Nalimo mwali-ipushapo amuti: ‘Lesa nga alishiba fyonse kumo ne fyo ntontonkanya e lyo ne fyo mfwaya, mulandu nshi mfwile ukulapepela kuli ena?’ Ico icipusho cisuma. Pantu na kuba Yesu atile: “Lesa Shinwe alishiba ifyo mukabila na lintu fye tamulamulomba.” (Mateo 6:8) Davidi, uwali Imfumu mu Israele alishibe ici cishinka, e co alembeele ukuti: “Ilyo ishiwi talilaisa pa lulimi lwandi, moneni, mwe Yehova, ninshi namwishiba kale.” (Amalumbo 139:4) Nomba mulandu nshi tufwile ukulapepela kuli Lesa? Pa kwasuka ici cipusho, natulande pa fyo Baibolo yalanda pa mapepo ya bakapepa ba kwa Lesa. *

Nangu ca kutila Baibolo itila Yehova * Lesa alishiba fyonse, ilalanda no kuti tapelela fye pa kufwaya ukwishiba ifilecitikila bakapepa bakwe. (Amalumbo 139:6; Abena Roma 11:33) Nangu ca kuti alikwatisha amaka ya kwishiba fyonse ifilecitikila abantu, tasunga fye ifyebo pa bantu nga filya kompyuta isunga. Lesa alafwaisha no kwishiba ifyo tuletontonkanya pantu afwaya twapalama kuli ena. (Amalumbo 139:23, 24; Yakobo 4:8) E calengele Yesu akoseleshe abasambi bakwe ukulapepa kuli Wishi nangu ca kuti Wishi alishiba ifyo tukabila. (Mateo 6:6-8) Nga tule-ebako Kabumba wesu ifyo tuletontonkanya e lyo twingapalama sana kuli ena.

Limo tulafilwa ukwishiba bwino bwino ifya kweba Lesa mwi pepo. Nga caba ifyo, Lesa kuti amona ifilecitika no kubomfya amaka yakwe pa kuti eshibe ifyo tulekabila no kutwafwa. (Abena Roma 8:26, 27; Abena Efese 3:20) Nga twaishiba ukuti Lesa nayasuka ipepo nangu ca kuti tatwishibe bwino inshila ayasukilamo, tulapalama kuli ena.

Baibolo itweba ukuti Lesa wa Maka Yonse alaasuka amapepo ya babomfi bakwe aba cishinka, lelo ilatweba ne co ashasukila amapepo yamo. Ku ca kumwenako, pa nshita imo ilyo mu Israele mwafulile abaleipaya abanabo, Lesa aebele kasesema wakwe Esaya ukweba abantu ukuti: “Nangu ca kuti mulafusha amapepo yenu, ine nshumfwa; iminwe yenu yaisulamo fye ukusumya umulopa.” (Esaya 1:15) Nga fintu twamona, abashikonka amafunde ya kwa Lesa nelyo abashipepa ukulingana ne fyo afwaya te kuti benekele Lesa ukumfwa amapepo yabo.—Amapinda 28:9; Yakobo 4:3.

Lelo Baibolo isosa no kuti: “Conse ico twalomba, cikulu fye nacilingana no kufwaya kwakwe, alatumfwa.” (1 Yohane 5:14) Nomba bushe ico cilolele mu kuti Lesa alapeela bakapepa bakwe conse fye ico balomba? Iyo. Tontonkanyeni pa mutumwa Paulo, uwalombele Lesa imiku itatu ukuti amufumye “umuunga mu mubili.” (2 Abena Korinti 12:7, 8) Cimoneka kwati Paulo alilwele amenso kabili yalemucusha cila nshita. Afwile aleumfwa sana ububi! Paulo alipeelwe amaka ya kundapa abantu bambi kabili alibuushishepo no wafwa, lelo takwete amaka ya kundapa ubulwele bwakwe. (Imilimo 19:11, 12; 20:9, 10) Nangu ca kuti Lesa tayaswike ipepo ukulingana ne fyo Paulo alefwaya, Paulo alitemenwe ifyo Lesa amwafwile kabili alitashishe.—2 Abena Korinti 12:9, 10.

Ca cine ukuti Lesa alyaswike mu cisungusho amapepo ya bantu bamo abo Baibolo yalandapo. (2 Ishamfumu 20:1-7) Lelo nangu ni pali ilya nshita, mapepo fye yamo yamo ayo Lesa aleyasuka mu cisungusho. Bakapepa bamo baleumfwa ububi nga camoneka kwati Lesa taaswike amapepo yabo. Imfumu Davidi yaipwishe ati: “Kufika lilali, mwe Yehova, mukandaba? Bushe muyayaya?” (Amalumbo 13:1) Lelo ilyo Davidi atontonkenye pa miku ubwingi iyo Yehova amwafwile, alicetekele sana Lesa na kabili. Mwi pepo limo line, Davidi asosele no kuti: “Lelo ine, mu cikuuku cenu e mo natetekela.” (Amalumbo 13:5) Nga filya fine cali kuli Davidi, bakapepa ba kwa Lesa pali lelo nabo bafwile ukutwalilila ukupepa kuli Lesa mpaka bamona ukuti Lesa ayasuka ipepo lyabo.—Abena Roma 12:12.

Lesa alatupeela ifyo tukabila.

