Bushe Kuti Twaba Aba Cishinka Muli Cino Calo Cabipa?

“Tufwaya ukuba aba cishinka muli fyonse.”—ABAHEBERE 13:18.

NANGU cingati tulatunkwa ku lubembu, tulatunkwa na kuli Satana Kaseebanya elyo kabili tulatunkwa na ku calo cine twikalamo, kuti twakaana ukucita ifyabipa! Kuti twakaana shani? Kuti twakaana ukucita ifyabipa nga tulepalama kuli Lesa no kulakonka amafunde yakwe ayaba mu Cebo cakwe, Baibolo, aya-afwa abantu pa myaka iingi nga nshi. Moneni ifya kumwenako fibili.

IFUNDE LYA MU BAIBOLO: “Mwilakonkelesha ifyo aba muli cino calo bacita.”—Abena Roma 12:2, Baibolo ya New Jerusalem Bible.

Ifyacitike: Ba Guilherme ni bashimakwebo aba maka aba ku Brazil. Balisumine ukuti taca-anguka ukuba uwa cishinka. Batile, “Umuntu kuti atendeka kubomfya inshila sha bufufuntungu pa kucita amakwebo yakwe. Nalimo ico engacitila fi ni co alefwaya ukuti akampani kalekwata icipimo ca ndalama ico baimika ukuti e sho bafwile ukulakwata nelyo ni pa mulandu wa kuti amakwebo alecita e makwebo na  bantu abengi balecita ica kuti pa kuti fye amakwebo yakwe yebwelela pa nshi afwile ukubomfya inshila sha bufufuntungu. Abengi batontonkanya ukuti ukupeela nelyo ukupoka amafisakanwa kwaliba fye bwino. Umuntu nga e lyo atendeka fye ubukwebo kabili nakwata ne fya kucita ifingi, calyafya ukuba uwa cishinka.”

Nangu ca kuti abantu abengi balacita ifi, ba Guilherme bena balitwalilila ukuba aba cishinka mu bukwebo bwabo. Batile: “Nangu line abengi balacita amakwebo mu bufufuntungu, umuntu kuti aba uwa cishinka. Afwile fye ukuba ne mibele iisuma. Baibolo yalingafwa ukwishiba ubusuma bwa kuba ne cishinka. Umuntu uwa cishinka alaba na kampingu iisuma kabili abantu balamupeela umucinshi. Alaba ca kumwenako cisuma ku bantu bambi.”

IFUNDE LYA MU BAIBOLO: “Abafwaisha ukuba ne fyuma bawila mu matunko kabili mu citeyo kabili mu lunkumbwa ulwingi ulwa kutumpa kabili ulwa kubaletelela, ifitwala abantu mu kuloba kabili mu bonaushi. Pantu ukutemwa indalama e ntulo ya bubi bwa misango yonse.”—1 Timote 6:9, 10.

Ifyacitike: Ba André balikwata akampani. Pabo babombela paliba ne bumba ilikalamba ilya bakateya wa mupila. Bushiku bumo ilyo ili bumba lya bakateya wa mupila lyapwishishe ukuteya umupila, ba André baile ku maofeshi ya ku cibansa ku kukutwala amapepela ya ku balipililapo pa milimo babombele. Basangile aba muli dipartimenti ilolekesha pa ndalama, balependa indalama isho bapokelele ku baleshitisha amatiketi. Apo nshita yalipwile umukalamba wa iyi dipartimenti alyangufyenye ukulipila bonse ababombele imilimo ukubikako fye na ba André.

Ba André batile, “Ilyo naleya ku ng’anda naishilesanga ukuti bampeele indalama ishingi ukucila isho bali no kundipila. Nalishibe ukuti limbi te kuti beshibe abo balipile indalama ishingi. Lelo nalyumfwilileko uyu muntu uluse pantu nalishibe ukuti bali no kumuputwila ku malipilo yakwe. E co nalibwelelemo. Napulinkenye mwi bumba lya balefuma mu kutamba umupila kabili nalibwekeshemo indalama. Umukalamba wa dipartimenti ilolekesha pa ndalama alipapile. Takwatalile akuba umuntu uwacitilepo ica musango uyu.”

Ba André balandile no kuti: “Ukuba ne cishinka kwalengele ukuti umukalamba uulolekesha pa ndalama ancetekele. Napapita imyaka iingi, lelo pa twampani utwalebombela ili bumba, ni kampani yandi fye e yatwalilila ukubabombela. Nalitemwa nga nshi pantu ukukonka ifyo Baibolo isambilisha kwalilenga ukuti abantu bancindike.”

Tulaba ne nsansa ukwishiba ukuti Lesa kuti atwafwa ukukanacita ifyabipa. Fwe bantu te kuti tupwishe amafisakanwa pantu te kuti tufumyepo ifilenga abantu ukulacita amafisakanwa. Bushe ici cilepilibula ukuti amafisakanwa tayakapwe? Icipande ca kulekeleshako pali fino fipande cilelanda ifyo Baibolo yasuka ici cipusho.

[Amashiwi pe bula 6]

“Baibolo yalingafwa ukwishiba ubusuma bwa kuba ne cishinka.”—BA GUILHERME

[Amashiwi pe bula 6]

“Nalitemwa nga nshi pantu ukukonka ifyo Baibolo isambilisha kwalilenga ukuti abantu bancindike.”—BA ANDRÉ