Mose Ali Ne Citetekelo

BUSHE ISHIWI LYA KUTI ICITETEKELO LYALOLA MWI? Ukulingana ne fyo Baibolo yalanda, “icitetekelo” kusubila ifintu ifyo tushamona no kushininkisha ukuti nangu cibe shani fikacitika. Umuntu uwakwata icitetekelo muli Lesa alacetekela sana ukuti Lesa akafikilisha amalayo yakwe yonse.

BUSHE MOSE ALANGILE SHANI UKUTI ALI NE CITETEKELO? Lyonse Mose alecita ifintu ifyalelanga ukuti alicetekele ukuti ifyo Lesa alaile fikacitika. (Ukutendeka 22:15-18) Nangu ca kuti alikwete ishuko lya kwikala bwino sana mu Egupti, “asalile ukuculila pamo na bantu ba kwa Lesa ukucila ukuipakisha ubusuma bwa pa kashita fye ubwa lubembu.” (AbaHebere 11:25) Bushe acitile ifi ukwabula ukutontonkanyapo bwino, ica kuti nga aliculile nga alibukishe ne shuko apanishe? Awe iyo, pantu Baibolo itila, Mose “atwalilile uwashangila kwati alemona Uushimoneka.” (AbaHebere 11:27) Mose tatalile atontonkanyapo ukuti alilufyenye pa fyo alangile ukuti alicetekele amalayo ya kwa Lesa.

Mose aleafwa bambi ukukwata icitetekelo icakosa. Tontonkanyeni pa cacitike ilyo abena Israele bali pa kati ka bashilika ba kwa Farao e lyo na Bemba wa Kashika. Apo baletiina icali no kubacitikila, abena Israele baliliile kuli Yehova na Mose. Cinshi Mose ali no kucita?

Mose afwile taishibe ukuti Lesa aali no kwakanya amenshi pali Bemba Wakashika pa kuti abena Israele baabuke. Lelo nangu cibe ifyo, alicetekele ukuti Lesa ali no kucitapo fimo pa kuti apusushe ababomfi bakwe. Na kabili Mose alefwaya ukuti abena Israele banankwe na bo bakwate icitetekelo. Baibolo itila: “Mose asosele ku bantu ati: ‘Mwitiina. Iminineni ndi no kumona ifyo Yehova alamupususha lelo.’” (Ukufuma 14:13) Bushe Mose alyafwile abena Israele banankwe ukukwata icitetekelo cakosa? Ee, pantu ukulosha ku bena Israele bonse, Baibolo itila: “Citetekelo calengele bapite pali Bemba Wakashika kwati ni pa mushili uwauma.” (AbaHebere 11:29) Kanshi kuti twatila, abena Israele fye bonse balinonkelemo mu kucetekela Yehova.

FINSHI TWINGASAMBILILAKO? Kuti twapashanya Mose nga ca kuti tulecita ifilelanga ukuti twalicetekela amalayo ya kwa Lesa. Ku ca kumwenako, nga ca kuti twatangisha ifya kwa Lesa mu bumi bwesu, Lesa alilaya ukuti akulatupeela fyonse ifyo tukabila. (Mateo 6:33) Cilafya ukukanabika amano ku fikwatwa pantu e fyo abengi babikako sana amano. Lelo tufwile ukwishiba ukuti nga twabombesha sana ukwangusha imikalile yesu no kubika sana amano ku fya kwa Lesa, Yehova akulatupeela fyonse ifyo tukabila. Alaya ukuti: “Nshakakushe nakalya nangu ukukulekelesha nakalya.”—AbaHebere 13:5.

Na ifwe tufwile ukula-afwa bambi ukukwata icitetekelo icakosa. Ku ca kumwenako, abafyashi abatemwa abana bafwile ukubafwa ukucetekela sana muli Lesa. Ilyo abana balekula, bafwile ukwishiba ukuti Lesa e ko aba, kabili e watupeela amafunde ayalenga tuleishiba icisuma ne cibi. Abafyashi bafwile no kusambilisha abana ukuti ukukonka amafunde ya kwa Lesa e cacindama sana. (Esaya 48:17, 18) Abafyashi kuti bacita bwino nga ba-afwa abana babo ukucetekela ukuti Lesa “e ko aba no kuti alalambula abamufwaisha.”—AbaHebere 11:6.