Ababelenga Ino Magazini Balepusha Ukuti . . .

Bushe Ukupeepa Fwaka Mulandu Kuli Lesa?

▪ Umuntu uulefwaya ukwishiba icishinka kuti aipusha ici cipusho pantu muli Baibolo tamwaba ifunde nangu limo ililanda pa kupeepa fwaka. Lelo bushe ici cilepilibula ukuti te kuti twishibe ifyo Lesa amona ukupeepa fwaka? Awe nakalya.

Baibolo itila, “Amalembo yonse aya mushilo yafuma kuli Lesa.” (2 Timote 3:16) Mu Baibolo mwaliba ifyebo ifitulanga ifyo Lesa afwaya tulesunga ubumi bwesu. Intanshi, natulande pa fyo abasambilila basanga pa fyo ukupeepa fwaka kucita ku bumi bwa muntu. Lyena, twalalanda pa fyo ifyebo fyaba mu Baibolo fyumfwana ne fyo abasambilila basanga.

Ukupeepa fwaka kulonaula ubumi kabili kulepaya. Pa bantu 5 abafwa mu United States, umo afwa pa mulandu wa kupeepa fwaka. Akabungwe ka National Institute on Drug Abuse katile, cila mwaka mu United States abantu abafwa pa mulandu wa kupeepa fwaka “balafula sana ukucila impendwa yonse pamo iya bantu abo bepaya fye, abaipaya abene, abafwa ku bwalwa, ku kubomfya bubi bubi imiti ikola, ku masanso ya pa musebo, na kuli AIDS.”

Abapeepa fwaka balonaula ubumi bwa bantu bambi. Ukupeema fye icushi icinono ica fwaka na ko kwine kuti kwaonaula ubumi bwa muntu. Abantu abashipeepa fwaka lelo abapeemako icushi ca fwaka nabo bene kuti balwala kansa ya kuli bapwapwa na malwele ya ku mutima. Mu myaka ya nomba line, badokota basanga ukuti kwaliba na bambi abalwala nangu ca kuti tabapeemeneko icushi ca fwaka. Umuntu nga apeepa fwaka, nangu icushi nacipwa, kulaba fimo ififuma kuli fwaka ifishala ku fya kufwala, pali kapeti, na ku fintu fye fimbi. Ifi fishala filalwalika, maka maka abana abanono kabili kuti fyalenga no kuti abana balefilwa ukusambilila bwangu ifintu.

Ukupeepa fwaka kulalenga umuntu ukukunkuma. Ukupeepa fwaka kulateka umuntu ubusha. Na kuba, abasambilila basanga ukuti muli fwaka mwaliba ico beta ukuti nicotine, kabili iyi yine nicotine e ilenga abantu ukukunkuma ica kuti bafilwa no kuleka ukupeepa.

Bushe ifyebo fyaba mu Baibolo fyumfwana shani ne fi ifishinka twalandapo? Natulandeko pali fimo:

Lesa afwaya ukuti tulecindika ubumi. Mu Mafunde ayo Lesa apeele uluko lwa bena Israele, alandile ukuti bonse abalefwaya ukumusekesha baalingile ukucindika ubumi. (Amalango 5:17) Aebele abena Israele ukukuula ica kucingilila pa mutenge wa ng’anda. Mulandu nshi abebele ifi? Imitenge balekuula yaleba iyabatama kabili e po baleikala pa kwisha. Icibumba balekuula pa mutenge calecingilila ulupwa na bantu bambi pa kuti tabaponene no kuicena nelyo ukufwa. (Amalango 22:8) Na kabili, abena Israele balingile ukushininkisha ukuti ifitekwa fyabo tafyalecena abantu bambi. (Ukufuma 21:28, 29) Kanshi umuntu uupeepa fwaka, tomfwila Lesa uwapeele abena Israele aya mafunde. Alonaula ubumi bwakwe ku mufulo fye e lyo no bumi bwa bantu abo aba nabo.

Lesa afwaya ukuti tumutemwe no kutemwa abanensu. Yesu Kristu atile abasambi bakwe balingile ukumfwila amafunde ayakalamba yabili. Bafwile ukutemwa Lesa no mutima wabo onse, no mweo wabo onse, no kutontonkanya kwabo konse, na maka yabo yonse kabili bafwile ukutemwa abantu bambi nge fyo baitemwa abene. (Marko 12:28-31) Apo Lesa e watupeele ubumi, umuntu nga alapeepa fwaka ninshi tacindika ubumi Lesa atupeela kabili ninshi tatemwa na Lesa. (Imilimo 17:26-28) Umuntu uupeepa fwaka kuti aonaula ubumi bwa bantu bambi, kabili na filya engalalanda ukuti alitemwa abantu bambi ninshi fya bufi.

Lesa afwaya ukuti tuletaluka ku misango yabipa. Baibolo ifunda Abena Kristu ukuisangulula kuli “fyonse ifikowesha umubili no mupashi.” (2 Abena Korinti 7:1) Ukwabula no kutwishika, ukupeepa fwaka kulakowesha umuntu. Cilafya umuntu ukuleka ukupeepa fwaka pa kuti alesekesha Lesa. Lelo Lesa nga amwafwa, kuti aleka ici cimusango cakowela icilenga abantu ukukunkuma.