Sam man oli tekem longtaem blong lanem samting from ol trabol we oli kasem. Mi mi kaen man olsem. Mi mi bon mo mi gruap long Barcelona, we hem i namba tu bigfala taon long Spen. Famle blong mi i laef long wan eria we i kavremap bigfala ples klosap long solwota, mo oli singaotem se Somorrostro. Plante man oli savegud eria ya from we i gat plante raf fasin mo oli stap salem drag tu.

 Mifala naen pikinini long famle, mo mi mi fasbon. Mifala i pua tumas taswe papa i sanem mi mi go wok olsem boe we i stap pikimap balong long ples blong plei tenis. Mi gat ten yia nomo, mo mi wok ten aoa long wan dei. Taswe mi no save go long skul olsem ol narafala pikinini. Taem mi gat 14 yia, mi go wok long wan ples we oli wokem ol samting long aean.

 Long 1975, oli singaotem mi mi go long ami, folem loa blong kantri. Mi wantem traem sam niufala samting long laef, taswe mi askem blong joenem wan grup blong ol ami blong Spen we oli stap long Melilla, wan ples long not Afrika we ol man Spen nomo oli stap long hem. Taem mi laef longwe, mi stat blong tekem drag mo dring bitim mak.

 Taem mi lego Melilla mo kambak long Barcelona, mi statem wan rabis grup. Mifala i stilim eni samting. Biaen mifala i salem ol samting ya blong pem drag. Mi stat blong tekem ol rabis drag (LSD mo amphetamines), mi slip wetem ol woman olbaot, mi dring bitim mak mo mi plei laki tu. From samting ya, fasin blong mi i kam raf tumas. Oltaem mi karem naef o akis wetem mi, mo mi no fraet blong yusum blong kilim wan man.

 Wan taem, mifala i stilim wan trak mo polis i ronem mifala. I olsem long wan muvi stret. Mifala i ron kasem 30 kilometa olsem, mo polis i stat blong sutum mifala. Trak blong mifala i aksiden mo mifala i ronronwe. Taem Papa i faenemaot samting ya, hem i sakemaot mi long haos.

 Long ol faef yia we i kam biaen, mi mi slip long rod nomo. Mi slip fored long doa blong ol bilding, insaed long ol trak, long ol jea long ples blong spel, mo long beregraon. Mo tu, mi laef smol taem insaed long wan hol blong ston. Mi no gat wan risen blong laef. Mi harem se nomata mi laef o mi ded, i oraet nomo. Wan taem, afta we mi tekem drag, mi katkatem tufala han blong mi go kasem antap. Mak blong soa ya i stap kasem tede.

 Taem mi gat 28 yia, mama blong mi i kam faenem mi mo i askem long mi blong gobak long haos. Mi talem yes mo mi promes se bambae mi jenisim laef blong mi. Be i tekem taem blong mekem samting ya i kamtru.

 Wan aftenun, tu Witnes blong Jehova i noknok long doa. Taem mi stap lesin long tufala, papa i singaot long mi blong mi satem doa long tufala. Be from we mi no laekem tumas blong obei, mi gohed nomo blong lesin. Tufala i givim tri smol buk long mi. Mi askem long tufala weples oli stap mekem ol miting, mo sam dei biaen, mi go long Haos Kingdom.

 Mi makem se olgeta we oli go long Haos Kingdom oli klin mo ol klos blong olgeta oli stret. Be mi, mi gat longfala hea, longfala mustas, mo ol klos blong mi oli doti. I klia nomo se mi mi no stret blong go insaed, taswe mi stanap nomo afsaed. Be mi sapraes blong luk Juan long Haos Kingdom, wan memba blong rabis grup blong mifala bifo, mo hem i jenis gud. Biaen, mi kasemsave se hem i kam wan Witnes blong Jehova wan yia i pas. Taem mi luk hem, tingting blong mi i strong blong go insaed mo joen long miting. Long taem ya, laef blong mi i stat blong jenis.

 Mi agri blong stadi Baebol, mo kwiktaem nomo mi kasemsave se mi mas jenisim ol fasin blong mi, blong mekem God i glad long mi. I no isi blong mekem ol jenis ya. Be mi lanem se blong mekem Jehova i glad, mi mas “jenisim tingting blong [mi] blong jenis fulwan.” (Rom 12:2) Fasin sore blong God i tajem hat blong mi. Nating se mi mekem plante nogud samting, be mi harem se God i stap givim janis long mi blong jenisim ol fasin blong mi. Ol samting we mi lanem long saed blong Jehova God oli tajem hat blong mi. Mi luksave klia se i gat wan God we i wokem yumi mo i kea long mi.​—1 Pita 5:6, 7.

 Ol samting we mi lanem oli pusum mi blong mi stat blong mekem sam bigfala jenis. Olsem taem mifala i tokbaot fasin blong smok long Baebol stadi, mi stap tingting se: ‘!Sipos Jehova i wantem se mi stap klin long evri haf blong laef, mi mas sakem ol sigaret ya!’ (2 Korin 7:1) !Ale mi sakem olgeta long tin doti!

 Mo tu, fasin blong mi blong yusum mo salem drag i mas stop. Be i tekem taem blong mekem olsem, mo mi mas traehad bigwan. Mi save se blong stopem samting ya, mi mas sakemaot ol rabis fren blong mi. Mi no save gohed gud long trutok taem mi stap joen wetem olgeta. Sloslo, mi lanem blong dipen moa long Jehova. Ol niufala fren blong mi long kongregesen, olgeta tu oli givhan gud long mi. Oli lavem mi mo oli kea long mi. I no gat man we i mekem olsem bifo. Taem ol manis oli pas, mi no moa tekem drag mo mi putum “niufala fasin” we i givhan long mi blong mi mekem samting we God i wantem. (Efesas 4:​24) Long Ogis 1985, mi baptaes blong kam wan Witnes blong Jehova.

 Baebol i jenisim laef blong mi bigwan. Hem i mekem mi mi fri long fasin blong laef we i stap spolem bodi blong mi, mo we i mekem se mi ting nating long mi wan. I gat bitim 30 fren blong mi we mifala i joen long rabis grup ya bifo, oli ded taem oli no olfala yet, from sik ya AIDS mo sam narafala sik we man i kasem taem i tekem drag. Mi glad tumas we mi folem ol gudfala advaes long Baebol, nao mi no kasem ol sik olsem.

 Naoia mi no moa holem ol naef mo akis olsem bifo. Mi neva ting se wan dei bambae mi save holem Baebol long han blong mi, mo yusum blong givhan long ol man. Naoia mi mo waef blong mi i prij fultaem olsem ol Witnes blong Jehova.

 Papa mo mama blong mi i neva kam Witnes blong Jehova, be tufala i glad long ol gudfala samting we i hapen long mi taem mi stadi Baebol. Wan taem papa i bin toktok gud long saed blong ol Witnes, long fored blong ol fren blong hem. Hem i luksave klia se bilif blong mi i jenisim laef blong mi. Samtaem Mama i talem se mi sud stadi Baebol longtaem finis. !Mi tu mi agri long samting ya!

 Laef blong mi bifo i soemaot long mi se mi no save faenem trufala glad taem mi mekem ol rabis fasin mo tekem drag. Naoia mi faenem trufala glad taem mi tijim ol narafala long trutok blong Baebol, ol trutok we oli sevem laef blong mi.