Eric: Kwena ine, nshatemwa sana ifya mapepo. Kanshi tapali ne fyo twingalanshanya.

Brian: Mwacita bwino pa kunjeba. Ishina lyandi nine Brian. Inga imwe?

Eric: Nine Eric.

Brian: Cawama twaishibana ba Eric.

Eric: Cawama.

Brian: Bushe mwakuliile mu lupwa ulwatemwa sana ifya mapepo?

Eric: E mukwai. Lelo ilyo naile ku koleji nalilekele ukuya ku mapepo.

Brian: Ohoo? Finshi mwasambilile ku koleji?

Eric: Nasambilile pa malyashi ya kale, pa mikalile ya bantu, e lyo na pa fyalo fyalekanalekana. Nalitemwa sana ukusambilila amalyashi ya kale ayalanda pa bantu.

Brian: Ukusambilila ifyacitiike kale kusuma sana. Nge fyo nalimo mwaishiba, na muli Baibolo mwalilembwa amalyashi ya fyacitike kale. Bushe pa fitabo mwalebomfya ku koleji pali na Baibolo?

Eric: Awe. Nalishiba ukuti Baibolo isuma, lelo nshaletontonkanya ukuti mwaliba amalyashi ya kale aya cine.

Brian: Mwacita bwino ukulanda ifyo mwaishiba. Nga namukwata inshita, kuti namubelengelako amalyashi yamo aya cine ayalembwa muli Baibolo.

Eric: Mukwai inshita ninkwata. Nomba nshikwete Baibolo.

Brian: Cili fye bwino. Twalabelenga muli Baibolo yandi. Ilyashi twalabalilapo lyalembwa pali 1 Imilandu 29, ifikomo 26 na 27, patila: “Davidi mwana Yese ena, atekele Israele yonse; ne myaka atekele Israele yali 40. Mu Hebrone atekele imyaka 7, e lyo mu Yerusalemu atekele imyaka 33.”

Eric: Bushe ili ilembo lilelanga shani ukuti amalyashi yalembwa mu Baibolo ya cine?

Brian: Kwali inshita ilyo abalengulula ifyalembwa mu Baibolo balelanda ukuti Imfumu Davidi tayaliko.

Eric:Ohoo? Mulandu nshi balekaanina?

Brian: Ilya nshita, takwali ubushininkisho bumbi ubwalelanga ukuti Davidi e ko ali. Lelo mu 1993, abashula ifya kale balisangile ilibwe lya kale sana apalembelwe ukuti “Ing’anda ya kwa Davidi.”

Eric: E fyo cali ifyo?

Brian: Umuntu umbi uwalembwa mu Baibolo uo baletila taaliko, ni Ponti Pilato uwali umulashi ilyo Yesu ali pano calo. Balimulandapo pali Luka icipandwa 3, icikomo 1, pamo na babomfi bambi aba buteko abaliko pali ilya nshita.

Eric: E mukwai, namona. Baibolo itile: “Ilyo Ponti Pilato ali umulashi wa ku Yudea, na Herode ali kateka wa ku citungu ca Galili.”

Brian: Ca cine. Pa myaka iingi, abatila balisambilila sana ifya mu Baibolo balekaana ukuti Ponti  Pilato taliko. Nomba ilyo papitile imyaka 50 balisangile ilibwe ku Middle East apalembelwe ishina lyakwe.

Eric: Ohoo! Nshaishiba.

Brian: Natemwa pantu mwaishiba ifyo cali.

Eric: Namwishiba, ukulanda fye icishinka, nalishiba ukuti Baibolo yalilembwa bwino, lelo nshimona ukuti mwaliba ifyo ningasambililako. Nalimo ilyashi lyalembwamo lya cine, lelo mona kwati ifyalembwamo te kuti fibombe muno nshiku.

Brian: Abantu abengi nalimo kuti basumina ifyo mwalanda. Lelo ine te fyo naishiba. No mulandu wa kuti ifyo fwe bantunse tufwaya tafyayaluka ukufuma fya pa kutendeka. Ku ca kumwenako, ukufuma fye na kale, tulafwaya ifya kulya, ifya kufwala, e lyo no mwakwikala. Tulafwaya ukulalanshanya na bantu banensu e lyo no kuba no lupwa lwa nsansa. Bonse fye tulafwaya ifi fintu te fyo?

Eric: E mukwai.

Brian: Baibolo yalilanda pali ifi fyonse. Nangu ca kuti libuuku lya kale, kuti lyatwafwa.

Eric: Mwalosha mwi?

Brian: Nalosha mu kuti, nangu ca kuti yalembelwe kale, ifyalembwamo kuti fyatusambilisha na muno nshiku mwine.

Eric: Naumfwa. Nomba finshi twingasambililamo?

Brian: Ifyo Baibolo yalanda kuti fyatusambilisha ukukanatemwisha indalama, ifyo twingacita pa kuti mu lupwa lwesu mube insansa, ne fyo twingacita pa kuti tube abantu abasuma ku banensu. Kanshi Baibolo kuti yatutungulula. Bushe tamulesumina ukuti muno nshiku calyafya sana pa kuti umwaume aletungulula bwino ulupwa lwakwe?

