“Cinshi Cimbi Yehova Alefwaya Kuli Iwe?”
Palameni Kuli Lesa
“Cinshi Cimbi Yehova Alefwaya Kuli Iwe?”
FINSHI Yehova enekela ku bafwaya ukumupepa ukulingana ne fyo afwaya? Bushe afwaya ukuti twilalufyanya, ica kuti alalenga fwe bantu abashapwililika ukufilwa ukumusekesha? Nelyo bushe afwaya fye ukuti tulecita ifintu ifyo twingakumanisha? Ukwishiba ifyasuko kuli ifi fipusho kwalicindama nga tulefwaya ukubombela Lesa ne nsansa. Natumone ifyo kasesema Mika alondolwele ifyo Lesa afwaya kuli ifwe.—Belengeni Mika 6:8.
“Alikweba icisuma.” Twalipwa no kwishiba ifyo Lesa enekela kuli ifwe. Alitweba bwino bwino ifyo afwaya kuli ifwe muli Baibolo. Ifyo Lesa afwaya ukuti tulecita, ‘fisuma,’ tafyabipa iyo. “Lesa kutemwa,” e co afwaya ukuti ifintu filetuwamina. (1 Yohane 4:8; 5:3) Nga twakonka amafunde yakwe, tulamusekesha kabili na ifwe bene tulanonkelamo.—Amalango 10:12, 13.
“Cinshi cimbi Yehova alefwaya kuli iwe?” Bushe Lesa alikwata insambu sha kutweba ifya kucita? Ee, alikwata! Apo e Ntulo ya mweo wesu kabili e Utupeela ne fyo tukabila, tufwile ukulamumfwila. (Amalumbo 36:9) Nomba finshi afwaya kuli ifwe? Mika atile, fintu fitatu. Ifya kubalilapo fibili filanda pa fyo tumfwana na bantu banensu, e lyo ica butatu, cilanda pa fyo tumfwana na Lesa.
“Ukuba no mulinganya.” Ishiwi lya ciHebere ilyapilibulwa “umulinganya,” ukulingana ne citabo cimo, “lipilibula ukumfwana e lyo no kukanafyenga abo twikala na bo mu bwikashi.” Lesa tafwaya ukuti tulefyenga abantu bambi lelo afwaya ukuti tuleumfwana na bo ukulingana na mafunde yakwe. Tulanga ukuti twaliba no mulinganya nga tatulepaatulula kabili tuli aba cishinka kuli bambi. (Ubwina Lebi 19:15; Esaya 1:17; AbaHebere 13:18) Nga tatuli na kapaatulula ku bantu banensu, na bo bene tabakabe na kapaatulula kuli ifwe.—Mateo 7:12.
“Ukutemwa icikuuku.” Lesa tafwaya fye twaba ne cikuuku lelo afwaya no kuti twatemwa icikuuku. Ishiwi lya ciHebere ilyapilibulwa “icikuuku” (cheʹsedh) kuti lyapilibula no kuti “ukutemwa kwa cishinka.” Umuntu umo uwasoma Baibolo alandile pali ili shiwi lya ciHebere [cheʹsedh] ukuti, “talipilibula fye ukutemwa nelyo uluse nangu icikuuku lelo lipilibula ifi fyonse pamo.” Nga tuli ba cikuuku, tulaitemenwa ukulanga icikuuku kabili tulatemwa ukwafwa abalecula. Ne ci cilenga twaba ne nsansa.—Imilimo 20:35.
“Ukwenda bufuuke bufuuke na Lesa obe.” Muli Baibolo nga batila “ukwenda,” ninshi balelanda pa “kucita icintu cimo.” Twenda na Lesa nga tulecita ifyo atweba muli Baibolo. Tufwile ukuba ‘abafuuka’ ilyo tulekonka ifyo Lesa atweba. Kuti twaba shani abafuuka? Nga tule-enda bufuuke bufuuke na Lesa, tuleshiba ukuti tatwalingana nankwe no kuti twalipelebela te kuti tucite ifintu fyonse. Kanshi, “ukwenda bufuuke bufuuke” kwishiba bwino ifyo afwaya ne fyo twingamupeela.
Icawama ca kuti Yehova tafwaya ukuti tulecita ifyo tushingakumanisha. Lelo alatemwa nga twabombesha apapelele amaka yesu. (Abena Kolose 3:23) Alishiba ukuti te kuti tucite ifintu fyonse. (Amalumbo 103:14) Nga twasumina ukuti te kuti tucite ifintu fyonse, kuti twaba ne nsansa nga tule-enda na Lesa. Mukwai tulemulomba ukuti musambilile ifyo mwingatendeka ukulaenda na Lesa. Nga mwacita ifi, Lesa akamupaala.—Amapinda 10:22.
Amalembo ya kubelenga mu November:
