Baibolo Ilaalula Abantu

CALI shani pa kuti umwaume uushakulile bwino abe ne nsansa, kabili abe umulume kabili umufyashi umusuma? Cinshi calengele umwanakashi walecita ifyabipa ukucinja? Yumfwileni ifyo abene bashimika.

“Naleimona uwa Cabe Cabe”—VÍCTOR HUGO HERRERA

UMWAKA BAFYELWE: 1974

ICALO: CHILE

IFYO BALI: BALIKUNKWIME KU BWALWA

INKULILO YANDI: Nafyalilwe mu musumba wa Angol, ku kapinda ka ku kuso aka Chile kabili nshatalile monanapo na batata. Ilyo nali ne myaka itatu, ine na bamayo no mwaice wandi umwaume twakuukile ku musumba ukalamba uwa Santiago. Twatendeke ukwikala mu kayanda akanono aka muputule umo. Twalebomfya icimbusu ca cintubwingi, kabili twaletapa amenshi ku mupaipi wa menshi ayo babomfya pa kushimya umulilo.

Pa numa ya myaka nalimo ibili, ubuteko bwalitupeele ing’anda iinono. Ku ca bulanda, uko twakuukile abena mupalamano besu abengi balebomfya imiti ikola, bali ni bacakolwa, balecita ulukaakala no bupulumushi.

Bushiku bumo bamayo baishileishibana na shikulubantu umo ifi kabili mu kupita kwa nshita balyupene. Batata abaupile bamayo bali ni bacakolwa kabili balepuma sana bamayo kumo na ine wine. Ilingi line nga ndi neka nalelila sana, naleti fye kanshi nga nalikwete batata aba kumpokololako!

Nangu ca kuti bamayo balebombesha pa kuti batusakamane, twali abapiina. Inshita shimo nga tuli ne nsala twalemyanga fye umukaka wa bunga na shuga. Nga tulefwaya ukutambako fimo twalefyuka no kuya pa bena mupalamano mu kutamba TV, lelo twaletambila fye pa windo. Bushiku bumo abene ba ng’anda balitusanganishe kabili e po twalekele no kuyako!

Limo limo fye, na lyo ninshi tabanwine, e lyo batata baletushitila ifya kulya, ine no mwaice wandi. Lelo bushiku bumo batata balitushitiile ka TV akanono. Iyi e nshita njibukishako fye ukuba ne nsansa.

Naishibe ukubelenga ilyo nali ne myaka 12. Umwaka wakonkelepo nalilekele isukulu kabili nalitendeke incito. Nga twainunka twaleya ku ma parte nabo twalebomba nabo uko twalenwa sana ubwalwa no kubomfya imiti ikola. Tapapitile ne nshita nalikunkwime.

Naishibene na Cati ninshi ndi ne myaka 20 kabili mukuya kwa nshita twalyupene. Ilyo twaupene fye ifintu fyale-enda fye bwino, lelo ilyo papitile inshita natendeke ukucita ifyo nalecita kale. Imibele yandi yalibipileko. Nasukile natendeka ukumona ukuti ifyo nalecita fyali no kunkakisha nelyo fye ukunjipaisha. Ku ca bulanda nalelenga umwana wandi Víctor ukucula ku fintu ifyo naleculako  ilyo nali umwaice. Nalyumfwile sana ububi no bulanda kabili naleimona uwa cabe cabe.

Mu 2001, ba Nte babili balishile pa ng’anda kabili batendeke ukusambilisha Cati Baibolo. Cati alenshimikilako ifyo alesambilila. Apo nalefwaisha ukwishiba ifyo umwina mwandi alesambilila, na ine wine natendeke ukusambilila Baibolo. Mu 2003, Cati alibatishiwe no kuba Inte ya kwa Yehova.

IFYO BAIBOLO YA-ALWILE UBUMI BWANDI: Bushiku bumo, nabelengele amashiwi ya mu Baibolo ayaba pali Ruti 2:12 ayatila Yehova alapaala abantu ba citetekelo kabili abooba mwi samba lya mapindo yakwe. Nalishibe ukuti nga nayaluka kuti nasekesha Lesa kabili na o kuti ampaala. Nasangile ukuti Baibolo ilalanda sana pa bubi bwaba mu kukolwa ubwalwa. Amashiwi yaba pali 2 Abena Korinti 7:1 yalimfikile sana pa mutima. Pali ili lembo Baibolo itukonkomesha ‘ukuisangulula kuli fyonse ifikowesha.’ E co natendeke ukuleka imisango yandi iyabipa. Ilyo natendeke fye ukwaluka, nalefulwa sana lelo Cati talekele ukunkoselesha.

