Ili e lembo abantu baishiba sana kabili e lyo abengi balanda fye ku mutwe. Abantu batila ili ilembo “e lilondolola bwino sana ifyo Lesa atemwa abantu e lyo ne fyo afwaya ukuti bakapusuke.” Ne ci calilenga ukuti mu fyalo fimo balekambatika amashiwi yaba pali ili ilembo pa ncende apo abantu balongene nelyo ukulemba “Yohane 3:16” pali bamotoka nelyo pa ncende shimbi.

Ilingi line, abakambatika aya amashiwi tabatwishika ukuti Lesa alibatemwa kabili akabapeela umweo wa muyayaya. Inga imwe mutontonkanyapo shani pali aya amashiwi? Bushe mumfwa shani pa fyo Lesa amutemwa? Kabili finshi Lesa acita ifilanga ukuti alimutemwa?

Abengi balatasha Lesa pa fyo apanga intanda, akasuba no mweshi ne fyaba pa calo e lyo na bantu. Ifya mweo fyalipangwa bwino sana ica kuti te kuti tutwishike no kutwishika ukuti kwaliba uwakwatisha amano uwafipangile. Abengi balatasha Lesa cila bushiku pa bumi abapeela. Na kabili balishiba ukuti Lesa e ubapeela ifintu fyacindama pamo nga umwela, amenshi, ne fya kulya, pa kuti babe abomi no kulabomba bwino.

Tufwile ukulatasha Lesa pali fyonse ifyo atupeela, pantu e Kabumba wesu kabili alekuusha ifyo imitima yesu ikabila. (Amalumbo 104:10-28; 145:15, 16; Imilimo 4:24) Nga twatontonkanya pa fintu fyonse ifyo Lesa atucitila pa kuti tube no mweo, kuti calenga tulemutasha. Umutumwa Paulo atile: “[Lesa] e upeela abantu bonse umweo no mupu na fyonse. Pantu e walenga ukuti tube no mweo,  ukuti tule-enda no kuti tubeko.”—Imilimo 17:25, 28.

Lesa alatulanga ukuti alitutemwa na mu fintu na fimbi. Alitupanga bwino ukucila inama kabili alitucindika pantu atupangile ukuti tulefwaya ukumwishiba e lyo kabili alatupeela ne fya kutwafwa pa kuti tutwalilile ukuba ifibusa fyakwe. (Mateo 5:3) Ifi Yehova acita, filenga abantu bacumfwila ukuba mu lupwa lwa kwa Lesa ulwa “bana” bakwe.—Abena Roma 8:19-21.

Nge fyo ilembo lya Yohane 3:16 lilanda, Lesa alilangile ukuti alitutemwa pa kututumina Umwana wakwe, Yesu, ukuti atusambilishe pali ena e lyo no kutufwila. Abengi balanda ukuti tabaishiba ico Yesu afwilile abantu e lyo ne fyo imfwa yakwe ilanga ukuti Lesa alitutemwa. Natumone ico Baibolo ilanda ukuti e calengele Yesu atufwile e lyo tumone ne fyo imfwa yakwe yacindama.

Abantu bonse te kuti bekale umuyayaya, e co balwalila, ukukota e lyo no kufwa. Ifi te fyo Yehova Lesa alefwaya ukuti cibe. Ilyo apangile abantu bakubalilapo, alefwaya ukuti bakekale umuyayaya muli paradaise pano calo. Lelo pa kuti batwalilile ukwikala umuyayaya balingile ukumumfwila. Lesa atile nga bafilwa ukumumfwila, baali no kufwa. (Ukutendeka 2:17) Umwaume wa kubalilapo taumfwilile Lesa kabili alengele ukuti ena na bana bakwe balefwa. Umutumwa Paulo atile: “Filya ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.”—Abena Roma 5:12.

Na lyo line, Lesa ‘alitemwa umulinganya.’ (Amalumbo 37:28) Nangu ca kuti tali no kulekapo fye pa lubembu lwa kwa Adamu, Lesa tapingwile abantu bonse ukuti bakatwalilile fye ukulacula no kufwa, pa mulandu wa bumpulamafunde bwa muntu umo. Lelo ilyo Lesa atontonkenye pe funde litila “umweo pa mweo,” alicitile umulinganya pa kuti abantu bacumfwila bengakwata ubumi bwa muyayaya. (Ukufuma 21:23) Nomba, bushe ukukanapwililika kwali no kupwa shani? Umo uwali no bumi ubwapwililika nga filya Adamu aali, alingile ukupeela ubumi bwakwe.

Ni Yesu fye e wali no kulubula abantunse pantu abana ba kwa Adamu bonse tabaali abapwililika. (Amalumbo 49:6-9) Yesu afyelwe ukwabula ulubembu, kanshi ali uwapwililika nga filya Adamu ali pa kubala. E co, ilyo apeele ubumi bwakwe, alilubwile abana ba kwa Adamu ku lubembu no kulenga bakwata ishuko lya kwisaba abapwililika nga filya Adamu na Efa baali. (Abena Roma 3:23, 24; 6:23) Apo Lesa alitutemwa  sana, bushe kwaliba ifyo twingacita pa kutila akatupaale?

Ilembo lya pali Yohane 3:16 litila “onse uumutetekela [Yesu] ekonaika lelo akabe no mweo wa muyayaya.” Kanshi pa kukwata “umweo wa muyayaya,” tulingile ukutetekela Yesu no kulamumfwila.

