Long COVID-19 pandemik, ol brata mo sista oli jenisim fasin blong olgeta blong talemaot ol gudfala tok blong Baebol long ol narafala. Oli no go long ol pablik ples o long haos blong ol man, be oli yusum telefon mo raetem ol leta blong prij. a Plante man oli talem tangkiu from we oli traehad olsem, mo i klia se Jehova i blesem olgeta. (Ol Proveb 16:3, 4) Tingbaot sam ekspiriens we oli hapen long wan grup blong ol aelan.

 Bifo long pandemik, Helen i stap visitim wan yangfala woman, mo i askem long woman ya sipos hem i wantem stadi Baebol. Woman ya i no wantem. Nating se i olsem, jes bifo we COVID-19 lokdaon i stat, Helen i givim wan Baebol long hem wetem buk ya ?Baebol i Tijim Wanem? Taem lokdaon i stap gohed, Helen i askem bakegen long hem sipos hem i wantem stadi Baebol. Hem i eksplenem se tufala i save yusum telefon. Ale, yangfala woman i talem yes. !Hem i laekem tumas ol stadi we tufala i mekem, mo hem i talem long Helen se i wantem stadi evri dei! Mo tu, hem i stat blong joen long ol miting long fon blong hem. Antap long hemia, woman ya i stat blong folem ol tijing blong Baebol long laef blong hem, mo hem i serem ol samting we hem i lanem wetem ol narafala.

 Ol Witnes long wan kongregesen oli raetem leta long ol polis long ples blong olgeta, blong talem tangkiu from gudfala wok we oli stap mekem. Ol polis oli sapraes blong kasem ol leta olsem. Wan long olgeta i talem long wan elda we nem blong Jefferson, se: “Mi bin ting se ol Witnes blong Jehova oli agensem ol polis.” Jefferson i eksplenem se hemia i no tru. Polis ya i glad tumas long ol gudfala toktok long ol leta ya, nao hem i putum olgeta long notisbod long doa blong polis stesen. Wan narafala polis i talem se: “Maet ol leta ya oli givhan long ol man blong oli gat gudfala tingting long mifala.”

 Edna mo Ednalin, tufala i fultaem paenia. b Tufala i no save joen long ol miting long Zoom from we tufala i no gat Intenet long haos blong tufala. Ale tufala i ring long wan neba we i no wan Witnes, tufala i askem long hem sipos tufala i save joen long Intenet blong hem mo pem hem from. Woman ya i letem tufala i joen fri nomo. Ale Edna mo Ednalin i askem long hem sipos hem tu i wantem joen long ol miting, mo hem i talem yes. Naoia, neba wetem wan pikinini blong hem mo tu smol bubu oli stadi Baebol wetem ol Witnes, mo oli stap joen oltaem long miting.

 Long wan ples, ol brata mo sista oli singaot ol neba, olgeta we oli wok wetem olgeta, mo ol narafala man, blong oli lesin long wan pablik tok long Zoom. Ilen, we i wok long hospital, i fraet blong singaot olgeta we oli wok wetem hem. Hem i ting se sam dokta oli no gat gudfala tingting long ol Witnes. Nating se i olsem, hem i teksem ol dokta long hospital blong invaetem olgeta. I gat tu dokta we Ilen i fraet bigwan blong invaetem, wan man mo waef blong hem. Be Ilen i tingting gud mo i prea long saed ya, nao hem i teksem tufala. Waef i teks i kambak se: “?Yu wantem mi mi joen long jos blong yu a?” Ilen i talem long hem se evriwan oli welkam blong kam long miting ya, i no ol Witnes blong Jehova nomo. !Long nekis dei, Ilen i sapraes blong luk se kapol ya i konek eli long Zoom! Hem i talem se: “Bifo we miting i finis, mi kasem wan teks mesej long waef, we i talem se: ‘Hemia fastaem mi bin joen long wan miting blong ol Witnes blong Jehova. Hem i gud, mo mi laekem tumas. Tangkiu blong invaetem mi.’”

 Ilen i singaot 20 dokta, mo hem i glad tumas taem 16 oli joen long miting. Hem i yusum tok blong aposol Pol, taem hem i talem se: “Mi glad tumas se mi ‘mekem tingting blong mi i strong’ blong talemaot ‘gud nius blong God’ long olgeta we oli wok wetem mi.”—1 Tesalonaeka 2:2.

 Pandemik i mekem laef blong evriwan i had. Be ol brata mo sista long ol aelan ya mo long ol narafala ples tu, oli gohed blong mekem samting we oli naf blong mekem blong kamfotem mo halpem ol narafala, mo hemia i mekem se oli holemtaet glad mo gudfala tingting.—Ol Wok 20:35.