Ilyo umwana umo amwene icushi cilefuma uko bapangila ifintu, atendeke ukutontonkanya ukuti cilya cushi e cipanga amakumbi. Ici calengele atendeke ukutontonkanya ukuti muli filya fikuulwa e mo bapangila amakumbi. Tulaseka nga twamona ifyo abana batontonkanya pa fintu. Na lyo line, cilabipa sana nga ca kuti tatwishibe icishinka pa fintu fimo. Ku ca kumwenako, nga ca kuti pa cikopo ca muti pali ishina lya muti umbi kuti cabipa sana nga twanwa uyo umuti.

Ukukanaishiba icine pa fya kwa Lesa kwena kwalibipa ukucila no kukaanaishiba ishina lya cine ilya muti. Ku ca kumwenako, abantu bamo tabaumfwikishe ifyo Yesu alesambilisha. (Yohane 6:48-68) Mu nshita ya kufwaya ukwishibilapo na fimbi, balikeene fye fyonse ifyo Yesu abasambilishe. Ici calibipile sana.

Bushe mulabelenga Baibolo pa kuti mulekonka ifyo ilanda? Nga mulacita ifi, ninshi mulacita bwino. Nomba bushe kwaliba ifyo nalimo mwingafilwa ukumfwikisha ilyo mulebelenga Baibolo? Abantu abengi balafilwa ukumfwikisha fimo. Natulande pa fintu fitatu ifyo abantu bamona kwati e fyo Baibolo isambilisha, lelo ifishili fya cine.

• Abantu bamo tabaishiba umwalola amashiwi ya kuti “Tiina Lesa wa cine.” Bamona kwati bafwile ukutiina Lesa pa kuti e bakanda. (Lukala Milandu 12:13) Nomba Lesa tafwaya abamupepa ukulamutiina muli iyi nshila. Atweba ati: “Witiina, pantu ndi na iwe. Wilasakamana, pantu nine Lesa obe. Nkakukosha. Nkakwafwa.” (Esaya 41:10) Amashiwi ya kuti ukutiina Lesa yalola mu kuti tufwile ukumucindika sana.

• Abantu bamo tabomfwikisha amwalola amashiwi ya kuti: “Icintu conse calikwata inshita ya ciko, . . . kwaliba inshita ya kufyalwa ne nshita ya kufwa.” Batontonkanya ukuti Lesa alipimina cila muntu inshita iyo akafwa. (Lukala Milandu 3:1, 2) Na lyo line, ili ilembo lilanda fye pa fitucitikila, no kutila bonse fye tulafwa. Icebo ca kwa Lesa, cilanda no kuti ifyo tucita kuti fyalenga twafwa bwangu nelyo iyo. Ku ca kumwenako, Baibolo itila: “Ukuba na katiina kuli Yehova kukalundako inshiku.” (Amapinda 10:27; Amalumbo 90:10; Esaya 55:3) Bushe ifi kuti fyacitika shani? Nga ca kuti tulekonka ifyo Icebo ca kwa Lesa cilanda, tatwakulacita ifintu ifingatuletelela pamo nga bucakolwa no bulalelale.—1 Abena Korinti 6:9, 10.

• Abantu bamo bamona kwati Baibolo nga yatila imyulu ne sonde “fyasungilwa umulilo,” ninshi ilelanda ukuti Lesa akonaula isonde mu mulilo. (2 Petro 3:7) Nomba Lesa alanda ukuti takaleke isonde ukonaika. Lesa ashimpile “isonde pa cifulo ca liko icapampamikwa; Talyakatelentenshiwe umuyayaya, umuyayaya.” (Amalumbo 104:5; Esaya 45:18) Ico Lesa akonaula, bantu abacita ifyabipa te sonde iyo. Kanshi ilyo akonaula ababifi, cikaba kwati aonaula icalo ku mulilo. Na kabili Baibolo nga yalanda pa myulu ninshi ilelanda pa myulu iyo tumona na menso, umuulu umwaba intanda nelyo icifulo ukwikala Lesa. Nomba tapali nangu cimo pali ifi ico Lesa akonaula.

Nga fintu mwamona mu fya kumwenako ifyo twalandapo, abengi balafilwa ukumfwikisha ifyalembwa mu Baibolo. Nomba cinshi Lesa alekela abantu bamo belaumfwikisha ifyo Baibolo ilanda? Bamo kuti batila: ‘Apo Lesa alikwata sana amano kabili aleshiba ifintu fyonse, cinshi ashalembele fye Baibolo mu nshila ya kuti umuntu nga abelenga aumfwikisha ifyo alebelenga ukwabula ubwafya?’ Natulande pa fintu fitatu ifilenga abengi belaumfwikisha ifyo Baibolo ilanda.

