Aesea 14:1-32
14 Jehova bambae i gat sore long Jekob,+ mo bambae hem i jusum Isrel bakegen.+ Bambae hem i putum olgeta oli stap* long graon blong olgeta,+ mo ol man blong ol narafala kantri we oli stap wetem olgeta bambae oli joen wetem olgeta, mo oli fasgud wetem olgeta long haos blong Jekob.+
2 Mo ol man blong ol narafala nesen bambae oli karem olgeta, mo tekem olgeta oli gobak long ples blong olgeta, nao ol laen blong Isrel bambae oli yusum ol man mo ol woman ya blong oli wok+ long graon blong Jehova. Mo bambae oli mekem ol man ya we oli stap holemtaet olgeta, oli kam ol slef blong olgeta, mo bambae oli rul long ol man ya we oli stap fosem olgeta blong wok.*
3 Long dei ya, taem Jehova i mekem yu yu spel, yu no moa harem nogud mo yu no moa kasem trabol, mo yu no moa wok had olsem ol slef,+
4 bambae yu talem proveb* ya agensem* king blong Babilon se:“!Man ya we i stap fosem ol narafala blong wok,* naoia hem i foldaon finis!!Fasin blong hem blong mekem i strong tumas long ol man i finis!+
5 Jehova i brekem finis stik blong ol man nogud,Hemia wokingstik blong ol rula,+
6 Hemia man ya we i stap wipim nogud ol man, we i no stop nating,+Mo hem i gohed olwe nomo blong spolem ol man blong ol nesen we hem i winim olgeta long faet, from we hem i kros tumas.+
7 Naoia fulwol i kwaet, mo i no moa gat trabol.
Ol man oli stap singaot from we oli harem gud tumas.+
8 Ol tri ya junipa tu oli glad tumas from samting we i hapen long yu,Mo ol sida long Lebanon tu oli glad.
Oli talem se: ‘Stat long taem we yu foldaon kam kasem naoia,I no gat wan man blong katem wud, i kam blong katemdaon mifala.’
9 Mo Gref* aninit, hem tu i kamaotBlong mitim yu taem yu kam.
Mo from yu, hem i wekemap olgeta we oli no gat paoa, oli ded finis,Hemia olgeta lida* blong wol we fasin blong olgeta i strong we i strong tumas.
Mo hem i mekem olgeta king blong ol nesen oli girap long ol jea blong olgeta.
10 Olgeta evriwan oli toktok mo oli talem long yu se:‘?Olsem wanem, yu tu yu kam slak olsem mifala??Naoia yu kam olsem mifala?
11 Fasin blong yu blong flas, i stap daon finis long Gref,*Hemia noes blong ol instramen blong yu we oli gat string.+
Ol maget oli stap aninit long yu olsem bed blong yu,Mo ol wom oli olsem blangket blong yu.’
12 !O boe blong delaet, yu we yu saen,Yu yu foldaon finis long heven i kam!!Yu we yu winim gud ol nesen,Oli katemaot yu yu foldaon long graon finis!+
13 Long hat blong yu, yu talem se: ‘Bambae mi go antap long heven.+
Bambae mi leftemap tron* blong mi, i go antap bitim ol sta blong God,+Mo bambae mi sidaon long bigfala hil ya blong mitingLong ples ya long not we i stap longwe olgeta.+
14 Bambae mi go antap long top blong ol klaod,Bambae mi mekem mi mi sem mak long God ya we i Hae Olgeta.’
15 Be bambae yu yu godaon long Gref,*Long hol ya we i daon moa long ol narafala hol.
16 Olgeta we oli stap long taem ya, bambae oli stap lukluk yu,Bambae oli lukluk gud yu, oli talem se:‘?I no man ya nao we i stap mekem wol i seksek,Mo i mekem ol kingdom oli fraet, oli seksek?+
17 ?Mo i no hem we i mekem wol ya we ol man oli stap long hem, i kam olsem draeples,Mo i stap winim ol taon blong hem,+Mo i no wantem letem ol prisena blong hem oli gohom?’+
18 Olgeta narafala king blong ol nesen,Yes olgeta evriwan, oli berem olgeta long fasin we i soem respek,Olgeta wanwan oli stap long prapa tomb* blong olgeta.
