Amepusho Twakwata Pali Yesu Kristu Ya-asukwa
Amepusho Twakwata Pali Yesu Kristu Ya-asukwa
“Bushe amabumba yatila nine ani?”—LUKA 9:18.
ICO Yesu aipushishe abasambi bakwe ici cipusho mulandu wa kutila alishibe ukuti abantu baishibe ifyapusanapusana pali ena. Nomba abantu balilingile ukumwishiba bwino pantu aleba pamo nabo, aleya mu mishi yabo na mu misumba kabili talecita ifintu mu bumfisolo. Aleshimikila no kusambilisha apabuuta pantu alefwaya abantu ukwishiba icine pali ena.—Luka 8:1.
Kuti twaishiba icine pali Yesu nga twabelenga pa fyo alelanda no kucita ifyalembwa mu mabuuku ya mu Baibolo aya Mbila Nsuma, e kutila muli Mateo, Marko, Luka na Yohane. Ifyalembwa muli aya mabuuku e fingatwafwa ukwasuka amepusho twakwata pali Yesu. *—Yohane 17:17.
ICIPUSHO: Bushe cine cine Yesu e ko aali?
ICASUKO: Ee, e ko aali. Bakalemba we lyashi lya kale, ukubikako na Josephus na Tacitus abaliko mu nshita ya batumwa, batila Yesu e ko aali. Ne cacindama sana ca kuti amabuuku ya Mbila Nsuma yalalanga bwino bwino ukuti Yesu e ko ali, te muntu wa kwelenganya fye iyo. Yalilondolola mu kulungatika ifyalecitika, uko fyalecitikila ne lyo fyacitike. Ku ca kumwenako, Luka, uwalembeleko amabuuku ya Mbila Nsuma alilanda pali bakateka 7, icalenga twaishiba umwaka Yesu atendeke umulimo wakwe pano calo. Aba bakateka balibalandapo na kuli bakalemba we lyashi lya kale.—Luka 3:1, 2, 23.
Ubushininkisho ubulanga ukuti Yesu e ko aali bulalenga twasumina ukuti cine cine e ko aali. Icitabo ca kuti Evidence for the Historical Jesus citila: “Abasoma abengi kuti basumina ukutila mu nshita ya batumwa kwali umuntu uo baleita ukuti Yesu umwina Nasarete.”
ICIPUSHO: Bushe Yesu ni Lesa?
ICASUKO: Awe. Yesu tabalile alandapo ukuti alilingene na Lesa. Lelo lyonse alelanda ukuti Yehova mukalamba pali ena. * Ku ca kumwenako, Yesu alandile pali Yehova ati “Lesa wandi,” kabili ‘Lesa wa cine eka.’ (Mateo 27:46; Yohane 17:3) Ico Yesu alandile aya mashiwi ni co talingana na Lesa. Umubomfi uwita umubomfi munankwe ukuti “umukalamba wa ncito” ninshi talingana nankwe.
Yesu na kabili alilangile ukuti ena na Lesa bantu babili abapusana. Inshita imo, aebele abalemusuusha ukuti: “Mu Mafunde yenu mwalembwa ukuti, ‘Ubunte bwa bantu babili bwa cine.’ Ine njishimika ubunte ne mwine, na Tata uwantumine anshimika ubunte.” (Yohane 8:17, 18) Yesu na Yehova bantu babili abapusana, pantu kuti alanda shani ukuti ubunte bwa bantu babili? *
ICIPUSHO: Bushe Yesu ali fye umuntu umusuma?
ICASUKO: Awe iyo. Yesu alishibe ukuti ifintu ifingi ifyacindama ifyo acitile fyafikilishe ukufwaya kwa kwa Lesa. Fimo ni fi:
● “Umwana wa kwa Lesa uwafyalwa eka.” (Yohane 3:18) Yesu alishibe uko afumine. Na kuba, ilyo talaisa pano calo ninshi e ko aba. Atile: ‘Nafuma ku muulu.’ (Yohane 6:38) Yesu e o Lesa abalilepo ukubumba kabili abombele pamo na Lesa mu kupanga ifintu fyonse. Apo e o Lesa aipangile umwine, e mulandu wine balemwitila ukuti “Umwana wa kwa Lesa uwafyalwa eka.”—Yohane 1:3, 14; Abena Kolose 1:15, 16.