Kulaba imilandu imo iilenga ukuti limo abafyashi bepeela abana babo ifyo balomba pa nshita ilya ine balombelapo. Na Lesa wine, limo te kuti asuke ukulingana ne fyo tulefwaya nelyo pa nshita iyo tulefwaya asukilepo. Lelo tatutwishika ukuti nga filya fine wishi waba no kutemwa engacita, Kabumba wesu, akatupeela ifyo tukabila pa nshita yalinga kabili mu nshila iisuma.—Luka 11:11-13.

Limo te kuti twiluke ifyo Lesa aswike ipepo.

Inga nga twapepa ukuti Lesa atwafwe ukupwisha ubwafya? Bushe Yehova nga tacitilepo fimo mu cipesha amano, tufwile ukutontonkanya ukuti taaswike ipepo? Iyo, lelo tufwile ukumona nga ca kuti Lesa natwafwa mu nshila iyo nalimo tushilwike fye. Nalimo cibusa wesu kuti atwafwa pa nshita iyo ine tulekabila ubo bwafwilisho. (Amapinda 17:17) Yehova kuti alenga uyu umunensu ukutwafwa. E lyo limo Lesa kuti ayasuka amapepo yesu ukupitila mu mashiwi ayaba mu Baibolo. Ifyebo fyaba mu Baibolo kuti fyatupeela amano ya kupwishishamo ubwafya tukwete.—2 Timote 3:16, 17.

Mu nshita ya kufumyapo ubwafya, Lesa ilingi alapeela abantu bakwe amaka ya kushipikisha ubwafya. (2 Abena Korinti 4:7) Ku ca kumwenako, ilyo Yesu alombele Wishi ukuti afumyepo ubwafya akwete, ubo alemona ukutila kuti bwaleta umusaalula pe shina lya kwa Lesa, Yehova atumine malaika ku kumukoselesha. (Luka 22:42, 43) Lesa kuti abomfya cibusa wesu ku kutwebako amashiwi ya kutukoselesha ilyo tuleyafwaya sana. (Amapinda 12:25) Apo Lesa nga ayasuka muli iyi nshila tatwiluka bwangu ukuti nayasuka, kuti cawama tulebika sana amano ku fyo Lesa asuka amapepo yesu.

Limo tulingile ukulolela mpaka Lesa ayasuka ipepo pa nshita iyalinga.

Baibolo itila Lesa wa Maka Yonse alacita ifisuma ku baicefya “ilyo inshita yafika.” (1 Petro 5:6) Kanshi nga camoneka kwati Yehova akokola ukutupeela ico tulombele, ninshi tacilolele mu kuti tatubikileko amano. Lelo apo aleshiba ifingi, ukwabula no kutwishika, Kabumba wesu uwakwata ukutemwa alamona ifingatuwamina ilyo talatupeela ifyo tulelomba.

Natulangilile: Tutile umwana wenu umunono amulomba ukuti mumushitile incinga. Bushe kuti mwamushitila pantu fye nalomba? Nga mwamona ukuti talakula uwa kuti atendeke ukucofa incinga, kuti mwabala mwalolelako. Lelo mu kuya kwa nshita kuti mwamushitila nga mwamona ukuti nomba nalinga ukukwata incinga. Na Lesa wine kuti “atupeela ififwaya umutima” wesu ilyo inshita yafika nga ca kutila twatwalilila ukulomba.—Amalumbo 37:4.

Baibolo ikoselesha Abena Kristu ba cine ukucetekela ukuti Lesa akulabafwa nga bapepa. Bamo kuti batila, ‘ico tacayanguka.’ Ca cine, nga ca kutila twalikwata ubwafya ubutucusha cila nshita nelyo nga tulemona ukuti bamo balitufyenga, tacanguka ukulolela ukuti Lesa asuke ipepo. Lelo kuti cawama ukulaibukisha filya Yesu atusambilishe ukutila tulepepa lyonse.

Yesu alandile pa cilangililo ca kwa mukamfwilwa umupiina uwatwalilile ukuya kuli kapingula  uushali na mulinganya pa kuti efyengwa. (Luka 18:1-3) Nangu ca kutila kapingula pa kubala alikeene ukumwafwa, asukile atila: “Pa mulandu wa kumpamfya lyonse kuli uyu mukamfwilwa, nshakaleke bakamufyenge, pa kuti elaisa lyonse mu kuncusha.” (Luka 18:4, 5) Ukulingana na mashiwi babomfeshe mu lulimi balembeelemo Baibolo pa kubala, kapingula alyafwile mukamfwilwa pa kuti “ekamuuma pa linso” nelyo mu mampalanya “e kamonawila ishina.” * Nga ca kutila kapingula uushitiina Lesa kuti ayafwa mukamfwilwa pa kuti ishina lyakwe lionaika, Lesa wesu uwatutemwa kuti acishapo ukwafwa balya abafyengwa, “abalilila kuli ena akasuba no bushiku”! Nga fintu Yesu asosele, Lesa “akaleka ukuti kube umulinganya kuli bena bwangu bwangu.”—Luka 18:6-8.

Nangu ca kutila limo kuti twatendwa ukulomba ubwafwilisho, tatufwile ukuleka. Nga twatwalilila ukupepa, tulanga ukuti tulafwaya sana ukuti Lesa aletwafwa. Tulatendeka no kwiluka ifyo Lesa asuka amapepo yesu, kabili ukucita ifyo kulenga twapalama sana kuli ena. Kanshi tufwile ukucetekela ukuti Yehova akala-asuka amapepo yesu nga twatwalilila ukulomba ne citetekelo.—Luka 11:9.