19 Be yu, oli sakemaot bodi blong yu i stap nomo we yu no gat gref,Yes, olsem wan niufala sut* we man i no laekem nating,Mo ol dedbodi oli kavremap gud yu, hemia dedbodi blong olgeta we ol man oli sperem olgeta long naef blong faet,Mo oli sakem olgeta i godaon long hol blong ol ston,Olsem wan dedbodi we man i wokbaot antap long hem.
20 Bambae yu no joen wetem olgeta long gref,From we yu yu spolem graon blong yu wan,Yu kilim ol prapa man blong yu finis.
Ol pikinini blong ol man nogud bambae ol man oli no moa tokbaot nem blong olgeta.
21 Yufala i rerem wan ston blong oli kilim ol boe blong hem long hemFrom ol nogud samting we ol olfala blong olgeta oli mekem,Olsem nao, bambae oli no girap mo rulum wol yaMo mekem graon ya i kam fulap long ol taon blong olgeta.”
22 Jehova komanda blong ol ami i talem se: “Bambae mi girap agensem olgeta.”+
Jehova i talem se: “Mo bambae mi waepemaot nem blong ol man mo smol haf blong ol man we oli stap yet, mo ol laen mo fiuja blong olgeta, long Babilon.”+
23 Jehova komanda blong ol ami i talem se: “Mo bambae mi mekem ples ya i kam ples blong pokupaen,* mo i kam rijen blong swam, mo mi tekem wan brum blong tekemaot evri samting, mi brum long ples ya.”+
24 Jehova komanda blong ol ami i mekem wan strong tok finis se:“Bambae i mas kamtru, stret olsem we mi wantem,Mo samting we mi mekem desisen long hem finis, hemia nao samting we bambae i kamtru.
25 Bambae mi smasem man Asiria ya long graon blong mi,Mo long ol bigfala hil blong mi, bambae mi wokbaot antap long hem.+
Bambae mi tekemaot yok blong hem long olgeta,Mo ol hevi samting blong hem we i stap long solda blong olgeta, bambae oli kamaot.”+
26 Hemia desisen we i stap rere finis* agensem olgeta kantri long wol,Mo hemia nao han we oli stretem rere finis blong agensem* olgeta nesen.
27 Jehova komanda blong ol ami i mekem plan ya finis,Taswe ?hu i save jenisim?+
Hem i stretem han blong hem finis,Taswe ?hu i save benem i gobak?+
28 Long yia we King Ahas i ded,+ ol tok ya oli kamaot se:
29 “Ol man Filistia, i no mas gat wan long yufala nating i glad,From we wokingstik blong man we i stap wipim yufala i brok finis.
Mo wan posen snek+ bambae i kamaot long rus blong snek,+Mo pikinini blong hem bambae i wan snek we i gat faea mo i stap flae.*
30 Long taem we fasbon pikinini blong man we i no gat nem, i stap kakae gud,Mo puaman i stap ledaon we i harem se i sefgud,Bambae mi mekem se i gat hadtaem blong kasem kakae nao rus blong yu bambae i ded,Mo eni samting blong yu we i stap yet, bambae oli kilim hem tu i ded.+
31 !O get, yu krae bigwan! !O bigfala taon, yu singaot bigwan!!O ol man Filistia, yufala evriwan bambae tingting blong yufala i lus!From we wan samting olsem smok i aot long not i stap kam,Hemia wan bigfala grup blong ol soldia, mo i no gat wan long olgeta we i wokbaot sloslo hem wan.”
32 ?Bambae oli ansa olsem wanem long ol mesenja blong nesen?Bambae oli ansa se Jehova i putum fandesen blong Saeon finis,+Mo ol man blong hem we oli no gat nem, bambae oli go long hem blong haed.
Ol futnot
^ NT: “bambae hem i mekem olgeta oli spel.”
^ NT: “bambae oli rul long bos blong ol slef.”
^ NT: “yufala i jikim.”
^ NT: “Bos blong ol slef.”
^ PT: “ol man nani.”
^ NT: “jea blong king.”
^ PT: “haos.”
^ NT: “wan branj.”
^ Hemia wan kaen rat we i gat ol nidil blong protektem hem. Long Inglis nem blong hem porcupine.
^ PT: “Hemia plan we oli plan long hem finis.”
^ NT: “rere finis blong kilim ol man blong.”
^ NT: “bambae oli ol posen snek we oli muv kwiktaem.”