Nasukile naleka incito pantu ilingi line ku ncito e ko balentunka ukupeepa fwaka no kunwa sana ubwalwa. Nangu ca kuti ilyo nalekele incito indalama sha kubomfya mu mikalile shalicepele, nalikwete inshita iikalamba iya kusambilila Baibolo. Pali iyi nshita e lyo natendeke ukuya pa ntanshi mu fya kwa Lesa. Cati taleilishanya pa mulandu wa kuti twalyangwishe imikalile yesu kabili talefwaya ifyacilile pa fyo ningakumanisha. Ndatasha nga nshi pa fyo antungilila.

Mu kuya kwa nshita, natendeke ukusangwa sana na ba Nte. Balingafwile ukwishiba ukuti te mulandu no kukanafika apatali mu masambililo, Yehova alamona ifyo mfwaisha ukumubombela. Ifyo aba mu cilonganino batemwanene no kwikatana fyalifikile sana ulupwa lwesu pa mutima. Ni mu cilonganino ca Bena Kristu fye e mwali umutende wa musango uyu. Mu December 2004 na ine wine nalibatishiwe.

IFYO NANONKELAMO: Nalimona ifyo amashiwi ya kwa Yehova ayaba pali Esaya 48:17 yaba aya cine. Yatila: “Ine, ne Yehova, nine Lesa obe, uukusambilisha ifingakuwamina.” Bamayo no mwaice wandi balitemenwe sana ukumona ifyo nayalwike ica kuti na bo balitendeka ukusambilila Baibolo. Nangu fye bena mupalamano balitemwa ukumona ifyo nayaluka kabili mu lupwa lwesu mwaliba insansa.

Nalikwata umwina mwandi uwatemwa Lesa kabili uumona ukuti nine cibusa wakwe uwacetekelwa. Nangu ca kuti nshatalile monapo batata, Baibolo yalinsambilisha ifya kukusha abana bandi abaume batatu. Abana balincindika. Ne cacilishapo ukuwama ca kuti balishiba ukuti Yehova e ko aba kabili balimutemwa.

Ndatasha Yehova pa kuti nomba naliba ne nsansa te mulandu ne fyo ifintu fyabipile ilyo nalekula.

 “Naishileba umukali,kabili uwa lubuli.”—NABIHA LAZAROVA

UMWAKA BAFYELWE: 1974

ICALO: BULGARIA

IFYO BALI: BALESHITISHA IMITI IKOLA

INKULILO YANDI: Nafyalilwe mu Sofia ku Bulgaria mu lupwa ulukankala. Batata babutwike pa ng’anda no kutusha fweka ninshi ndi ne myaka 6. Calimponeshe pa musao kabili nalecula sana na matontonkanyo. Ilyo naleya ndekula naleyumfwa ukuti takwali uwantemenwe ne ci calengele ukuti mpondoke. Naishileba umukashana umukali kabili uwa lubuli.

Ilyo nali ne myaka 14 nalibutwike ukufuma pa ng’anda pa muku wa kubalilapo. Ilingi line naleibila bamayo, bashikulu na bamama indalama. Inshita ishingi naleba mu bwafya ku sukulu pantu nali uwa lubuli ne ci calengele ukuti nsambilile pa masukulu 5 ayapusanapusana mu myaka fye inono. Ilyo kwashele imyaka itatu ukuti mpwishe amasambililo no kupoka diploma, nalilekele isukulu. Natendeke ukucita ifyabipa pamo nga ukupeepa fwaka ne bange. Nalenwa sana ubwalwa no kuya ku ma parte. Natendeke no kushitisha imiti ikola. Nalesakamikwa nga nshi ukumona uko abantu mu calo balecula no kufwa. Naleikala ubumi bwa kuti tulye no kunwa pantu mailo tukafwa.

Mu 1998, ilyo nali ne myaka 24 balinjikete pa mulandu wa kushitisha imiti ikola. Banjikatiile pa cibansa ca ndeke ica ku São Paulo, ku Brazil. Balimbwekeshemo ku Bulgaria no kunkaka imyaka ine.

IFYO BAIBOLO YA-ALWILE UBUMI BWANDI: Mu 2000, Inte sha kwa Yehova batendeke ukutandalila icifungo uko nakakilwe. Baleisa fye umuku umo mu mulungu. Pa baleisa mu kututandalila, ba Marines, e bali ne cikuuku nga nshi kuli ine. E balengele ukuti ntendeke ukufwaya ukusambilila Baibolo. Apo baNte nshabeshibe bwino bwino, naipwishe umufungwa munandi ukunondolwelako ifyo baba. Ica mpapwishe ca kuti abengi abo naipwishe balenjeba fye ifibi pali baNte. Umufungwa umo anjebele ukutila kuti napepa kwi calici ilili lyonse ukufumyako fye ku Nte sha kwa Yehova. Ifyo alandile fyalengele mfwaishe ukwishiba ico abengi bapatila Inte sha kwa Yehova. Naishileishiba ukuti ni pa mulandu wa kutila baNte e bakwata imipepele ya cine. Na kuba Baibolo itila bonse abafwaya ukukonka Yesu mu bufumacumi bakabacusha.—2 Timote 3:12.

