Ukucula Kwalapwa Nomba Line!

Elenganyeni ukuti muleikala mu calo umushili bumpulamafunde, inkondo, amalwele e lyo no tuyofi. Kabili cila bushiku nga mwabuka, tamukwete amafya ya ndalama, takuli abalecita akapaatulula kabili takuli na bankalwe. Bushe ifi twalandapo fileumfwika kwati te kuti ficitike? Ukulanda fye icishinka, takwaba umuntu nelyo akabungwe akali konse akengalenga ifi twalandapo ukucitika. Lelo Lesa alilaya ukufumyapo fyonse ifilenga abantunse ukucula, ukubikako fye na filya twacilandapo mu cipande cifumineko. Belengeni ifyo Icebo ca kwa Lesa, Baibolo calaya:

◼ UBUTEKO UBUSUMA E BUKALATEKA

“Lesa wa mu muulu akemya ubufumu ubushakonaulwe nakalya. Kabili ubo bufumu tabwakashiilwe ku bantu bambi. Bukashonaula no kupwisha aya mabufumu yonse, kabili bwena bukeminina umuyayaya.”—Daniele 2:44.

Ubufumu bwa kwa Lesa, buteko ubwaba ku muulu. Kateka wa ubu Ubufumu, Yesu Kristu, e ukalateka isonde lyonse kabili akalenga ukufwaya kwa Lesa ku kacitike pano isonde nga mu muulu. (Mateo 6:9, 10) Takwakabe ubuteko bwa bantunse ubukapyana ubu buteko pantu “bufumu bwa muyayaya ubwa kwa Shikulwifwe kabili Umupusushi Yesu Kristu.” Umutende tawakapwe.—2 Petro 1:11.

◼ UKUPEPA KWA BUFI KUKAPWA

“Satana umwine alaifungushanya kwati ni malaika wa lubuuto. E ico te ca kupapa nga ca kuti ababomfi bakwe na bo baleifungushanya kwati babomfi ba bulungami. Lelo impela yabo ikaba ukulingana ne milimo yabo.”—2 Abena Korinti 11:14, 15.

Ukupepa kwa bufi kukeshibikwa ukuti kwaba pa milimo ya kwa Satana Kaseebanya kabili Lesa akakufumyapo. Takwakabe ukwipayana e lyo na ba mipepele abacita akapaatulula na bo tabakabeko. Ici cikalenga bonse abatemwa “Lesa wa mweo kabili uwa cine” ukumupepa ne “citetekelo cimo” e lyo no kumupepa mu “mupashi na mu cine.” Ala mu calo mukaba umutende no kwikatana!—1 Abena Tesalonika 1:9; Abena Efese 4:5; Yohane 4:23.

◼ ABANTU BAKABA ABAPWILILIKA

“Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.

Yehova Lesa akafikilisha ubu ubulayo ukubomfya Umwana wakwe Yesu, uwafwilile abantu bonse. (Yohane 3:16) Ilyo Yesu akalateka, abantunse bakapwililika. Takwakabe ukucula na kabili pantu “Lesa umwine akaba pamo na bo” kabili akafuuta “ifilamba fyonse ku menso yabo.” Ukukanapwililika  no kucula fikapwa. Baibolo itila, “abalungama e bakekala mu calo, kabili bakekalamo umuyayaya.”—Amalumbo 37:29.

◼ TAKWAKABE IMIPASHI IIBIFI

“[Yesu Kristu] aikete icing’wena, icisoka ca pa kutendeka, e kutila Kaseebanya kabili Satana, no kucikaka imyaka ikana limo (1,000). Kabili acipoosele mu cilindi icabula impela no kwisalapo no kukomenena pa muulu wa ciko, pa kuti cilufya na kabili inko.”—Ukusokolola 20:2, 3.

Ilyo Satana ne fibanda bakapooswa “mu cilindi icabula impela,” tabakalufye abantu na kabili. Tabakakwate amaka ya kutunka abantu ukucita ifyabipa. Ala cikawama ukwikala mu calo umo Satana ne fibanda tabakakwate amaka ya kulufya abantu!