Nalimo kuti mwatila: ‘Apo Yesu atile, “onse uumutetekela” akaba no mweo wa muyayaya, cinshi alandiile no kuti tufwile ukulamumfwila?’ Ca cine, ukucetekela ukuti Yesu e ko aba kwalicindama, lelo Baibolo itila kwaliba na fimbi ifyo tufwile ukucita. Pa kuti umuntu abe cibusa wa kwa Lesa, tafwile ukwishiba fye ukuti Yesu Mupusushi, lelo afwile no kulacita ifyo Yesu alesambilisha. Nga talecita ifi ninshi icitetekelo cakwe ca fye pantu Baibolo itila, “icitetekelo icabule milimo ninshi califwa.” (Yakobo 2:26) Kanshi Umwina Kristu afwile ukucetekela Yesu, e kutila ukulacita ifilanga ukuti alikwata icitetekelo.

Paulo ena alondolola ukuti: “Ukutemwa kwa kwa Kristu e kutucincisha, pa kuti ici e co twapingula, atuti apo umuntu umo afwilile bonse . . . Kabili afwilile bonse pa kuti aba mweo belaikalila abene beka kano ukulaikalila uwabafwilile kabili uwabuushiwe.” (2 Abena Korinti 5:14, 15) Nga twalitemwa pa fyo Yesu atucitila, tatwakulacita ifyo tulefwaya, lelo twakulacita ifyo Yesu uwatufwilile alesambilisha. Mapaalo nshi abacetekela muli Yesu bakakwata?

Amashiwi ya kulekelesha pali Yohane 3:16 yalanda pa fyo Lesa alaya bonse abacetekela mwi lambo lya kwa Yesu kabili abacita ifyo afwaya. Lesa afwaya bonse ababa ne citetekelo ukuti ‘bekonaika lelo bakabe no mweo wa muyayaya.’ Lesa akapeela abamutemwa ifilambu ifyapusana.

Yesu aebele bamo ukuti bakekala ku muulu umuyayaya. Aebele abasambi bakwe aba cishinka ukuti aleya mu kubapekanishisha icifulo pa kutila bakateke nankwe ku muulu. (Yohane 14:2, 3; Abena Filipi 3:20, 21) Abakaya ku muulu “bakaba bashimapepo ba kwa Lesa kabili aba kwa Kristu, kabili bakateka pamo nankwe imyaka ikana limo (1,000).”—Ukusokolola 20:6.

Abasambi ba kwa Kristu abanono fye e bakaya ku muulu. Na kuba, Yesu atile: “Mwilatiina, mwe mukuni unono, pantu Shinwe afwaya ukumupeela Ubufumu.” (Luka 12:32) Bushe ababa mu “mukuni unono” baba banga? Pa Ukusokolola 14:1, 4 patila: “Naliloleshe, kabili, moneni! Umwana wa mpaanga [Yesu Kristu uwabushiwe] aiminine pa Lupili lwa Sione, kabili ali pamo na ba makana umwanda umo na makana makumi yane na makana yane (144,000). Aba bantu pa mpumi shabo palembelwe ishina lya Mwana wa mpaanga ne shina lya kwa Wishi. . . . Bashitilwe mu bantu pa kuti babe ifisabo fya ntanshi ukupeelwa kuli Lesa na ku Mwana wa mpaanga.” Ba 144,000 “mukuni unono,” pantu abakekala pano calo bena bakaba iminshipendwa. Nomba apo ba 144,000 bakaba imfumu, bushe ni bani bakalateka?

Yesu alilandile na pa basambi bakwe bambi aba cishinka abakanonkelamo mu Bufumu bwa mu muulu. Pali Yohane 10:16, Yesu atile: “Ndi ne mpaanga shimbi, ishishili sha mwi cinka ili; na sho ndi no kushileta, kabili shikomfwa ishiwi lyandi, e lyo kukaba umukuni umo, na kacema umo.” “Impaanga” shikekala umuyayaya pano calo, nge fyo Adamu na Efa bali no kwikala umuyayaya. Twaishiba shani ukuti bakekala pa calo?

Mu Baibolo mwaba amalembo ayengi ayalanda  pa fyo ifintu fikawama mu Paradaise pano calo. Pa kuti mwishibe ifyo cikawama, belengeni aya amalembo: Amalumbo 37:9-11; 46:8, 9; 72:7, 8, 16; Esaya 35:5, 6; 65:21-23; Mateo 5:5; Yohane 5:28, 29; Ukusokolola 21:4. Aya amalembo yalanda ukuti inkondo, insala, ukulwala ne mfwa fikapwa. Yalalanda pa nshita ilyo abantu abacita ifyo Lesa afwaya bakaba ne nsansa pantu bakalaikulila amayanda, bakalalima amabala e lyo no kukusha abana mu calo icisuma kabili umushakabe ulukaakala. * Bushe kuti mwatemwa ukwikala muli ici calo? Tufwile ukwishiba ukuti fyonse ifi ifyo Lesa atulaya fikafikilishiwa nomba line.

Nga mwatontonkanya pa fintu fyonse ifyo Lesa amucitila ne fyo acitila abantunse bonse, te kuti mutwishike no kutwishika ukuti Lesa alitucitila ifintu ifingi. Lesa alitupeela ubumi, amano ne fintu fimbi ifilenga tuleikala bwino. Ne cacindama sana pali fyonse, Lesa alitupeela Umwana wakwe, Yesu, uwatufwilile pa kuti tukakwate amapaalo nga filya fine tubelenga pali Yohane 3:16.

Ukwikala umuyayaya mu calo icisuma ukwabula ukulwala, inkondo, ifipowe nelyo imfwa kukalenga tukabe ne nsansa no kukwata amapaalo ayengi. Ifyo mucita ino nshita e fikalenga mukakwate aya mapaalo. E co mulingile ukuyipusha ati, Bushe ndacita ifyo Lesa afwaya?