Pali iyi inshita, bampeele umulimo wa kubombela ku maofeshi ya mu cifungo mwine. Bushiku bumo mu muputule umo basungila ifintu nasangile ifibokoshi umwali magazini ya kale iya Ulupungu lwa kwa Kalinda na Loleni! * Nasendele iyi magazini ku muputule uko nalelala no kutendeka ukubelenga. Nga nabelenga sana iyi magazini, naleumfwa kwati ni filya umuntu uuli mu ciswebebe icauma engomfwa nga asanga amenshi. Apo nalikwete inshita iikalamba, nalebelenga Baibolo cila bushiku pa maawala ayengi.

 Bushiku bumo aba ku maofeshi ya mu cifungo balinjitile. Bwangu bwangu fye nalongenye utupe twandi tonse no kushalikapo abafungwa banandi, pantu nale-enekela ukufuma mu cifungo. Ku ca bulanda, ilyo nafikile kulya banjebele ukuti ninkwata umulandu na umbi, uwa kusangwa na mapepala ya bufi. Pali uyu mulandu balinkakile imyaka ibili na imbi.

Pa kubala, nalyumfwile ububi. Calimbipiile icine cine! Lelo ilyo papitile inshiku ishinono fye, nailwike ukuti ukukakwa imyaka na imbi ibili kwalifye bwino. Nangu cingati nalisambilile ifingi mu Baibolo, mu mutima mwena naletila fye nga nafuma nkakonkanyapo ukucita ifyo nalecita kale. Nalekabila inshita iikalamba pa kuti njaluke.

Limo limo naletontonkanya ukuti Lesa te kuti atemwe mbe umubomfi wakwe. Lelo naletontonkanya sana pa mashiwi yaba pali 1 Abena Korinti 6:9-11. Ili lembo litila Abena Kristu bamo abaliko mu nshiku sha batumwa bali bapuupu, bacakolwa, kabili incenjeshi ilyo bashilatendeka ukubombela Yehova. Na lyo line Yehova alibafwile ukwaluka. Nalikoseleshiwe pa fyo bayalwike.

Tacayafishe ukuleka imisango imo iyabipa iyo nakwete. Ku ca kumwenako, nalilekele ukubomfya imiti ikola ukwabula no bwafya. Lelo ukuleka ukupeepa fwaka kwalyafishe. Canseendele ukucila umwaka uutuntulu pa kuti ndeke ukupeepa fwaka. Icangafwile ukuleka ukupeepa fwaka kwishiba ukuti fwaka ilonaula ubumi bwa muntu. Na cimbi icangafwile sana kupepa lyonse kuli Yehova ukuti angafwe ukuleka ici icimusango cabipa. Kale naleumfwa ukuti tapali uwantemenwe ilyo batata batubutwike no kutusha fweka, nomba naishileishiba ukuti kwaliba uwantemwa, no yu ni Yehova. Amashiwi yaba pa Amalumbo 27:10 yalinkoseleshe sana. Ili lembo litila: “Nga tata na mayo bansha, Yehova kuti ambuula.” Nalisanga Umufyashi umusuma sana, uushakabale ansha! Nomba nalishiba ico nabela pano calo. Imyeshi 6 pa numa ya kufuma mu cifungo, mu April 2004, nalibatishiwe no kuba Inte ya kwa Yehova.

IFYO NANONKELAMO: Nomba nalileka imisango yabipa kabili naliba ne nsansa nga nshi ukucila ifyo nali ilyo nali umwaice. Nshicula sana na matontonkanyo kabili ndaipakisha ubumi ubusuma. Ndaipakisha bucibusa na Tata uwa ku muulu, Yehova. Nalisanga batata, bamayo, bamunyinane ne nkashi mu cilonganino ca kwa Lesa. (Marko 10:29, 30) Ndatasha sana ukuti bamunyina balimwene ukutila kuti nabombela Lesa nangu ca kutila te fyo ine naleimona.

Inshita shimo, ndayumfwa uwa mulandu pa fyo nalecita kale. Nomba ndasansamushiwa ukwishiba ukuti mu calo cipya ico Lesa alaya ifyabipa fyonse “fikalabwa.” (Esaya 65:17) Pali ino nshita, ifyo napitamo filalenga ukumfwila uluse abantu abacita ifyo nalecita kale. Kanshi ifyancitikila fyalingafwa sana ukuba no luse. Ku ca kumwenako, nga ndeshimikila imbila nsuma, cilang’angukila ukushimikila ku bantu ababomfya imiti ikola, kuli bacakolwa na ku fipondo. Nalishiba ukutila apo ine nalyaluka, umuntu uuli onse na o kuti aaluka!

[Futunoti]

[Amashiwi pe bula 27]

“Nangu ca kuti nshatalile monapo batata, Baibolo yalinsambilisha ifya kukusha abana bandi abaume batatu”

[Amashiwi pe bula 29]

“Nalisanga Umufyashi umusuma sana, uushakabale ansha!”