ABATUNGILILA amacalici ayapepela pamo batile, ukupepela pamo kulalenga baikatana. Ba Eboo Patel abatendeke akabungwe ka Interfaith Youth Core batile, ‘Ababa mu macalici yonse balafwaya ukuba aba cikuuku, balasakamana abantu bambi e lyo bacileela.’

AbaBuddha, baKatolika, baProtestanti, abaHindu, abaShilamu e lyo na macalici yambi, inshita shimo balabombela pamo ukufwaya ukufumyapo insala, balafwaya ukulandilako abantu pa nsambu bakwata, balabombela pamo ukukaanya ifyalo ifilwa inkondo ukulashiika utupata e lyo balakaanya abantu abonaula icalo. Aba mu macalici yalekanalekana balakumana pamo ku kukoseleshanya no kulanda pa fintu ifyo bonse bashifwile ukulacita e lyo ne fyo balingile ukulacita. Ilyo bakumana pamo, balasanika amakandulo, kulaba inyimbo, amapepo e lyo ne fintu fimbi.

Bushe ifi amacalici bakumana capamo, filalenga amafya ukupwa? Bushe Lesa alabomfya utu tubungwe twa macalici yalekanalekana ku kulenga ifintu mu calo ukuwama?

Akabungwe kamo akakalamba mu calo aka macalici ayapepela pamo kalaitatakula ati amacalici ukucila pali 200 e yaba muli aka kabungwe kabili kaba mu fyalo 76. Aba muli aka kabungwe batila bafwaisha sana “amacalici ayaba mu kabungwe ukutwalilila ukumfwana no kupepela pamo.” Lelo ifyo balanda te fyo bacita. Ku ca kumwenako, abatungulula aka kabungwe batile, ulupapulo lwabo umo balemba ifyo bafwile ukulaumfwana, balilulemba bwino sana pa kuti tabalengele amacalici ayengi na yaba kale muli aka kabungwe ukumfwa ububi. Mulandu nshi balandiile ifi? Ni co te macalici yonse ayasumine ukuti mu lupapulo balumbulemo Lesa.

Nga ca kuti mu lupapulo lwabo tabalandilepo pali Lesa, bushe kuti twatila balemininako Lesa? Bushe kuti twatila akabungwe ka musango uyu kalipusana no tubungwe utwafwa abantu abalecula? Kanshi kuti twatila aka akabungwe te kabungwe ka mapepo, lelo kaafwa fye abantu ukulaufwana.

Aba mu kabungwe akatungilila amacalici yapepela pamo ako beta ati Dalai Lama batile, ‘Amacalici ayengi ayalumbuka yasambilisha abantu ukuba no kutemwa, icikuuku e lyo no kweleela.’ Balandile no kuti: “Iyi imibele e yo bonse fye balingile ukukwata.”

 Ca cine ukuti ukutemwa, icikuuku e lyo no kweleela fyalicindama sana. Yesu alilandile pe Funde lya Mulinganya ilyo atile: “Fyonse ifyo mufwaya abantu ukuti balemucitila, e fyo na imwe mulebacitila.” (Mateo 7:12) Nomba bushe ukulacitila abantu ifisuma e kulanga ukuti aba macalici balemininako Lesa?

Umutumwa Paulo aebele abantu abalelanda ukuti balebombela Lesa ati: “Nababela inte nati ukupimpa kwa kubombela Lesa kwena balikwata; lelo te kupimpa ukwalingana no kwishiba kwine kwine.” Cinshi abebele ifi? Paulo atile ni co ‘tabaishibe ubulungami bwa kwa Lesa kabili balefwaya ukukosha ubulungami bwabo abene.’ (Abena Roma 10:2, 3) Apo tabaishibe ico Lesa alefwaya, ukupimpa kwabo ne citetekelo fyali fya fye.—Mateo 7:21-23.

Yesu atile: “Balipaalwa aba mutende.” (Mateo 5:9) Yesu alesambilisha abantu aba nkulilo shalekanalekana imbila nsuma iya mutende. (Mateo 26:52) Abaleumfwa ifyo alesambilisha baletemwana sana. (Abena Kolose 3:14) Bushe ifyo Yesu alesambilisha fyalelenga fye abantu abankulilo shalekanalekana ukulaumfwana? Bushe alepepa nabo mu macalici yabo?

Bashimapepo ba baFarise na ba baSaduke balipatile Yesu kabili balefwaya ukumwipaya. Finshi Yesu acitile? Aebele abasambi bakwe ati: “Balekeni babe. Ni ntungulushi impofu.” (Mateo 15:14) Yesu talefwaya ukulapepela pamo na ishi intungulushi.

Ilyo papitile inshita, icilonganino ca Bena Kristu calipangilwe mu Grisi, mu musumba wa Korinti, umo abantu basumiine mu fisambilisho ifyalekanalekana. Bushe Abena Kristu bali no kucita shani apo abantu basumiine ifisambilisho ifyalekanalekana? Umutumwa Paulo atile: “Mwiba kwi koli limo line na bashatetekela.” Mulandu nshi? Paulo abebele ati: “Kristu kuti aumfwana shani na Beliali? Napamo uwatetekela kuti aumfwana shani no ushatetekela?” Kabili abebele no kuti: “E ico fumenimo muli bena, no kuipaatulako.”—2 Abena Korinti 6:14, 15, 17.

Kanshi kuti twatila Baibolo yalikaanya aba macalici yalekanalekana ukupepela pamo. Lelo kuti mwaipusha ati, ‘Bushe abantu kuti baikatana shani nga tabapepela pamo?’

Abantu aba mu fyalo 15 balipanga ci mashini ico babika mu lwelele icikopa fyonse ifyaba pa calo. Ici ci mashini bacita ati International Space Station. Bushe mulemona ukuti nga balipangile ici ci mashini nga ca kuti aba muli ifi fyalo 15 bakwete amaplani ayapusanapusana?

Ifi fine e fyaba na ba mu macalici abapepela pamo. Nangu ca kuti balanga ukuti balikatana kabili balacindikana, tabakwata plani imo iya kukosha icitetekelo cabo. Ne ci calenga abantu ukuba ne mibele e lyo ne fisambilisho ifyapusana.

Mu Baibolo mwaliba amafunde ya kwa Lesa ayaba kwati ni plani. Ubumi bwesu kuti bwawama nga tulekonka ifyo Baibolo ilanda. Bonse abakonka ifyo Baibolo ilanda, balishiba ukuti te mulandu na uko bafuma nelyo uko balepepa kale, balabombela pamo mu mutende kabili balikatana. Lesa alilandilepo ati: “Nkaalula ululimi lwa bantu na bantu ukuba ululimi ulwine lwine, ukuti bonse fye balilile kwi shina lya kwa Yehova, ukuti bamubombele no mutima umo.” Abantu balekatana nga balelanda “ululimi ulwine lwine,” e kutila ukulakonka amafunde ya kwa Lesa.—Sefania 3:9; Esaya 2:2-4.

Inte sha kwa Yehova balemwita ukuyasangwako mu kulongana mupepi no ko mwikala pa kuti mukaimwene mwe bene ifyo baikatana e lyo ne fyo baba aba mutende.—Amalumbo 133:1.