AMASUKO KU MEPUSHO YA MU BAIBOLO
AMASUKO KU MEPUSHO YA MU BAIBOLO
Bushe Lesa alakutika amapepo yonse?
Lesa alomfwa amapepo ya bantu aba mishobo yonse. (Amalumbo 145:18, 19) Icebo cakwe Baibolo citweba ukutila kuti twalanda kuli ena pali fyonse ifitusakamika. (Abena Filipi 4:6, 7) Lelo amapepo yamo ayo abantu bapepa, yalafulwisha Lesa. Ku ca kumwenako, Lesa tatemwa amapepo ya kusungila ku mutwe ayo bamo babwekeshabwekeshapo.—Belengeni Mateo 6:7.
Na kabili Yehova tatemwa amapepo ya bantu abashumfwila amafunde yakwe ku mufulo. (Amapinda 28:9) Ku ca kumwenako, kale Lesa alikeene ukukutika ku mapepo ya bena Israele abaleipaya abanabo. Kanshi pa kuti Lesa omfwe amapepo yesu tufwile ukucita ifyo afwaya.—Belengeni Esaya 1:15.
Finshi tufwile ukucita pa kuti Lesa alekutika amapepo yesu?
Pa kuti Lesa aleumfwa amapepo yesu, tufwile ukuba ne citetekelo. (Yakobo 1:5, 6) Na kabili tufwile ukucetekela ukuti e ko aba kabili alatusakamana. Kuti twakosha icitetekelo cesu nga tulesambilila Baibolo, pantu kuti twashininwa ukuti ifyo Lesa alaya mu Baibolo fya cine.—Belengeni AbaHebere 11:1, 6.
Ilyo tulepepa, tufwile ukuba abaicefya kabili tufwile no kupepa ukufuma pa nshi ya mutima. Nangu fye ni Yesu Umwana wa kwa Lesa, aleicefya pa kupepa. (Luka 22:41, 42) Mu nshita ya kulalomba Lesa ifishilingene no kufwaya kwakwe, tufwile ukusambilila ifyo afwaya ukupitila mu kubelenga Baibolo. Nga twacita ifi, ifyo twakulalomba fya kulalingana no kufwaya kwa kwa Lesa.—Belengeni 1 Yohane 5:14.
Nga mulefwaya ukwishibilapo na fimbi, belengeni icipandwa 17 muli ici citabo, Bushe Cinshi Baibolo Isambilisha? icalembwa ne Nte sha kwa Yehova
Kuti mwakopolola ici icitabo pa Intaneti pa www.isa4310.com
[Icikope pe bula 16]
Mulandu nshi Lesa tatemenwa amapepo yamo ayo abantu bapepa?
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Mulandu Nshi Lesa Ashasukila Amapepo Yamo?
Sambilileni umulandu Lesa ashasukila amapepo yamo no mulandu Lesa ashasukila amapepo ya bantu bamo.
