ICIPANDE ICIKALAMBA | KUTI MWAPALAMA KULI LESA
Takwaba Icintu Icacindama Nge ci
Finshi mulingile ukucita pa kuti mupalame kuli Lesa? Ifi e fyo mulingile ukucita pa kuti mube cibusa wa kwa Lesa:
Ukwishiba ishina lya kwa Lesa, Yehova no kulalibomfya.
Ukulalanshanya nankwe lyonse mwi pepo no kulabelenga Icebo cakwe, Baibolo.
Ukutwalilila ukulacita ifisekesha Yehova.
Palameni kuli Lesa ukupitila mu kubomfya ishina lyakwe, ukupepa kuli ena, ukubelenga Baibolo, no kucita ifimusekesha
Ukulingana ne fi tulandilepo, bushe kuti mwatila mulecita ifingamwafwa ukupalama kuli Lesa? Bushe kuliko mumo umo mulemona ukuti mulingile ukuwamyako? Kwena, tulingile ukubombesha, lelo mulingile ukumona ne fisuma ififumamo.
Ba Jennifer abekala ku United States batile: “Umuntu nga ale-esha na maka ukuba cibusa wa kwa Lesa, mulafuma ifisuma. Ubu bucibusa bulaleta amapaalo: tulacetekela sana Lesa, tuleshibilako imibele yakwe, ne cacindamisha tulamutemwa sana. Takwaba icintu icacindama nge ci!”
Nga mulefwaya ukuba cibusa wa kwa Lesa, Inte sha kwa Yehova shikatemwa sana ukumwafwa. Bakapekanya ukusambilila Baibolo, ukwabula ukumulipilisha.Kabili tulemwita ukuti mulesangwa ku kulongana ukubela pa Ng’anda ya Bufumu iyabela uko mwikalila uko tusambilila Baibolo. Mukatemwa ukulongana na bantu ababika amano kuli bucibusa bwabo na Lesa. * Nga mwacita ifi, mukomfwa nga filya uwaimbile amalumbo aumfwile, uwatile: “Lelo ine, ukupalama kuli Lesa kusuma kuli ine.”—Amalumbo 73:28.
^ par. 9 Nga mulefwaya ukulasambilila Baibolo, nelyo ukwishiba apabeela Ing’anda ya Bufumu uko mwikala, mukwai landeni nabamupeele ino magazini, nelyo moneni pa Webu saiti iya, www.isa4310.com/bem, e lyo mumone apo balembele ati TUTUMINENI.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
