Seken Samuel 5:1-25
5 Sam taem afta, olgeta traeb blong Isrel oli kam luk Deved long Hebron,+ mo oli talem se: “!Yu luk! Mifala evriwan ya i stret blad blong yu.*+
2 Fastaem, taem Sol i king blong yumi, yu nao yu stap lidim ol man Isrel oli go faet.+ Mo Jehova i bin talem long yu se: ‘Olsem wan man blong lukaot long sipsip, bambae yu lukaot long ol man Isrel we oli ol man blong mi, mo bambae yu kam lida blong olgeta.’”+
3 Ale olgeta elda long Isrel oli kam luk king long Hebron. Mo long fes blong Jehova, King Deved i mekem wan kontrak wetem olgeta+ long Hebron. Biaen oli makemaot Deved blong i kam king blong Isrel.+
4 Deved i gat 30 yia taem hem i kam king, mo hem i rul blong 40 yia.+
5 Taem hem i stap long Hebron, hem i rulum ol man Juda blong 7 yia mo 6 manis. Mo taem hem i stap long Jerusalem,+ hem i rulum olgeta man Isrel mo Juda blong 33 yia.
6 Nao king wetem ol man blong hem oli go long Jerusalem, blong faet agensem ol man Jebus,+ hemia ol man we oli stap long ples ya. Be olgeta ya oli jikim Deved, se: “!Bambae yu neva kam insaed long ples ya! Ol blaenman mo olgeta tu we leg blong olgeta i nogud, bambae oli ronemaot yu.” Olgeta ya oli ting se Deved bambae i neva go insaed long ples we oli stap long hem.+
7 Be Deved i go holemtaet strong ples blong haed long Saeon, we naoia nem blong hem Taon Blong Deved.+
8 Long dei ya, Deved i talem se: “Olgeta we oli go blong kilim ol laen blong Jebus ya, oli mas folem tanel blong wota blong go insaed long taon mo kilim ‘ol blaenman mo olgeta we leg blong olgeta i nogud,’ we Deved* i no laekem olgeta nating.” Hemia nao from wanem oli talem se: “Ol blaenman mo olgeta we leg blong olgeta i nogud bambae oli no save kam insaed long haos.”
9 Biaen Deved i kam stap long strong ples ya, mo oli singaot* ples ya se Taon Blong Deved. Nao Deved i wokem sam moa haos mo stonwol long taon ya mo long Smol Hil* ya.+
10 Long fasin ya Deved i stap kam strong moa,+ mo Jehova, God ya we i komanda blong ol ami, i stap wetem hem.+
11 Nao King Hiram+ blong Taea i sanem ol mesenja blong oli kam luk Deved. Mo tu, hem i sanem ol timba blong sida,+ ol kapenta, mo ol man we oli stap bildim ol haos long ston, blong oli bildim ol stonwol, nao oli stat blong bildim haos* blong Deved.+
12 Mo Deved i save se Jehova i mekem rul blong hem long Isrel i stap strong,+ mo i mekem kingdom blong hem i kam antap moa,+ blong givhan long ol man blong Hem long Isrel.+
13 Deved i tekem sam narafala woman bakegen+ mo sam moa waef blong hem long Jerusalem afta we i aot long Hebron, mo hem i gat plante moa boe mo gel.+
14 Hemia nem blong olgeta we hem i bonem olgeta long Jerusalem: Samua, Sobab, Natan,+ Solomon,+
15 Ibara, Elisua, Nefeg, Jafia,
16 Elisama, Eliada, mo Elifelet.
17 Taem ol man Filistia oli harem se oli makemaot Deved blong i king blong Isrel,+ olgeta evriwan oli kam blong lukaot Deved.+ Taem Deved i harem samting ya, hem i godaon blong haed long wan ples we i had blong man i go long hem.+
18 Biaen ol man Filistia oli kam insaed long Vali* Long Refaem mo oli go olbaot long ples ya.+
19 Deved i askem long Jehova+ se: “?Bambae mi go faet agensem ol man Filistia? ?Bambae yu putum olgeta long han blong mi?” Nao Jehova i talem long hem se: “Yu go, from we bambae mi putum ol man Filistia long han blong yu.”+
20 Ale Deved i go long Balperajim mo i kilim i ded ol man Filistia long ples ya. Mo hem i talem se: “Jehova i go fastaem long mi, i spolem ol enemi blong mi+ olsem wota we i ron strong, nao i brekemdaon wan stonwol.” Hemia nao from wanem hem i putum nem blong ples ya se Balperajim.*+
21 Ol man Filistia oli ronwe long ol aedol blong olgeta long ples ya, nao Deved wetem ol man blong hem oli tekemaot ol aedol ya.
22 Biaen ol man Filistia oli kam blong faet agensem olgeta bakegen long Vali* Long Refaem, mo oli go olbaot long ples ya.+
23 Nao Deved i askem long Jehova se bambae hem i mekem wanem, be hem i talem se: “Yu no go stret long olgeta, be yu pas raon biaen long olgeta, mo yu kam agensem olgeta long fored long bus blong baka.
24 Taem yu harem noes i kamaot antap long ol tri blong baka, noes blong ol soldia oli maj, yu mas tekem aksen kwiktaem, from we Jehova bambae i go fastaem long yu blong kilim i ded ami blong ol man Filistia.”
25 Ale Deved i mekem stret olsem we Jehova i talem long hem, mo hem i kilim i ded ol man Filistia ya,+ stat long Geba+ go kasem Gesa.+
Ol futnot
^ NT: “yumi evriwan i famle.”
^ NT: “sol blong Deved.”
^ MNT: “hem i singaot.”
^ NT: “Milo.” Wan Hibru tok we i minim “fulumap.”
^ NT: “pales.”
^ NT: “Levelples Long Medel Blong Ol Hil.”
^ Hemia i minim “Masta Ya We i Man Blong Brekem Ples i Gotru.”
^ NT: “Levelples Long Medel Blong Ol Hil.”
