Ababelenga Ino Magazini Balepusha Ukuti . . .

Mulandu nshi Lesa alefwaila ukuti abantu bakwe baleupana fye na bo balepepa nabo?

▪ Mu Mafunde Lesa apeele abena Israele, mwali ne li funde ilya kuti: “Mwikofishanya na bo. Abana benu abanakashi mwikabapeela ku bana babo abaume, kabili abana babo abanakashi mwikabuulila abana benu abaume.” (Amalango 7:3, 4) Mulandu nshi Lesa akaanishe abena Israele ukulaupana na bantu abashalemupepa?

Umulandu wa kubalilapo wa kuti, Yehova alishibe ukuti Satana alefwaya ukonaula abantu bakwe pa kubalenga ukulapepa balesa ba bufi. Lesa asokele abena Israele ukuti abantu aba mu nko shimbi baali no ‘kulenga abana babo abaume ukuleka ukumukonka, kabili baali no kulabombela balesa bambi.’ Nga ca kuti abena Israele batendeke ukupepa balesa bambi, ifintu fyali no kubipa. Lesa taali no kutwalilila ukubapaala no kubacingilila, kabili abalwani babo bali no kubasansa. Nomba ifi aficitika, bushe Mesia uwalailwe nga afyalilwe shani muli ulu luko? Ukwabula no kutwishika, uyu e mulandu wine Satana alefwaila ukubelelekela abena Israele ukulaupana na ba mu nko shimbi.

Umulandu wa bubili wa kutila, Lesa alibikile amano ku mwina Israele onse. Alishibe ukuti pa kuti umuntu umo na umo abe ne nsansa alingile ukuba cibusa wine wine uwa kwa Lesa. Bushe kwali umulandu wine wine uo Yehova aebele abantu bakwe ukukanaupana na bantu abashalemupepa? Natulande pa ca kumwenako ca Mfumu Solomone. Solomone alishibe ifyo Yehova abasokele pa kuupa abanakashi abashalepepa Yehova, atile: “Bakalula imitima yenu mukatampe no kukonka balesa babo.” Pa mulandu wa kuti Solomone alikwete sana amano, nalimo aletontonkanya ukuti uku ukusoka kwa kwa Lesa takwamukumine. Alisuulile ifyo Lesa asokele abantu bakwe. Cinshi cafuminemo? “Abakashi bakwe bayalwile umutima wakwe . . . ukulakonka balesa bambi.” Ala kwena ici cintu calibipile! Yehova alilekele ukupaala Solomone kabili pa mulandu wa kuti taumfwilile Lesa, abantu bakwe balyakanikene.—1 Ishamfumu 11:2-4, 9-13.

Lelo bamo kuti batila ifyacitikile Solomone te lyonse ficitika. Ku ca kumwenako, Maalone, umwina Israele aupile Ruti umwina Moabu, kabili Ruti alishiletendeka ukupepa Lesa wa cine. Na lyo line, Maalone alilufyenye pa kuupa umwanakashi umwina Moabu. Muli Baibolo tabalandapo ukuti Maalone alicitile bwino pa kuupa umwina Moabu; Ilyo Maalone afwile ninshi mwaice, kabili nalimo ninshi na Ruti talatendeka ukupepa Lesa, Yehova. Kilyone munyina wa kwa Maalone, aupile Olipa umwina Moabu, uwatwalilile fye ukupepa “tulesa twakwe.” Lelo Boasi ena aupile Ruti ninshi palipita imyaka ukutula apo Ruti atendekele ukupepa Yehova. Na kuba, pa numa abaYuda balemona Ruti ukuti “mwina fyalo uwaishilesanguka umuYuda mwine mwine.” Ruti na Boasi balipaalilwe nga nshi mu cupo cabo.—Ruti 1:4, 5, 15-17; 4:13-17.

Bushe nga twatontonkanya pa cupo ca kwa Maalone na Ruti, kuti twatila caliba fye bwino ukusuula ifunde lya kwa Yehova no kuupana no muntu uo tushipepa nankwe? Bushe ukutontonkanya kwa musango yu te cimo cine no kumona umuntu awina indalama ishingi mu cangalo ca kushitikapo, e lyo twalalanda ukuti ukuteya ici cangalo kwaliba fye bwino?

Baibolo ikoselesha Abena Kristu muno nshiku ukuupa no kuupilwa “muli Shikulu epela.” Itusoka ukukanaba “kwi koli limo line na bashatetekela.” Uku kufunda kwabelako Abena Kristu ba cine abalefwaya aba kuupana nabo. Kuli balya aba kuti balyupana na bashasumina, muli Baibolo mwaliba ukufunda ukusuma ukwingabafwa mu mafya bakwata. (1 Abena Korinti 7:12-16, 39; 2 Abena Korinti 6:14) Uku ukufunda konse kulanga ukuti Yehova Lesa, uwatendeke icupo, afwaya ukuti tube ne nsansa ilyo tulemupepa, nampo nga tuli bashimbe nelyo twalyupa nelyo ukuupwa.