1.   Baibolo yalembwa mu nshila ya kuti abengomfwikisha fye ifyo ilanda, bantu abaicefya kabili abafwaya ukusambilila. Yesu aebele Wishi ukuti: “Ndemulumbanya pa cintubwingi, mwe Tata, Shikulu wa muulu ne sonde, pantu mwalifishilisha ifi fintu ku ba mano na bacenjela, no kufisokolwela ku tunya.” (Luka 10:21) Baibolo yalembwa mu nshila ya kuti abantu fye abafwaya ukusambilila ifyabamo, e bengomfwikisha ifyo ilanda. Abantu abengi aba “mano na bacenjela” balakwata sana icilumba, ne ci cilalenga belaumfwikisha ifyaba mu Baibolo. Nomba abomfwikisha ifyaba mu Cebo ca kwa Lesa bantu abafwaisha ukusambilila kabili abaicefya kwati “tunya.”

2. Abantu abafwaya ukuti Lesa alebafwa ukwishiba ifyabamo e bo alembeele Baibolo. Yesu alandile ukuti pa kuti abantu bomfwikishe ifyo Baibolo ilanda kano Lesa abafwa. Bushe kuti abafwa shani? Yesu atile: “Kaafwa, umupashi wa mushilo, uo Tata akatumina mwi shina lyandi, akamusambilisha fyonse no kumwibukisha fyonse ifyo namwebele.” (Yohane 14:26) Kanshi Lesa alapeela umupashi wa mushilo, e kutila amaka ayo abomfya, pa kuti afwe abantu ukumfwikisha ifyo babelenga muli Baibolo. Nomba Lesa tapeela umupashi wakwe ku bantu abashifwaya ukuti alebafwa, ne ci cilalenga belaumfwikisha ifyo Baibolo ilanda. Umupashi wa mushilo ulalenga na Bena Kristu abaishiba ifingi pali Baibolo ukulasambilishako bambi pa kuti nabo bomfwikishe ifyo Baibolo ilanda.—Imilimo 8:26-35.

3. Amalembo ya mu Baibolo yamo kuti twayomfwikisha fye pa nshita yalinga. Ku ca kumwenako, kasesema Daniele bamwebele ukulemba pa fyali no kucitika ku ntanshi. Malaika amwebele ukuti: “Daniele kaka amashiwi aya no kukomenena ibuuku, ukufika ku nshita ya ku mpela.” Pa myaka iingi, abantu balebelenga ibuuku lya kwa Daniele, lelo balefilwa ukumfwikisha ifyo lilandapo. Na kuba, nangu fye ni Daniele wine taishibe umwalolele fimo ifyo alembele. Alandile ukuti: “Nalyumfwile, lelo nshailwike.” Mu kuya kwa nshita abantu baali no kumfwikisha umwalolele amashiwi Daniele alembele, nomba baali no kumfwikisha fye ayo mashiwi inshita Lesa alefwaya beshibilepo nga yafika. Malaika atile: “Kabiye, we Daniele, pantu aya mashiwi yalikakwa kabili yalikomenenwa ukufika ku nshita ya ku mpela.” Ni bani baali no kwishiba umo yalolele? Baibolo itila, “Takuli ababifi nangu bamo abakeluka; lelo abashilimuka e bakeluka.” (Daniele 12:4, 8-10) Kanshi Lesa tasokolola umwalola amalembo yamo mpaka inshita yalinga yafika.

Bushe Inte sha kwa Yehova nabo balifilwapo ukwishiba ifyalembwa mu Baibolo pa mulandu wa kuti inshita yalinga yali tailafika? Ee. Nomba ilyo inshita yafikile iya kuti Lesa abasokolwele umo ayo amalembo yalolele, balyalwike mu fyo baishibe. Basumina ukuti balapashanya abatumwa ba kwa Kristu, pantu abatumwa baleyaluka nga ca kuti Yesu abalungika pa fintu fimo.—Imilimo 1:6, 7.

Tacibipa sana umwaice nga aishiba ifya bufi pa fyo amakumbi yapangwa, lelo ifyo Baibolo isambilisha fyalicindama sana kuli imwe. Kanshi tamufwile ukulaibelenga fye mweka capwila na apo pene, lelo mufwile ukufwaya aba kumwafwa ukumfwikisha ifyo isambilisha. Mulingile ukufwaya abantu ababelenga Baibolo kabili abaicefya, abantu abaleka umupashi wa mushilo ulebafwa ukwishiba ifyo Baibolo isambilisha, abantu abashininkisha ukuti ino e nshita iyo Lesa aletusokolwela ifingi sana pa fyalembwa mu Baibolo. Mufwile ukweba Inte sha kwa Yehova nelyo ukulabelenga sana ifyebo fyaba pa webusaiti ya jw.org/bem. Baibolo yatulaya ukuti: “Nga walilila ku kumfwikisha . . . , ukwishiba Lesa ukakusanga.”—Amapinda 2:3-5.