Aesea 59:1-21
59 !Yufala i luk! Han blong Jehova i no sot tumas blong sevem man,+Mo sora blong hem i no fas,* we i no save harem samting.+
2 Nogat, ol rong blong yufala nomo oli seraotem yufala long God blong yufala.+
Ol sin blong yufala oli mekem se hem i haedem fes blong hem long yufala,Hem i no wantem harem yufala.+
3 Hemia from we blad i mekem han blong yufala i doti+Mo ol rong blong yufala oli mekem ol fingga blong yufala oli doti.
Lips blong yufala i talem ol giaman tok,+ mo tang blong yufala i stap toktok smosmol blong tokbaot ol fasin we oli no stret.
4 I no gat wan man nating i toktok from stret fasin,+Mo i no gat wan man nating i tok tru, taem i go long kot.
Oli trastem ol samting we oli no tru,*+ mo oli stap tokbaot ol samting we oli no save givhan.
Bel blong olgeta i fulap long trabol, olsem we oli gat bel, mo oli bonem ol samting we oli save givim kil long man.+
5 Oli brekem ol eg blong wan posen snek,Mo oli stap wivim tred blong wan spaeda.+
Eni man we i kakae ol eg blong olgeta, bambae i ded,Mo eg we i brok, posen snek i kamaot long hem.
6 Ol tred blong spaeda blong olgeta, bambae i no olsem wan klos blong werem,Mo bambae oli no save kavremap olgeta long samting ya we oli mekem.+
Wok blong olgeta i save givim kil long man,Mo han blong olgeta i fulap long ol fasin blong kilim man.+
7 Oli* ron blong go mekem ol nogud samting,Mo oli kwik blong go mekem blad blong ol gudfala man i ron.+
Ol tingting blong olgeta i blong spolem man nomo,Evri rod we oli pas long hem, oli spolem evri samting, oli mekem ol man oli harem nogud.+
8 Oli no save rod blong pis,Mo i no gat jastis long rod blong olgeta.+
Oli mekem ol rod blong olgeta i kruked,Mo eni man we i stap wokbaot long ol rod ya, bambae i no save rod blong pis.+
9 From samting ya, jastis i stap longwe long yumi,Mo stret fasin i no kasem yumi nating.
!Yufala i luk! Yumi stap wet long laet, be i gat tudak nomo,Yumi stap wet long delaet, be yumi gohed blong wokbaot long tudak.+
10 Yumi stap pusum han olbaot blong tajem wol, olsem ol blaenman,Mo olsem olgeta we oli no gat ae, yumi stap pusum han olbaot.+
Yumi stambol long medel dei olsem se i tudak finis long aftenun,Yumi olsem ol dedman nomo long medel blong ol strong man.
11 Yumi evriwan i stap singaot bigwan olsem ol beaMo yumi stap krae olsem ol sotleg from yumi harem nogud.
Yumi stap wet blong i gat jastis, be i no gat,Yumi stap wet blong oli sevem yumi, be hemia tu i stap longwe long yumi.
12 Hemia from we long fored blong yu, ol samting we mifala i mekem agensem yu oli plante tumas.+
Ol sin we wanwan long mifala i mekem, oli stap talemaot mifala bakegen.+
From we ol samting we mifala i mekem agensem yu, oli stap wetem mifala,Mifala i save gud ol rong blong mifala.+
13 Mifala i mekem sin mo mifala i lego Jehova,Mifala i tanem baksaed long God blong mifala finis.
Mifala i tokbaot blong mekem ol man oli safa mo blong girap agensem yu,+Bel blong mifala i fulap long giaman olsem se mifala i gat bel, mo mifala i stap talem ol giaman tok we oli kamaot stret long hat.+
14 Oli ronem jastis i gobak finis,+Mo stret fasin i stap stanap longwe,+From we trutok* i stambol finis long pablik ples,Mo samting we i stret, i no naf blong kam insaed.
15 Trutok* i lus finis,+Mo eni man we i tanem baksaed long ol samting we i nogud, ol man oli karemaot olting blong hem.
Jehova i luk samting ya mo i no glad nating,*From we i no gat jastis.+
16 Hem i luk se i no gat wan man long ples ya,Mo hem i sapraes se i no gat wan man i toktok from olgeta,Taswe, hem i yusum prapa han blong hem blong sevem man,*Mo stret fasin blong hem wan i sapotem hem.
17 Nao hem i werem stret fasin olsem wan klos blong blokem ara,Mo i werem hat blong faet blong sevem man* long hed blong hem.+
Hem i putum ol kaliko blong givimbak ol nogud fasin, olsem klos blong hem,+Mo i kavremap hem long strong tingting olsem wan kot.*
18 Bambae hem i givim pei long olgeta from samting we oli mekem:+I letem kros blong hem i kasem ol man we oli agensem hem, mo i givimbak long ol enemi blong hem.+
Mo bambae hem i pembak ol samting we ol aelan oli stret blong kasem.
19 Ol man long saed we san i draon, bambae oli fraet* long nem blong JehovaMo ol man long saed we san i girap, oli givim glori long hem,From we bambae hem i kam insaed olsem wan reva we i stap ron strong,We spirit blong Jehova nao i stap lidim i kam.
20 Jehova i talem se: “Man blong pembak ol man+ bambae i kam long Saeon,+Long olgeta we oli stap long Jekob, we oli tanem tingting from ol sin blong olgeta.”+
21 Jehova i talem se: “Long saed blong mi, hemia kontrak we mi mekem wetem olgeta.”+ Jehova i talem se: “Spirit blong mi we i stap long yu, mo ol tok blong mi we mi putum long maot blong yu, bambae i no gat wan man i tekemaot olgeta long maot blong yu, mo long maot blong ol pikinini* blong yu, mo long maot blong ol smol bubu* blong yu, i stat naoia i go mo blong olwe.”
Ol futnot
^ PT: “i no hevi.”
^ NT: “emti nomo.”
^ PT: “Leg blong olgeta i.”
^ NT: “fasin blong tok tru.”
^ NT: “Fasin blong tok tru.”
^ PT: “mo long ae blong hem, samting i nogud tumas.”
^ NT: “blong mekem hem i win.”
^ NT: “olsem wan kot we i no gat han blong hem.”
^ NT: “hat blong win.”
^ NT: “tinghevi.”
^ PT: “sid.”
^ PT: “sid.”
