stap aninit long ol narafala,+ long fasin ya we yufala i fraet* long Kraes.
22 I gud ol waef oli putum olgeta oli stap aninit long hasban blong olgeta,+ olsem se oli mekem long Masta,
23 from we hasban i hed blong waef blong hem+ stret olsem we Kraes i hed blong kongregesen,+ from we hem i sevia blong bodi ya.
24 Kongregesen i putum hem i stap aninit long Kraes, long sem fasin, ol waef tu oli mas putum olgeta oli stap aninit long hasban blong olgeta long evri samting.
25 Ol hasban, yufala i mas gohed blong lavem waef blong yufala+ stret olsem we Kraes tu i lavem kongregesen, nao i givim laef blong hem blong sevem kongregesen ya,+
26 blong mekem hem i kam tabu, mo hem i wasem hem i klin long tok blong God we i olsem wota.+
27 Hem i mekem olsem blong kongregesen ya i kam naes tumas long fes blong hem, mo i tabu, be i no gat wan doti long hem,+ mo i no gat wan samting we i save mekem se hem i no naes.+
28 Long sem fasin, ol hasban oli mas lavem waef blong olgeta olsem we oli lavem prapa bodi blong olgeta. Man we i lavem waef blong hem, hem i lavem hem wan,
29 from we i no gat man we i no laekem nating prapa bodi blong hem. Man i stap fidim bodi blong hem mo i stap mekem i gud long hem, stret olsem we Kraes i mekem long kongregesen,
30 from we yumi ol haf blong bodi blong hem.+
31 “From samting ya, man bambae i aot long papa mo mama blong hem, mo bambae hem i go joen* wetem waef blong hem, mo bambae tufala i kam wan bodi nomo.”+
32 Tabu tokhaed+ ya i impoten tumas. Mi mi stap tokbaot Kraes mo kongregesen.+
33 Be wanwan hasban i mas lavem waef blong hem+ olsem we hem i lavem hem wan, mo waef i mas gat bigfala respek long hasban blong hem.+
Ol futnot
^ NT: “wokbaot long.”
^ MNT: “yufala.”
^ MNT: “yufala.”
^ PT: “yufala i pemaot wan stret taem we yufala i makemaot finis.”
^ NT: “blong no folem ol rul.”
^ NT: “tinghevi.”
^ NT: “stap.”
