Seken Buk Blong Kronikel 17:1-19
17 Mo boe blong hem Jehosafat+ i kam king long ples blong hem, mo i mekem posisen blong hem long Isrel i kam strong.
2 Hem i putum ol ami long olgeta taon blong Juda we stonwol i goraon long olgeta, mo i putum ol grup blong ol soldia long ples ya Juda mo long ol taon blong Efrem we papa blong hem Asa i bin holemtaet olgeta.+
3 Jehova i gohed blong stap wetem Jehosafat, from we hem i gohed blong wokbaot long rod we olfala blong hem Deved i bin wokbaot long hem bifo,+ mo hem i no lukaotem ol god ya Bal.
4 Hem i lukaotem God blong papa blong hem,+ mo i folem* komanmen blong hem, be i no folem fasin blong ol man Isrel.+
5 Nao Jehova i gohed blong mekem se kingdom i stap strong long han blong Jehosafat.+ Mo olgeta man Juda oli gohed blong givim ol presen long hem, mo hem i gat plante plante rij samting mo haenem.+
6 Mo hem i mekem tingting blong hem i strong blong folem ol rod blong Jehova, mo tu hem i tekemaot ol hae ples+ mo ol tabu pos*+ we oli stap long Juda.
7 Nao long namba 3 yia blong rul blong hem, hem i sanem tok i go long ol prins blong hem, hemia Benael, Obadaea, Sekaraea, Netanel, mo Mikaea blong oli kam luk hem, mo i sanem olgeta oli go long ol taon blong Juda blong tijim ol man.
8 Mo i gat sam Livaet we oli go wetem olgeta: Hemia Semaea, Netania, Sebadia, Asahel, Semiramot, Jehonatan, Adonaejah, Tobaejah, mo Tobadonaejah. Mo Elisama wetem Jehoram we tufala i pris, tufala tu i go wetem olgeta.+
9 Oli tekem buk blong Loa blong Jehova i go wetem olgeta, nao oli stat blong tijim ol man long Juda.+ Oli goraon long olgeta taon blong Juda blong tijim ol man.
10 Nao Jehova i mekem se olgeta kingdom blong ol kantri we oli stap raonabaot long Juda oli fraet, nao oli no faet agensem Jehosafat.
11 Mo ol man Filistia oli kam givim ol presen mo mane long Jehosafat blong pem takis long hem. Mo ol man Arebia oli kam givim 7,700 man sipsip long hem mo 7,700 man nani.
12 Nao Jehosafat i stap kam strong moa,+ mo hem i gohed blong wokem ol ples we stonwol i goraon long olgeta+ long Juda mo ol taon blong putumgud ol samting.+
13 Hem i mekem plante bigbigfala projek long ol taon blong Juda, mo hem i gat ol soldia, hemia ol strong man blong faet, long Jerusalem.
14 Olgeta ya oli stap long ol grup folem haos blong papa blong olgeta: Long laen blong Juda, ol lida blong taosen man, i gat lida ya Adnaha we i lukaot long 300,000 strong man blong faet.+
15 Mo aninit long hem, i gat lida ya Jehohanan we i lukaot long 280,000 soldia.
16 Mo tu, aninit long Adnaha i gat Amasia we i boe blong Sikri we i volontia blong mekem wok blong Jehova, mo hem i lukaot long 200,000 strong man blong faet.
17 Mo long laen blong Benjamin,+ i gat Eliada we i wan strong man blong faet, mo hem i lukaot long 200,000 man we oli gat ol bonara mo ol sil.+
18 Mo aninit long hem, i gat Jehosabad we i lukaot long 180,000 man we oli rere blong faet.
19 Olgeta ya oli stap mekem minista wok blong king. Mo tu, i gat ol narafala we king i putum olgeta long ol taon we stonwol i goraon long olgeta, long olgeta ples long Juda.+
