Ababelenga Ino Magazini Balepusha Ukuti . . .

Bushe Abena Kristu ba Kubalilapo Baleibimba mu Mapolitiki?

▪ Ilyo Yesu talaya ku muulu, alyebele abasambi bakwe pa fyo balingile ukulabomba umulimo wa kushimikila, lelo tabebelepo ukuti balingile ukulaibimba mu mapolitiki. (Mateo 28:18-20) E ico abasambi batwalilile ukukonka ifyo Yesu abebele pa kubala ukuti: “Peeleni ifya kwa Kaisare kuli Kaisare, ne fya kwa Lesa kuli Lesa.”—Marko 12:17.

Bushe ifi Yesu aebele abasambi bakwe fyabafwile shani ukulaikala mu calo libe ninshi tabali ulubali lwa ciko? Bushe baleishiba shani ifyo balingile ukupeela ku Buteko, nelyo kuli Kaisare, ne fyo balingile ukupeela kuli Lesa?

Umutumwa Paulo alemona ukuibimba mu mapolitiki ukuti kupusana ne fyo Yesu alandile. Icitabo citila Beyond Good Intentions—A Biblical View of Politics calanda ukuti: “Apo Paulo ali mwina Roma, alebomfya insambu isho ubuteko bwabikileko ku bena Roma ilyo balemulubwisha, lelo taleibimba mu fya buteko.”

Finshi Paulo aebele Abena Kristu banankwe ukuti e fyo balingile ukulakonka? Icitabo cimo cine citila: “Mu makalata alembeele Abena Kristu banankwe abali mu misumba iikalamba pamo nga Korinti, Efese, na Roma, talandilepo ukuti balingile ukulaibimba mu fikansa fya calo.” Icitabo calandile no kuti: “[Paulo] abebele ukulanakila ubuteko, lelo mu makalata yakwe yonse tapeelepo ifunde lya kuti aba mu calici balingile ukuibimba mu fya calo.”—Abena Roma 12:18; 13:1, 5-7.

Abena Kristu abaliko ninshi palipita ne myaka iingi ukutula apo Paulo afwilile, balishibe umwa kupelela, balishibe ifyo balingile ukupeela kuli Lesa ne fyo balingile ukupeela ku Buteko. Balitwalilile ukucindika ubuteko, lelo tabaleibimba mu mapolitiki. Icitabo ca Beyond Good Intentions calandile pali aba Abena Kristu ukuti: “Nangu ca kutila balishibe ukuti balingile ukulacindika ubuteko, tabasumine mu kuibimba mu mapolitiki.”

Lelo ilyo papitile imyaka 300 pa numa ya mfwa ya kwa Kristu, ifintu fyalyalwike. Uwasambilila pa fya mipepele Charles Villa-Vicencio alembele mu citabo citila Between Christ and Caesar, ukuti: “Ilyo Konstantino atendeke ukuteka, cimoneka kwati Abena Kristu abengi balitendeke ukwingila incito mu buteko, bambi baleingila ubushilika, bambi nabo balisumine ukulabomba imilimo iyakumine ifya mapolitiki.” Cinshi cafuminemo? Ilyo calefika ku mpela ya myaka ya ba 300 C.E., ukutumbinkanya imipepele na mapolitiki kwaishilesanguka imipepele ya Buteko bwa bena Roma.

Muno nshiku, imipepele iingi iitila ya Bena Kristu yalitwalilila ukukoselesha abantu babo ukulaibimba mu mapolitiki. Lelo ababa muli iyi mipepele, tabapashanya Kristu, kabili tabakonka ifyalecita Abena Kristu ba kubalilapo.