ILEMBO ILINGAMWAFWA: ‘Mulebelelana uluse nga umo ali ne ca kuilishanya ku munankwe. Ifyo Yehova amubelela uluse, e fyo na imwe mulebelelana uluse.’—Abena Kolose 3:13.

Bushe aya amashiwi yalola mwi? Baibolo ilinganya ulubembu ku nkongole kabili ilinganya ukweleela ku kufuuta inkongole. (Luka 11:4) Icitabo cimo citila, mu Baibolo, ishiwi lya ciGriki ilyo bapilibula ukuti “ukweleela” lipilibula “ukufuuta inkongole no kuleka ukupinda uwakukongwele.” Kanshi nga twaeleela umuntu uutulufyenye, tufwile ukulabako kuli fyonse ifyo acitile. Ukweleela tacipilibula ukuti tuletekelesha ifyabipa ifyo umuntu acitile nelyo ukucefya icilubo ico atulufyenye, lelo cipilibula ukuti tatulefwaya ukusunga icintu ku mukoshi nangu ca kuti natukwata “ica kuilishanya.”

Bushe ili ilembo kuti lyatwafwa na muno nshiku? Apo tatwapwililika, bonse tulabembuka. (Abena Roma 3:23) E ico tulingile ukulaeleela abantu bambi pantu na ifwe tulakabila bambi ukutweleela nga twabalufyanya. Na kuba nga tuleelela bambi, ifintu filatuwamina. Fituwamina shani?

Nga ca kuti tulesunga icintu ku mukoshi kabili tulekaana ukweleela bambi, tulaikalifya fwe bene. Ukusunga icintu ku mukoshi kulalenga twilaba ne nsansa, tulefilwa ukumfwana na bambi kabili kulalenga tuleba no bulanda. Ukulaba ne cikonko ku mukoshi kuti kwatulwalika no kutulwalika. Lipoti iyali muli magazini ya Journal of the American College of Cardiology, iyalembelwe na ba Dr. Yoichi Chida na ba Andrew Steptoe, ba Profesa abasambilila ifyo abantu batontonkanya, yatile: “Casangwa ukuti ukufulilwa umuntu e lyo no kusunga icintu ku mukoshi kulalenga umuntu alwala amalwele ya ku mutima.”

Ukweleela kwena kusuma pantu kulalenga tuleumfwana na bantu bambi e lyo kulalenga twaba aba mutende, kabili tulatwalilila ukuba ifibusa na bantu bambi. Ne cawamisha ca kuti, nga tuleelela bambi, tulapashanya Lesa uweleela ababembu abalapila kabili uufwaya na ifwe tuleelela bambi.—Marko 11:25; Abena Efese 4:32; 5:1.