UBUMI BWABO
Amacushi Yalalenga Naba Uwakosa
Nalyonda mfina fye amakilogramu 29. Ukwabula no kutwishika umuntu nga amona ninjikala mu ncinga ya kwendelamo abalemana, kuti atila nshakwata amaka. Lelo nangu cabe ifi, ifyo ntontonkanyapo fyalilenga naba uwakosa.
Ninshi ndi ne myaka 4
Lekeni mushimikile ifyo napitamo.Twaleikala ku France na bafyashi bandi kabili nga natontonkanya pa fyo cali ilyo nali umwaice ndaba sana ne nsansa. Batata balimpangiile akampelwa kabili nalitemenwe ukubutuka ukushinguluka ibala lyali pa ng’anda. Mu 1966, ba Nte baletutandalila kabili batata balelanshanya nabo inshita iitali. Mu myeshi fye 7, batata baishileba ba Nte. Tapakokwele bamayo nabo baishileba ba Nte, ne ci calengele ukuti mu lupwa lwesu mube insansa.
Amafya yatendeke ilyo twaile ku Spain uko abafyashi bandi bafumine. Natendeke ukumfwa ubukali sana mu minwe e lyo na mu nkonkoni. Pa numa ya kumonana na badokota abengi pa myaka ibili, twasukile twasanga dokota uwaishibe sana ubulwele bwamfyufyu. Lelo ku ca bulanda atile: “Namucelwa, ubulwele nabufika apatali.” Bamayo pa kumfwa ifi batendeke ukulila. Naumfwile uko balelumbula amashina ya bulwele pamo nga “autoimmune chronic illness” na “juvenile polyarthritis.” * Apo nali fye ne myaka 10, nshaumfwikishe ifyo badokota balondolwele, lelo nalimwene ukuti ifintu tafyali bwino.
Badokota batile bali no kung’undapila mu cipatala umo bateka abaice. Ifyo icikuulwa calemoneka ilyo twafikile fyalengele naumfwa ububi sana. Abalesunga abana baali abayafya kabili balimbeyele umushishi no kumfwika ifya kufwala ifibi ifyo bafwika abalwele. Naletontonkanya uku ninshi ndelila ati ‘Nkekala shani kuno?’
YEHOVA ALANSAKAMANA
Apo abafyashi bandi balinsambilishe ukuti mfwile ukulapepa Yehova, nalekaana ukukonka ifyo ba Katolika balecita umo balesungila abana. Abalesunga abana tabaleumfwikisha ico nalekaanina. Nalipepele kuli Yehova ukuti angafwe, kabili nalimwene ukuti alingafwile nga filya fine wishi uwatemwa umwana amusakamana.
Abafyashi bandi balibasuminishe ukulantandalila pa Cibelushi pa nshita fye iinono. Balindeteele ifitabo ifilanda pali Baibolo pa kuti icitetekelo candi cilekoselako. Ilingi line abana tabalebasuminisha ukukwata amabuuku, lelo abalesunga abana balinsuminishe ukukwata ifitabo na Baibolo, ifyo nalebelenga cila bushiku. Nale-ebako abaice banandi pe subilo lya kwikala muli Paradaise pano calo, apashakabe ukulwala. (Ukusokolola 21:3, 4) Nangu ca kuti limo naleumfwa ukutalalilwa, naleba ne nsansa pantu icitetekelo candi muli Yehova caleya cilekoselako.
Pa numa ya myeshi 6, badokota balimfumishe mu cipatala. Nangu ca kuti nshapolele, nalitemenwe ukubwelela ku bafyashi bandi. Amolu yalilemene kabili umwasuntinkanina amafupa mwalekalipa sana. Ilyo nali ne myaka 13, umubili wali fye uwanaka, lelo ilyo nafikile imyaka 14, nalibatishiwe pantu nalefwaya sana ukubombela Lesa wandi Yehova. Inshita shimo, naleumfwa kwati Yehova nandekelesha. Nalepepa ati, “Cinshi ine ndwalila? Mwe Lesa mposheni. Bushe tamumona ifyo ncula?”
Ilyo nali umushakana, nalecula sana kabili nalemona fye ukuti nshakapole. Nalitemenwe ukuilinganya ku banandi abashalwele. Nalemona kwati nshacindama, ne ci calengele ndeumfwa insoni ukulanda na bantu. Lelo, balupwa lwandi ne fibusa balengafwa sana. Ndebukisha sana ba Alicia, abancilileko imyaka 20 abaishileba abanandi sana. Banjebele ukuti nshifwile ukulatontonkanya sana pa bulwele bwandi ne fyo nalecula, lelo mfwile ukubika amano ku bantu bambi.