Eric: Ca cine ico mwalanda. Papita umwaka apo twaupanina no mwina mwandi, lelo limo limo tulapusana muli fimo.

Brian: E fyo limo ciba. Lelo muli Baibolo mwaliba ifyebo ifingatwafwa. Ku ca kumwenako, moneni Abena Efese 5 ifikomo  22, 23, na 28. Bushe kuti mwatemwa ukubelengapo?

Eric: E mukwai. Patila: “Abakashi banakile abalume babo kwati ni Shikulu balenakila, pantu umulume e mutwe wa mukashi wakwe ifyo na Kristu e mutwe wa cilonganino, pantu e mupusushi wa mubili uyu.” Icikomo  28 catila: “E fyo na balume bafwile ukulatemwa abakashi babo nge mibili yabo. Uwatemwa umukashi wakwe ali-itemwa umwine.”

Brian: Mwabelenga bwino. Bushe tamulesumina ukuti mu lupwa kuti mwaba insansa nga ca kuti umulume no mukashi balekonka ifi Baibolo yalanda?

Eric: Ndesubila insansa kuti shabamo. Nomba ukulanda kwalyanguka, ukukonka ifi fine Baibolo yalanda kwalyafya.

Brian: Ca cine, pantu bonse tatwapwililika. Na kuba mu cipandwa cimo cine, mwaliba icikomo icitukoselesha ukukanaenekela ifyacilamo ku banensu. * Abaupana bafwile ukulaelelana. Ine no mwina mwandi twalishininkisha ukuti ifyo Baibolo yalanda filafwa.

Eric: Ifyo mwalanda fya cine.

Brian: Inte sha kwa Yehova balikwata Webu saiti apaba ifyebo ifisuma ifilanda pa cupo no lupwa. Nga namukwata inshita, kuti namulangako fimo ifyabapo.

Eric: Mukwai cili fye bwino nangeni.

Brian: Cawama. Adresi ya Webu saiti ni www.isa4310.com. Moneni ifyaba pa ntendekelo.

Eric: Ifikope filipo ubusuma!

Brian: Ifi ifikope filelanga Inte sha kwa Yehova ababila imbila nsuma mu fyalo fyalekanalekana. Nomba natuleya pa Librare ya pa Intaneti, tulembemo ukuti “Ifingalenga Ulupwa Ukuba ne Nsansa.” E ya, yaisuka no kwisuka. Nge fyo mulemona, pali  amalyashi ayalekanalekana. Bushe pali ilyashi ilyo mwatemwapo?

Eric: Ee, natemwa sana apa balembele ukuti “Ukupwisha Amafya.” Kuti nafwaya ukwishiba ifya kucita pa mafya nkwata mu cupo!

Brian: Ici cipande cilanda pa fintu 4 ifingatwafwa ukupwisha amafya. Moneni iyi paragrafu, bushe kuti mwatemwa ukuibelenga ba Eric?

Eric: Ee. Iletila: “Filya fine umutima na bapwapwa filenga umulopa uleenda mu mubili, ukutemwa no mucinshi na fyo filaafwa abaupana ukulalanshanya bwino.” Balondolola bwino sana.

Brian: Mwabelenga bwino. Pali ne lembo apa pene. Nga mwatinikapo lyalaisuka.

Eric: Lyaisuka. Abena Efese 5:33 yatila: “Na imwe umo umo, onse atemwe umukashi wakwe ifyo aitemwa umwine; umukashi na o abe na katiina ku mulume wakwe.”

Brian: Nga mwamona, ilembo lilekomaila sana pa co cila muntu alingile ukucitila umwina mwakwe.

Eric: Mwalosha mwi?

Brian: Umwaume ico afwaisha ku mukashi wakwe kumupeela umucinshi. E lyo umwanakashi na o ico afwaisha ku mulume wakwe ku mutemwa sana, bushe te fyo?

Eric: Ico ca cine mwalanda.

Brian: Nga ca kuti umwaume alelanga ukuti alitemwa umwina mwakwe mu nshila ishalekanalekana, umwina mwakwe na o kuti camwangukila ukumupeela umucinshi, muletipo shani?

Eric: Ni fyo fine.

Brian: Mwamona, nangu ca kuti aya mashiwi twalandapo yalembelwe imyaka mupepi na 2,000 iyapita, yalilanda bwino ifyo abaupana balingile ukucita, kabili nga balefikonka icupo kuti cawama. Kabili nga filya twacilanda pa cilangililo ca “mutima na bapwapwa,” ukutemwa no mucinshi kuti fyalenga mu cupo mwaba insansa.

Eric: Namona ukuti Baibolo yalicindama sana ukucila ifyo naishiba.

Brian: Natemwa ukumfwa ifyo mwalanda ba Eric. Kuti natemwa twaisamonana na kabili, ndefwaya ukwishiba ifyo mwingalanda pali ili lyashi limbi ilileti “Ifintu Fine Ifingamwafwa Ukupwisha Amafya” ilili apa pene pa laibrare yesu. *

Eric: Mukwai mukese. Ine no mwina mwandi tukabelengapo pali ili lyashi.