Ababelenga Ino Magazini Balepusha Ukuti . . .

Bushe Abena Kristu Bonse aba Cishinka Balaya ku Muulu?

▪ Abantu abengi balibelengapo amashiwi ya kusansamusha ayo Yesu alandile, aya kuti: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Bushe Yesu aloseshe mu kuti abantu bonse aba cishinka abapepa Wishi, Yehova Lesa, bakaya ku muulu uko bakaba ne nsansa umuyayaya?

Tontonkanyeni pali aya mashiwi Yesu alandile, ayatila: “Takwaba umuntu uwaya ku muulu, lelo kwaba fye uwaishile ukufuma ku muulu, Umwana wa muntu.” (Yohane 3:13) Aya mashiwi yapilibula ukuti abantu aba cishinka abaliko kale, pamo nga Noa, Abrahamu, Mose, na Davidi, tabaile ku muulu. (Imilimo 2:34) Ninshi ni kwi aba bonse baile? Mu kwipifya kuti twatila: Abantu ba ku kale abali ne cishinka kuli Lesa balifwa, baba mu nshiishi, tabaishiba kantu nangu kamo, balolela fye ukubuushiwa.—Lukala Milandu 9:5, 6; Imilimo 24:15.

Mu Baibolo, Yesu wine e wabalilepo ukulanda pa kuya ku muulu umuntu nga afwa. Aebele abatumwa bakwe ukuti ali no kubapekanishisha apa kwikala mu muulu. (Yohane 14:2, 3) Ili isambilisho lyali ilipya ku bantu ba kwa Lesa. Pa numa, umutumwa Paulo alondolwele ukuti ilyo Yesu afwile, abuuka aya na ku muulu, ‘aiswilile abasambi bakwe inshila iipya kabili iya mweo,’ inshila iyo umuntu nangu umo ashapitilemo.—AbaHebere 10:19, 20.

Bushe ici calola mu kuti ukufuma lilya abantu bonse aba cishinka kuli Lesa balaya ku muulu? Iyo, pantu ico bamo bakayila ku muulu ni ku kubomba umulimo uo babapeela. Pa bushiku bwa kulekelesha ilyo Yesu ali na batumwa bakwe, abebele ukuti ‘bakekala pa fipuna fya bufumu ku kupingula’ mu Bufumu bwakwe ubwa ku muulu. E ico umulimo bakaya mu kubomba ku muulu, wa kuteka na Yesu.—Luka 22:28-30.

Pa mbali ya batumwa, abantu na bambi nabo bakabapeelako uyu mulimo waibela. Mu cimonwa, umutumwa Yohane amwene Yesu ne bumba lya bantu ababuukiile ku muulu abo balondolola ukuti ‘ishamfumu kabili bashimapepo abakalateka isonde.’ (Ukusokolola 3:21; 5:10) Bushe bali banga? Nge fyo ciba mu buteko bonse, bantu fye abanono e bateka. E fyo caba na kuli ubu Bufumu bwa ku muulu. Yesu, Umwana wa mpaanga uwa kwa Lesa, akateka pamo na ba 144,000 “abashitilwe mu bantu.”—Ukusokolola 14:1, 4, 5.

Ca cine, abantu 144,000 banono sana nga kubalinganya ku mpendwa ya bantu bonse aba cishinka, aba muno nshiku na baliko kale. Ici calilinga pantu ba 144,000 ababuukila ku muulu balikwata umulimo wa mushilo uo baya mu kubomba. Tutile mulefwaya ukukuula ing’anda, bushe kuti mwaingisha bonse abaishiba ukukuula abekala uko mwikalila ukumukuulila ing’anda? Awe. Kuti mwaingisha fye abalinga. Ifi fine e fyo caba na ku bantu abakaya ku muulu. Te bonse ababa ne cishinka abo Lesa asala ukuyabomba umulimo waibela uwa kuteka na Kristu mu muulu.

Ubu buteko bwa ku muulu bukalenga ifyo Lesa alefwaya abantu ukulaikala fikafikilishiwe. Yesu na ba 144,000 bakalatungulula umulimo wa kuwamya isonde no kulilenga ukuba paradaise, umo abantu abengi nga nshi aba cishinka bakaba ne nsansa umuyayaya. (Esaya 45:18; Ukusokolola 21:3, 4) Pali aba pakaba na balya abo Lesa ebukisha, abakabuushiwa.—Yohane 5:28, 29.

Bonse fye ababa ne cishinka kuli Yehova, aba muno nshiku na baliko kale, bakapokelela ubu bupe ubusuma nga nshi ubwa mweo wa muyayaya. (Abena Roma 6:23) Banono fye e bakaya ku muulu ku kubomba umulimo waibela, lelo icinabwingi bakapokelela umweo wa muyayaya mu paradaise pe sonde.