IFYALELENGA NDEBA NE NSANSA
Ilyo nali ne myaka 18, nalilwalishe sana na kabili ica kuti nalenaka sana nga nasangwa ku kulongana. Lelo inshita nalekwata naleibomfya mu kusambilila Baibolo. Ibuuku lya kwa Yobo e lyo ne lya Amalumbo yalingafwile ukumfwikisha ukuti ino nshita Yehova Lesa te lyonse engatucingilila ilyo tulecula lelo alatucingilila sana ku fingonaula bucibusa bwesu na ena. Nalepepa sana kuli Yehova kabili alempeela “amaka yacila aya bantunse” e lyo no “mutende wa kwa Lesa uwacila amatontonkanyo yonse.”—2 Abena Korinti 4:7; Abena Filipi 4:6, 7.
Ilyo nali ne myaka 22, natendeke ukwendela pa ncinga ya balemana. Apo nalelwalilila e lyo nale-endela fye pa ncinga, nalemona kwati abantu tabakulambikako amano. Lelo, incinga yalilengele ndeyendela ica kuti ifintu ifingi fyaliweme. Umunandi Isabel anjebele ukuti nkesheko ukushimikila nankwe ama-awala 60 mu mweshi umo.
Ilyo anjebele ifi, namwene fye ukuti te kuti mombe. Lelo nalipepele ukuti Yehova angafwe kabili balupwa lwandi ne fibusa balingafwile. Ulya mweshi nabombeshe walipwile bwangu kabili nalibombele fye bwino. Nalitemenwe sana ifyo nabombele ica kuti mu 1996, natendeke ukubomba bupainiya bwa nshita yonse, e kutila ukulashimikila inshita iikalamba. Nalicitile bwino ukulabomba bupainiya pantu bwalengele napalama sana kuli Yehova e lyo bwalilenga nakosa. Ukulashimikila sana kwalengele nde-ebako bambi pa fyo nasambilila mu Baibolo kabili nalyafwa bambi ukuba ifibusa fya kwa Lesa.
YEHOVA ALITWALILILA UKUNGAFWA
Mu 2001, nali mu busanso bwa pa musebo kabili amolu yalikontweke. Ilyo nali mu cipatala ninshi ndekalipwa, nalipepele kuli Yehova mu mutima nati: “Mwe Yehova, mwindekelesha!” Ilyo napwile fye ukupepa, abanakashi abali lwa mupepi banjipwishe ati, “Bushe uuli Nte ya kwa Yehova?” Nasuminine fye ku mutwe pantu nshakwete amaka ya kulanda. Banjebele ati, “Imwe mwe bantu tamulubika! Nalitemwa ukubelenga ama magazini yenu.” Ifyo balandile fyalinkoseshe sana. Nangu ca kuti nshaleumfwa bwino, nalishimikiile pali Yehova. Ala nalitemenwe ukulanda pali Yehova!
Ilyo naumfwileko bwino, nalitampile ukushimikila sana na kabili. Bamayo balenjensha pa ncinga uku ninshi ninkwata na fitute ku molu. Cila bushiku twaletandalila abalwele bamo no kubepusha ifyo baleumfwa, kabili twalebapeelako ne mpapulo ishilanda pali Baibolo. Nalenaka sana, lelo Yehova alenkosha.
Ndi na bafyashi bandi, mu 2003
Pali ino inshita, umubili wandi ulakalipa sana kabili ukutula apo batata bafwila, naliba no bulanda sana. Nangu caba ifi, nalitwalilila ukuba uwakosa. Finshi fingafwa ukuba uwakosa? Ilingi line, ndatemwa ukuba ne fibusa na balupwa abalenga nilasakamikwa sana. Nga ndi neka, nalitemwa ukubelenga, ukusambilila Baibolo nelyo ukushimikila abantu pa foni.
Ilingi line ndatemwa ukutontonkanya pa fyo icalo cipya cikaba
Ndomfwa bwino ukufuma pa nse no kumfwako akamwela akasuma e lyo ne fyo amaluba yanunkila bwino. Ifi filenga ndetasha Yehova. Ukuba ne mipulwe na ko kwalingafwa sana. Bushiku bumo ninshi twaleshimikila, umunandi uwalenjensha pa ncinga, aliminine ukuti alembeko fimo. Apo pene natampile ukukunkuluka pa ncinga mpaka nayuma kuli motoka iyaiminine. Bonse babili twalipapile, lelo caliweme pantu tapali uwaicenene e co twalisekele sana.
Kwaliba ifintu ifingi ifyo mfwaisha ukucita, lelo ndafilwa. Ilingi line ndatemwa ukutontonkanya pa fyo icalo cipya ico Lesa atulaya cikaba. (2 Petro 3:13) Ndesha ukwelenganya ifyo nkapola, ifyo nkalaenda e lyo ne fyo ubumi bukawama. Nalicetekela amashiwi ayo Imfumu Davidi yalandile ati: “Cetekela Yehova; kosa kabili leka umutima obe ushipe.” (Amalumbo 27:14) Nangu ca kuti umubili wandi uleya ulenakilako, Yehova alankosha. Nalikosa te mulandu na macushi.
^ par. 6 Ubulwele bwa Juvenile polyathritis, bulwele bwamfyumfyu ubo abaice balwala. Umubili ulafilwa ukuicingilila ku malwele kabili ulonaula insandesande no kulenga umwasuntikana amafupa ukufimba e lyo no kukalipa sana.
