PALAMENI KULI LESA

‘Yehova Alamubelela Uluse’

Kalemba wa lyashi lya kale, Edward Herbert, umwina Britain uwaliko muli ba 1600 atile: “Umuntu uushibelela abanankwe uluse aaba kwati muntu uubongolola ubulalo ubo na o afwile ukwabukilapo.” Aya mashiwi yalanga ukuti tufwile ukwelela bambi pantu na ifwe bushiku bumo tukafwaya ukuti bakatwelele. (Mateo 7:12) Lelo kwaliba umulandu na umbi uwacindama sana uo tufwile ukulaelela bambi. Moneni ifyo umutumwa Paulo alandile pa Abena Kolose 3:13.—Belengeni.

Apo bonse tuli babembu, inshita shimo tulalufyanya nelyo ukukalifya abanensu e lyo na bo kuti batukalifya nelyo ukutulufyanya. (Abena Roma 3:23) Kuti twacita shani pa kuti tuleumfwana na bantu banensu nangu ca kuti bonse tatwapwililika? Lesa aebele Paulo ukulemba ukuti, tufwile ukulasuulako fye ku fyo abanensu baletulufyanya kabili tufwile no kulabelela. Aya mashiwi yalatwafwa sana nga filya fine ya-afwile na bantu abaliko imyaka nalimo 2,000 iyapitapo. Natubebete aya amashiwi Paulo alandile.

“Muleshipikishanya.” Ili ishiwi lya kuti “muleshipikishanya” mu ciGriki lyalola mu kuti tufwile ukusuulako fye abanensu nga batulufyanya. Icitabo cimo citila Abena Kristu “balashipikisha nga ca kuti abantu bambi babalufyanya nelyo babakalifya kabili bacita ifyo ukwabula ukubapatikisha.” Ili ishiwi lya kuti “muleshipikishanya” talilosha fye ku muntu umo, lelo lilosha ku bantu bonse babili, uulufyenye umunankwe e lyo no ushikwete umulandu. Ici cipilibula ukuti nga twalikwata imibele imo iikalifya abanensu, tatufwile ukubapata nga ca kuti na bo balikwata imibele imo iingatukalifya. Kuti twacita shani nga ca kuti abanensu bacita ifintu ifyatukalifya?

‘Mulebelelana uluse.’ Uwasoma umo alandile pe shiwi lya ciGriki ilyapilibulwa “ukubelelana uluse” ukuti “talipilibula fye ukwelela abantu bambi, lelo lipilibula no kucita ifisuma ifyacila pa kwelela umuntu.” Bambi na bo batila ili ishiwi lipilibula “ukucitila abatulufyenye ifintu ifisuma, ifingabanonsha.” Kuti twacitila abatukalifye ifisuma nga ca kuti tuleitemenwa ukubeleela nangu ca kuti tuli ‘ne ca kuilishanya kuli bena.’ Mulandu nshi uo tufwile ukwelela bambi nangu ca kuti tuli ne ca kuilishanya kuli bena? Umulandu umo wa kuti na ifwe bushiku bumo kuti twabakalifya kabili kuti twafwaya batwelela.

“Ifyo Yehova amubelela uluse, e fyo na imwe mulebelelana uluse.” Umulandu uukalamba uo tufwile ukubelela bambi uluse wa kuti Yehova Lesa alatubelela uluse. (Mika 7:18) Tontonkanyeni pa fyo Yehova alanga uluse ku babembu abalapila. Yehova taba nga ifwe pantu ena tabembuka. Na lyo line, alaitemenwa ukwelela ababembu abalapila nangu ca kuti alishiba ukuti ena te kuti abakalifye no kufwaya ukuti bamwelele. Kanshi Yehova e o twingasambililako ifyo tufwile ukulabelela abanensu uluse pantu aleleela sana.

Uluse Yehova akwata lulalenga twapalama kuli ena kabili lulatulenga ukulafwaisha ukumupashanya. (Abena Efese 4:32–5:1) Kanshi tufwile ukulatontonkanyapo ukuti, ‘Apo Yehova alambelela uluse, cinshi cingalenga nakaana ukwelela umuntunse munandi umubembu uwalapila ukufuma pa nshi ya mutima pa fyo acinkalifya?’—Luka 17:3, 4.

AMalembo ya kubelenga mu October

Abena Galatia 1-6; Abena Efese 1-6; Abena Filipi 1-4; Abena Kolose 1-4; 1 Abena Tesalonika 1-5; 2 Abena Tesalonika 1-3; 1 Timote 1-6 ukufika kuli 2 Timote 1-4

[Amashiwi pe bula 11]

Yehova e o twingasambililako ifyo tufwile ukulabelela abanensu uluse pantu aleleela sana