● “Umwana wa muntu.” (Mateo 8:20) Ilingi line, Yesu aleita ukuti “umwana wa muntu,” kabili mu mabuuku ya Mbila Nsuma, aya mashiwi yasangwamo imiku 80. Aya mashiwi yalanga ukuti ilyo ali pano calo, tali ni Lesa uwali mu mubili wa buntu. Cali shani pa kuti Umwana wa kwa Lesa uwafyalwa eka afyalilwe mu buntu? Yehova abomfeshe umupashi wa mushilo ku kukuushisha ubumi bwa Mwana wakwe mwi fumo lya kwa nacisungu Maria, umuYuda. Ici calengele ukuti Maria emite. E mulandu wine Yesu afyalilwe uwapwililika, uwabula ulubembu.—Mateo 1:18; Luka 1:35; Yohane 8:46.
● “Kasambilisha.” (Yohane 13:13) Yesu alilandile apabuuta ukuti umulimo Lesa amupeele wali wa ‘kusambilisha . . . no kubila imbila nsuma.’ (Mateo 4:23; Luka 4:43) Mu nshila fye iyayanguka, alilondolwele bwino ku balemukutika ico Ubufumu bwa kwa Lesa bwaba ne fyo bukacita ku kufikilisha ukufwaya kwa kwa Yehova.—Mateo 6:9, 10.
● “Cebo.” (Yohane 1:1) Yesu e walelandilako Lesa. E o Lesa alebomfya ku kumulandilako no kweba bambi amashiwi ayalefuma kuli ena. Yehova alimubomfeshe ku kutwala ubukombe bwakwe ku bantunse pe sonde.—Yohane 7:16, 17.
ICIPUSHO: Bushe Yesu e Mesia uo batile akesa?
ICASUKO: Ee. Ukusesema kwa mu Baibolo kwasobele ukuti Mesia nelyo Kristu, icipilibula ukuti “Uwasubwa,” aali no kwisa. Mesia aali no kubomba umulimo wacindama mu kufikilisha ukufwaya kwa kwa Yehova. Inshita imo, umwanakashi umwina Samaria aebele Yesu ukuti: “Ninjishiba ukuti Mesia aleisa, uwitwa Kristu.” Yesu amwebele fye apabuuta ati: “Nine wine ne ulelanda na iwe.”—Yohane 4:25, 26.
Bushe kwaliba ubushininkisho ubulanga ukuti Yesu aali ni Mesia? Kwaba ubushininkisho butatu ubulanga ukuti cine cine Yesu ali ni Mesia. Ubu bushininkisho bwaba kwati cifwati, iciba fye ca muntu umo, ulya wine uwacifwatike. Bushe ubu bushininkisho bwalifikilishiwe muli Yesu? Natumone:
● Ulupwa afuminemo. Baibolo yasobele ukuti Mesia ali no kufuma mu lupwa lwa kwa Davidi, uwatuntwike muli Abrahamu. (Ukutendeka 22:18; Amalumbo 132:11, 12) Kanshi Yesu afumine kuli ifi fikolwe fibili.—Mateo 1:1-16; Luka 3:23-38.
● Ukusesema ukwafikilishiwe. Mu Malembo ya ciHebere mwaliba ukusesema ukwingi ukulanda pa bumi bwa kwa Mesia ilyo ali pano calo, pa kufyalwa kwakwe, ne mfwa yakwe. Uku kusesema konse kwalifikilishiwe muli Yesu. Ukusesema kumo ni uku: Afyalilwe mu Betelehemu (Mika 5:2; Luka 2:4-11), bamwitile ukufuma mu Egupti (Hosea 11:1; Mateo 2:15), balimwipeye, kabili takwali ifupa nangu limo ilyo bamufunine (Amalumbo 34:20; Yohane 19:33, 36). Te kuti tusose ukuti Yesu alicitilepo fimo pa kuti uku kusesema ukwalelanda pali Mesia kufikilishiwe muli ena. *
● Ubushininkisho bwa kwa Lesa umwine. Ilyo Yesu afyelwe, Lesa atumine bamalaika ku kweba bakacema ukuti Mesia nafyalwa. (Luka 2:10-14) Ilyo Yesu ali pano calo, Lesa alilandile ukucila pa muku umo ukufuma ku muulu ukuti Yesu Mwana wakwe. (Mateo 3:16, 17; 17:1-5) Yehova alipeele Yesu amaka ya kucita ifipesha mano. Ubu na bo bwali bushininkisho bwa kuti Yesu aali ni Mesia.—Imilimo 10:38.
ICIPUSHO: Mulandu nshi Yesu aculile no kufwa?
