Nafyalilwe mu musumba uunono uwa mu Poland, mupepi na ku mupaka wa German. Ku ncende twaleikalila kwali sana amafarmu ne miti kabili takwaleba ifimfulunganya. Abafyashi bandi balefwaya naba umuntu umusuma, indecita bwino ku sukulu kabili balefwaya ukuti nkalebomba ne ncito iya pa muulu.

Amafya yatendeke ilyo naile mu kusambilila ifya buloya ku yuniversiti mu musumba wa Wrocław. Apo nalifumine pa bafyashi, natendeke ukwangala na bantu abali ne mibele iyabipa. Nalitemenwe ukulatamba umupila, nomba ukwangala na bantu abaali ne mibele yabipa kwalengele nacilamo ukulatamba umupila. Ibumba ilya bakateya ba mupila ilyo natemenwe lyali lya ku musumba wa Warsaw, kabili lyonse pa mpela ya mulungu, naleya konse uko ili ibumba lyaleya mu kuteyela umupila. Nga tuleya uko baleteyela umupila, ilingi line mu nshila twalenwa sana ubwalwa kabili twalebomfya ne miti ikola. Inshita shimo, twalelwa na balelumba ibumba ilileteya ne bumba natemenwe sana. Ilyo nalecita ifi, caleba kwati ndelabako ku mafya nalekwata, lelo nalishibe ukuti bakapokola nga banjikata, kuti nafilwa ukupwisha amasambililo yandi aya buloya.

Twaleya sana na banandi ku fiila na mu kucinda. Nga tuli ku fiila, ilingi line twalelwa sana na bantu. Pa miku iingi, bakapokola balenjikata, lelo lyonse imilandu yalepwa kabili limo limo nalebapeela na mafisakanwa. Nalemona kwati nali sana ne nsansa. Na lyo line, nalishibe ukuti ifyo nalecita tafyali bwino. E ico, lyonse pa Mulungu, naleya ku calici pa kuti ndeumfwako bwino pa fyo nalecita.

Mu 2004, ba Nte babili balintandilile kabili nalisumiine ukusambilila Baibolo nabo. Ilyo natendeke ukusambilila ifyo Umwina Kristu alingile ukuba, natampile ukumfwa ububi pa fyabipa ifyo nalecita. Nalishibe ukuti nshalingile ukulanwa sana ubwalwa, ukubomfya imiti bubi bubi e lyo no kwangala na bantu abacita ifyabipa. Nalishibe no kuti nalingile ukuleka ulubuli e lyo no kufulwa bwangu. Ku ca bulanda, nshalekele ukucita ifyabipa.

Bushiku bumo ilyo nalelwa na baume 8, nalimwene ukuti nalingile ukwaluka. Ndebukisha ifyo naponene pa nshi, ifyo balenguma amakofi ne fyo balempanta ku mutwe. Apo nalemona kwati nalafwa, napepele kuli Lesa nati: “Munjeleleko mwe Yehova pa kukanaleka  ukucita ifyabipa nga fintu Icebo cenu cilanda. Nga napusuka, nkalasambilila Baibolo na ba Nte kabili nkaleka ukucita ifyabipa.” Nangu ca kuti balingumine sana, nshafwile kabili nalitampile ukusambilila Baibolo na ba Nte nga fintu naebele Yehova.

Mu 2006, naile mu kwikala ku England. Nalefwaya ukuti nkakwate indalama ishingi pa kuti nkabwelelemo ku Poland no kuti nkalundepo amasambililo ya buloya. Ilyo natwalilile ukusambilila Baibolo, amashiwi ya mu Baibolo ayo umutumwa Paulo alandile yalingafwile sana. Atile: “Nalisumina ukulufya fyonse pa mulandu wa cuma capulamo ica kwishiba Kristu Yesu Shikulu. Ni pa mulandu wakwe nashiliile fyonse kabili mfimona ukuti fisooso fye, pa kuti fye nonke Kristu.” (Abena Filipi 3:8) Paulo na o alisambilile ifya buloya kabili aali uwa lubuli nga ine. (Imilimo 8:3) Na lyo line, Paulo alimwene ukuti umuntu kuti aba fye ne nsansa nga ca kuti alebombela Lesa no kupashanya Yesu. Ilyo natontonkenye sana pa fyacitike kuli Paulo, namwene ukuti ukufwaya incito ya pa muulu no kuba uwa lubili te fingalenga umuntu aaba ne nsansa. Nalimwene no kuti apo Paulo alyalwike, ninshi na ine wine kuti nayaluka. E ico nalisalilepo ukuti nkatwalilila fye ukwikala muno mwine mu England kabili nalilekele no kutontonkanya pa kulundapo amasambililo ya buloya.

Ifyo nalesambilila pali Yehova fyalelenga ndemutemenwako. Nalitemenwe ilyo naishibe ukuti Lesa aleleela abantu abafwaya ukuleka ukucita ifyabipa. (Imilimo 2:38) Ilyo natontonkenye sana pe lembo lya 1 Yohane 4:16, ilitila “Lesa kutemwa,” natampile ukumona ico Lesa apatila ulukakaala.

Nalitemenwe sana na pa fyo ba Nte baba ne mibele iisuma. Nalimwene ukuti ba Nte balakonka sana ifyo basambilila mu Baibolo. Nalefwaya ukulaba ne nsansa nge fyo ba Nte baaba. Ilyo nayalwile ubumi bwandi, nalibatishiwe mu 2008 no kuba Inte ya kwa Yehova.

Baibolo yalilenga naleka ukufwaya ukulumbuka, naleka ulubuli, ukubomfya imiti iikola, ukunwisha ubwalwa no kutemwisha ukutamba umupila. Pali nomba, ndabombela Lesa e lyo ndasambilisha na bantu bambi Baibolo. Na pali ino nshita ndatamba umupila, lelo nshileka wansendela inshita ya kucita ifintu fimbi ifyacindama.

Pali ino nshita, nalyupa Esther, umukashana umusuma sana kabili uo tubombela Yehova capamo. Twaliba ne nsansa kabili tulasambilisha abantu abalanda iciPolish muno mu England. Pali ino nshita, naliba sana ne nsansa kabili naliba na kampingu iisuma.