◼ “INSHIKU SHA KULEKELESHA” SHIKAPWA

“Inshiku sha kulekelesha” shikapwa ilyo kukaba “ubucushi ubukalamba.” Yesu atile “Kukaba ubucushi ubukalamba ubushatala abubako ukutula pa ntendekelo ya ba pano calo ukufika nomba, kabili tabwakatale abubako na kabili.”—Mateo 24:21.

Ubu ubucushi bukaba ubukalamba pa mulandu wa kuti kukacitika amacushi ayashatala ayacitikapo. Aya macushi ya kabipilako pa “nkondo ya bushiku bukalamba ubwa kwa Lesa Wa Maka Yonse,” iyo abengi baishiba ukuti “Armagedone.”—Ukusokolola 16:14, 16.

Abantu mpanga yonse abatemwa icalungama balafwaisha ukuti ukuteka kwabipa ukwabapo nomba kukapwe. Natulande pa mapaalo yamo ayo abalungama bakakwata mu Bufumu bwa kwa Lesa.

LESA AKACITA NA FIMBI!

“Ibumba ilikalamba” likapusuka ukwingila mu calo cipya umukaba umutende: Icebo ca kwa Lesa citila “ibumba likalamba” ilya bantu abashingapendwa ‘abakafuma mu bucushi bukalamba’ bakapusuka ukwingila mu calo cipya umukaba ubulungami. (Ukusokolola 7:9, 10, 14; 2 Petro 3:13) Abakapusuka bakatasha sana Yesu Kristu “Umwana wa mpaanga uwa kwa Lesa, uulesenda ulubembu lwa ba mu calo.”—Yohane 1:29.

Abakaba mu calo cipya bakanonkelamo mu fyo Lesa akalabasambilisha: Mu calo cipya, “isonde likesulamo ukwishiba Yehova.” (Esaya 11:9) Pa fyo Lesa akasambilisha abantu bakwe, pakaba ne fya kwikala na bantu bonse e lyo ne fibumbwa fimbi mu mutende. Lesa alaya ukuti: “Ine, ne Yehova, nine Lesa obe, uukusambilisha ifingakuwamina, uukwensha mu nshila iyo ufwile ukwendamo.”—Esaya 48:17.

Abafwa bakababuusha ukufuma ku nshiishi: Ilyo Yesu ali pano calo, alibuushishe cibusa wakwe Lasaro. (Yohane 11:1, 5, 38-44) Kanshi filya acitile filanga fye ifyo akabuusha abafwa abengi nga atendeka ukuteka mu Bufumu bwa kwa Lesa.—Yohane 5:28, 29.

Mu calo cipya mukaba umutende no bulungami umuyayaya: Ilyo Kristu akalateka, takwakabe bumpulamafunde. Twaishiba shani? Pantu Yesu aleshiba ifili mu mutima, kanshi akalaishiba umulungami no mubifi. Ababifi abashifwaya ukuleka ukucita ifyabipa, tabakekale mu calo cipya ica kwa Lesa.—Amalumbo 37:9, 10; Esaya 11:3, 4; 65:20; Mateo 9:4.

Twalanda fye pa masesemo ya mu Baibolo yamo yamo ayalanda pa fintu ifisuma ifikacitika ku ntanshi. Ubufumu bwa kwa Lesa nga bwalateka, “umutende ukafula” kabili ukabako umuyayaya. (Amalumbo 37:11, 29) Fyonse ifilenga abantu ukulacula e lyo na mafya fikapwa. Twalishininkisha ukuti ifi fyonse fikacitika pantu Lesa alaya ukuti: “Moneni! ndelenga ifintu fyonse ukuba ifipya. . . . Aya mashiwi ya cishinka kabili ya cine.”—Ukusokolola 21:5.

[Icikope pe bula 6]

[Abatusuminishe]

© Silke Woweries/Corbis