Long India, hasban blong Sowbhagya i lukaot gud long hem mo smol gel blong tufala Meghana, we i gat tri yia nomo. Be long 2005, man ya i ded, nao i had blong Sowbhagya i winim naf mane blong pem ol samting we hem mo smol gel blong hem i nidim blong laef.

 Antap long samting ya, ol narafala oli no wantem givhan long Sowbhagya. Famle blong hem i lukluk daon long hem mo smol gel blong hem, oli stap talem se tufala i wan baden long olgeta. Blong traem harem gud, Sowbhagya i stat blong go long jos, be olgeta long jos ya oli lukluk daon long hem tu from we hem i pua. Sowbhagya i stat blong lukaotem wan wok blong i save sapotem hem wan mo smol gel blong hem. Nating se hem i traehad, be hem i no save faenem wok.

 Hem i talem se: “Mi harem olsem se mi gud blong nating nomo, ale mi mekem desisen blong kilim mi wan i ded. Be mi save se smol gel blong mi bambae i fesem hadtaem sipos mi mi no stap. Taswe mi mekem desisen blong finisim laef blong mitufala tugeta.” Filing ya blong harem nogud from i no gat wan i lavem hem, i pulum Sowbhagya blong go long stoa mo pem sam posen.

 Taem hem i stap gobak long haos long tren, wan Witnes blong Jehova we nem blong hem Elizabeth, i stat blong storian wetem hem. Sowbhagya i eksplenem se hem i no gat wok, mo long kaen fasin Elizabeth i talem se hem i glad blong halpem hem blong faenem wok. Mo Elizabeth i talem tu, se hem i stap go blong mekem Baebol stadi wetem wan narafala. Sowbhagya i sapraes long samting ya, from we hem i bin go long plante jos, be hem i neva harem oli tokbaot Baebol stadi. Elizabeth i invaetem Sowbhagya blong visitim hem blong faenemaot moa long saed blong Baebol stadi ya.

 Taem Sowbhagya i kasem haos, hem i gat plan yet blong kilim i ded hem wan mo smol gel blong hem. Be wan famle i tekem Meghana i go long wan trip, taswe Sowbhagya i ting se bambae hem i wet kasem we gel i kamhom blong gohed long plan ya.

 Taem hem i stap wet, hem i go visitim Elizabeth. Elizabeth i welkamem hem mo i soemaot wan buk long hem, nem blong buk ya ?Wanem Samting We Baebol i Rili Tijim? Japta ya “?Ol Dedman Oli Stap Wea?” i pulum ae blong Sowbhagya from we hasban blong hem i jes ded i no longtaem. Long sem dei ya, Sowbhagya i talem se hem i wantem stadi Baebol.

 Elizabeth i invaetem hem blong kam long bigfala asembli wan wik biaen, mo Sowbhagya i talem se bambae hem i kam. Program blong asembli ya i gat bigfala paoa long hem, mekem se hem i wantem kam wan Witnes blong Jehova. Mo tu, taem hem i stap gobak long haos, hem i faenem wan wok.

 Sowbhagya i gohed blong stadi Baebol. Nao tingting blong hem i jenis, hem i no moa wantem ded, be hem i faenem wan gudfala risen blong gohed blong laef. Hem i baptaes, mo biaen, Meghana tu i baptaes. Naoia, tufala i stap mekem wok blong fultaem paenia, mo Meghana i wok olsem rimot volontia long wan translesen ofis long India.

 Tufala i glad tumas se Elizabeth i bin storian wetem Sowbhagya long tren, i soemaot intres long hem, mo i tokbaot trutok. Tufala i talem bigfala tangkiu long Jehova tu. Meghana i talem se: “Sipos mi mo Mama i no bin harem trutok long dei ya, mitufala i ded longtaem finis. Naoia mitufala i glad tumas. Mitufala i stap wet long taem ya we mitufala i save hagem papa blong mi bakegen, tijim hem long saed blong Jehova, mo talem long hem olsem wanem Jehova i sevem laef blong mitufala.”