ICASUKO: Apo Yesu takwete ulubembu talingile ukucula nangu ukumupoopela pa cimuti kwati cipondo no kufwa imfwa ya museebanya. Nangu ca kuti alishibe ukuti ifi fyonse fyali no kumucitikila, aliitemenwe ukucula no kufwa.—Mateo 20:17-19; 1 Petro 2:21-23.
Ukusesema ukwalelanda pali Mesia kwasobele ukuti Mesia aali no kucula no kufwa pa kuti apwishe imembu sha bantu. (Esaya 53:5; Daniele 9:24, 26) Yesu umwine atile aishile ku “kupeela umweo wakwe icilubula pa kuti alubule abengi.” (Mateo 20:28) Bonse abatetekela mu cilubula ca kwa Yesu balikwata isubilo lya kuti bakalubuka ku lubembu ne mfwa kabili bakekala umuyayaya muli Paradaise pano isonde. *—Yohane 3:16; 1 Yohane 4:9, 10.
ICIPUSHO: Bushe ca cine Yesu alibuukile ku bafwa?
ICASUKO: Ee, alibuukile. Yesu alishibe ukuti ali no kubuuka. (Mateo 16:21) Lelo icacindama ukwishiba ca kuti, Yesu kumo na balembele Baibolo tabatalile abalandapo ukuti Yesu ali no kuibuukila fye umwine. Takuli nangu umo uwingasumina ica musango yu. Baibolo itila: “Lesa alimubuushishe ilyo akakwile ifikakilo fya mfwa.” (Imilimo 2:24) Nga twalisumina ukuti Lesa e ko aba no kuti e Kabumba wa fintu fyonse, ninshi kuti twasumina no kutila kuti abuusha Umwana wakwe ku bafwa.—AbaHebere 3:4.
Bushe kwaliba ubushininkisho ubulanga ukuti Yesu alibuukile? Moneni ubushininkisho bwakonkapo.
● Abamweneko. Ilyo papitile imyaka nalimo 22 ukutula apo Yesu afwilile, umutumwa Paulo alembele ukuti abantu ukucila pali 500 balimumwene ilyo abuukile kabili abengi pali aba bali bacili aba mweo ilyo Paulo alembele aya mashiwi. (1 Abena Korinti 15:6) Nga ca kuti umuntu fye umo nelyo babili e bamumwene ilyo abuukile, abantu kuti bakaana ukuti Yesu tabuukile. Nomba nani engakaana ubushininkisho bwa bantu 500?
● Inte na shimbi. Abasambi ba kubalilapo aba kwa Yesu abaishibe bwino ifyacitike, balebila ku bantu ukwabula umwenso ukuti Yesu alibuukile. (Imilimo 2:29-32; 3:13-15) Na kuba, baishibe ukuti ukusumina ukuti Yesu alibuukile kwali pa fintu ifyacindama ifyo Abena Kristu basuminemo. (1 Abena Korinti 15:12-19) Aba abasambi bali-ipeeleshe no kufwilapo ukucila ukuleka ukusumina muli Yesu. (Imilimo 7:51-60; 12:1, 2) Bushe kuti kwaba umuntu uwingaipeelesha ukufwila pa cintu ico eshibe ukuti ca bufi?
Twalanda pa mepusho ayacindama 6 ayo abantu bepusha pali Yesu ne fyo Baibolo ya-asuka. Aya masuko yalatweba icine pali Yesu. Lelo bushe ukwishiba aya masuko kwalicindama?
[Amafutunoti]
^ para. 4 Nga mulefwaya ukwishiba ifyo amabuuku ya mu Baibolo aya Mbila Nsuma yapusana ne fyalembwa fya bufi ifilanda pali Yesu, moneni icipande cileti “Bushe Kwaliba Amabuuku na Yambi Ayalanda Pali Yesu?” pa mabula 18-19.
^ para. 9 Baibolo yatila, Yehova e shina lya kwa Lesa.
^ para. 10 Nga mulefwaya ukwishibilapo na fimbi, belengeni icipande cileti “Ukulanshanya Ilyashi lya mu Baibolo—Bushe Yesu ni Lesa?” pa mabula 20-22.
^ para. 21 Nga mulefwaya ukwishiba ukusesema na kumbi ukwafikilishiwe muli Yesu, belengeni pe bula 200 mu citabo citila Bushe Cinshi Baibolo Isambilisha?
^ para. 25 Nga mulefwaya ukwishibilapo na fimbi pa fyo icilubula ca kwa Yesu cacindama, belengeni icipandwa 5 mu citabo citila Bushe Cinshi Baibolo Isambilisha?
