Long wan bigfala eria blong Finlan, Nowei, mo Swiden, i gat ol man we nem blong olgeta Sami, mo oli gat prapa kastom, fasin, mo lanwis blong olgeta. I no longtaem i pas, ol Witnes blong Jehova oli mekem tu samting blong talemaot ol tok blong Baebol long ol Sami.

Fas samting: Long 2015, bifo we ples i kolkol tumas, ol Witnes oli wokem ol buk mo video long lanwis blong Sami. a Seken samting: Long 2016 mo 2017, ol Witnes oli makemaot tu spesel taem blong go long Laplan, blong serem ol save ya wetem ol man Sami. Laplan i stap longwe long ol taon, mo ol dia nomo oli wokbaot olbaot long ples ya.

Long taem blong spesel wok ya long Mei 2017, i gat moa long 200 Witnes blong Finlan, Nowei, mo Swiden, we oli glad blong go long ol smosmol vilej long wan bigfala ples we i kavremap plante taosen kilometa blong Laplan. Sam Witnes oli lanem blong toktok smol long lanwis Sami, mo hemia i mekem ol man Sami oli glad tumas. Denis, we i go long vilej ya Karigasniemi, i talem se: “Ol man ya oli glad tumas taem mifala i traehad blong toktok smol long lanwis. Oli harem save se mifala i wantem tumas blong givhan long olgeta.”

Ol man Sami oli laekem tumas ol samting raonabaot we God i wokem mo ol animol, taswe oli glad tumas long promes blong Baebol long saed blong paradaes long wol. (Ol Sam 37:11) Wan woman Sami we i stadi long buk ya !Gud Nius We i Kamaot Long God! i lanem samting we God bambae i mekem long ol man. Nao hem i wantem save from wanem pasta blong hem i neva tokbaot paradaes long wol.

Plante oli talem tangkiu long ol Witnes we oli kam. Wan man we i gat wan stoa, i talem gudfala toktok long tu Witnes, se tufala i stap mekem “wan gudfala wok we i impoten long komuniti.” Hem i talem se tufala i mas kam long stoa blong hem blong tekem ol kakae we tufala i nidim, mo hem nomo bambae i pem.

Long taem blong spesel wok ya, ol Witnes oli soem 180 video mo givimaot 500 buk long ol man Sami. Plante long olgeta oli wantem karem evri buk we i kamaot long lanwis blong olgeta. Mo tu, ol Witnes blong Jehova oli stat blong stadi Baebol wetem 14 man mo woman.

Sam man Sami we oli ridim ol buk blong ol Witnes, oli glad tumas long wok blong transletem ol buk ya. Nila Tapiola, we i tija long wan praemari skul mo i memba blong palemen blong Sami, i talem se: “Translesen blong ol buk ya i nambawan.” Hem i gohed se: “I isi blong ridim ol buk ya, mo i klia se ol transleta oli save gud lanwis Sami.” Wan man Sami we i stap long not olgeta long Finlan, i talem se: “Ol man we oli transletem ol buk ya oli save gud wok ya.”

Long Karigasniemi, we i stap long boda blong Finlan mo Nowei, wan Witnes i tokbaot fas japta blong buklet ya !Gud Nius We i Kamaot Long God! wetem wan Sami we i wan tija. Tija ya i talem se olgeta we oli transletem buklet ya oli mekem nambawan wok, mo i askem long ol Witnes sipos hem i save yusum buklet ya long skul, blong tijim ol pikinini blong toktok gud lanwis Sami.

Oli transletem plante video mo traket wetem wan buklet tu, i go long lanwis Sami. Long 29 Februari 2016, Websaet ya jw.org i kamaot long lanwis Sami. Evri manis, i gat bitim 400 man Sami we oli go long Websaet ya, mo oli daonlodem samwe long 350 buk, video, o rikoding.

Spesel wok ya i givhan long ol man Sami mo long olgeta tu we oli go visitim olgeta. Henrik mo Hilya-Maria we tufala i go long vilej ya Utsjoki, i talem se ol man Sami “oli luk se Baebol i save givhan long olgeta long plante defren rod.” Lori mo Inga we tufala i go long sem vilej ya, i talem se: “Spesel wok ya i mekem mifala i tingbaot we God i mekem i sem mak long olgeta man. Mifala i glad tumas blong soemaot long ol man ya long ol ples long bus, se God i lavem olgeta.”