Imbila Nsuma ku Bantu Bonse

Ukubuuka kwa kwa Yesu kwalengele abasambi bakwe ukucincila no kuba ne citetekelo icakosa. Umutumwa Paulo alyendele mu Asia Minor monse na mu Mediterranean, ukupanga ifilonganino no kukosha Abena Kristu ukutwalilila ukuba abakosa ilyo balebatunka ukucita ifyabipa no kubacusha. Nangu ca kuti kwali amafya, abengi balisambilile icine no kuba Abena Kristu.

Paulo balimubikile na mu cifungo, na lyo line, alelembela Abena Kristu amakalata ya kubakoselesha no kubafunda. Alibasokele sana pa busangu. Umupashi wa mushilo walimwafwile ica kuti alishibe no kuti “imimbulu iikali” iikalasambilisha “ifyanyongana,” ikengila mu cilonganino no ‘kongola abasambi pa kuti bakaleikonka.’—Imilimo 20:29, 30.

Ubusangu bwatendeke mu nshita ya batumwa. Pali ilya nshita ninshi Yesu alibuuka kale ku bafwa, asokolwelele Yohane ifyali no kucitika ku ntanshi. Ukulingana ne fyo Yohane alembele, abalelwisha Abena Kristu e lyo na balesambilisha ifya bufi, tabali no kulenga Lesa ukufilwa ukufikilisha ifyo afwaya isonde ukuba e lyo ne fyo alaya abantunse. “Inko shonse ne mitundu yonse na ba ndimi shonse na bantu bonse,” bakakutika ku mbila nsuma iya Bufumu bwa kwa Lesa. (Ukusokolola 14:6) Isonde likaba Paradaise kabili bonse abacita ukufwaya kwa kwa Lesa e bakekalamo.

Bushe kwena iyi te “mbila nsuma?” Nga ca kuti ifyo twalanda mwafitemwa, kuti cawama mwaishibilapo na fimbi pa fyo Lesa atweba mu Baibolo ne fyo Baibolo ingatwafwa muno nshiku e lyo ne fyo ikatwafwa ku ntanshi.

Kuti mwabelenga Baibolo pa Intaneti pa www.isa4310.com. Pali iyi yine adresi, kuti mwabelengapo na broshuwa ya mu lulimi lwesu iitila Imbila Nsuma Ukufuma kuli Lesa! ne citabo citila Bushe Cinshi Baibolo Isambilisha? Kuti mwabelenga ne mpapulo shimbi ishilanda pa co tufwile ukucetekelela Baibolo e lyo ne fyo twingalakonka ifyo itufunda mu ndupwa na pa lwesu. Nga mulefwaya ukwishibilapo na fimbi, kuti mwaipusha ba Nte abali bonse.

—Ili ilyashi lifumine pa Imilimo, Abena Efese, Abena Filipi, Abena Kolose, Filemone, 1 Yohane, na Ukusokolola.